星期日上午一行6人，相約Ronald & Stanley 等師父在鴨利洲上船， 等o左半個鐘船o 黎喇！ 嘩架船好大呀！真係未見過咁大o既出礁船呀！ 架船全長大約45尺，連埋司機位總共有5排坐位仲係 Walk Through 添， 載客量18人，有2部船尾機，每個200匹，真係坐得好舒服正！

出礁喇！ 出礁喇！ 太古終於出礁喇！ 一出礁必定死傷無數、 生靈塗炭在所難免.........

經過o左半個多小時o既船程，我地終於到達目的地 - "擔桿" ，再由 師父級人馬Ronald & Stanley 引領我們6人上了一個很大礁位，o個到地 方闊落唔在講，背山面海仲有埋泳池添，真係講都無人信呀，個泳池好 大好深水架。

上到釣點，各釣友尋找適合位置開誘餌綁釣組，開始釣魚。大約過o左 半小時沙田鄉下仔釣到第一條老泥，而我個浮波就時沉時浮都唔知攪乜， 於是我把心一橫登行條魚絲，睇住竿頭等魚拉竿，無幾耐竿頭一振"揪竿" 中魚，咦！ 片水播，當時我即刻記得青蛙一句說話 "一手都唔比" ，就係 咁條魚唔使半分鐘比我玩殘上水喇！係一條4至5兩重黃腳立。

Wilson 見我上魚即刻訪問我用甚麼餌和釣組，答案係： 5B 浮波 + 3B 水中 + 3號主絲 + 2號子線，在子線上再加夾鉛，釣組全長 16 至 17 尺。 跟著Wilson即時返回大本營更改釣組再釣過。不久沙田仔再起一條立魚，之 後就成個鐘再無魚上水了，開始嗅到少少蕉味，又熱、又無乜風、又無時無 刻比蚊襲擊。唉............. 無計唯有和小明先行開餐休息一陣喇！連 Joey、Charles 都放低魚竿走去玩水添。

15:00 天色由晴轉陰，心情當然一樣啦！但 15 分鐘後小明突然大叫"中魚" ，見佢支竿彎由成一個C字個攪係咁出絲，肯定條魚一定唔會細，我即刻叫小明 放比佢走，但見小明個較不斷"Jet" 絲, 小明手軟將支竿垂低，出事喇！條魚 已經游埋暗礁把子線界斷。慘喇！慘喇！小明成個Down晒，我同佢講" 唔使驚 等我同你報仇。小明受o既打擊實在太大喇！跟著個一鐘頭連放生o左2個浮波。 唉...........

時間大約16:00終於有報仇機會喇！我見到自己個浮波逐小逐小下沉直至唔 見o左，一揪竿 中"嘩"好勁呀！我不停放LB和打8字，希望可以把魚制服，大約 玩了4分鐘不敵斷口，最衰自己心急，揪竿力度過大斷口收場，且手都軟晒。 唉............可能係個鉤太細鉤佢唔實，好！換大一個碼再釣過。（斷口後 自言自語）

17:00各釣友D誘餌都差唔多打晒，有D仲開始執緊野添，剩返我同Joey還未 放棄，Wilson更將打剩o既誘餌比埋我打，不一會我o既浮波又開始下沉，慢慢 沉直至整個浮波消失，一揪竿"中" 我即時大叫"又o黎"！ 嘩！好勁呀！ Charles 見到大叫"唔使急慢慢同佢玩"，OK 收到一於慢慢o黎玩殘佢，不過真係好勁呀！ 成支06竿彎到落第一節，我不停咁放LB和打8字，條魚就不停咁走，條魚先向右 面走停一停，跟住再向左面走又停一停，帶都冇得帶,冇得還拖....弊！左面有 暗礁，一定要同佢鬥頂，一頂之下它再次發爛向下走，太大力喇！頂唔到呀！ 有無人肯接手呀？居然無人理我，無計啦！ 唯有食自己，跟手再放三下LB，終 於停低o左，我便一下一下慢慢拉佢上o黎，不久一條黑影在水中呈現，上水喇！ 上水喇！跟著聽到 "車" 一聲，原來係一大堆海草跟浮波上水，不久真正o 既 主角終於現身喇！嘩！！！！ 好大餅呀！ Joey 立即拿起撈箕準備，攪掂 Yeah....... 破自己記錄！係一條大白立呀！好彩攝影師Wilson將整個過程拍 低炸，真係要多謝佢呀！釣完呢條魚，各人都收拾一切準備離開。

18:30 天都開始黑點解架船未到o既？明明約o左18:00架！

19:00 有無攪錯架船仲未到，連天都黑齊喇！唔通要o係到過夜？ （有人開始作最壞打算）

19:30 有引擎聲呀！(Joey話：人到左絕望係好容易會產生幻覺)

19:45 終於有船黎喇！但海面非常大浪，再加上天黑及水漲，各人都小心奕 奕地上船, 然後幾經艱苦和大師父協助下，幫我地搬運架餐,才能成功離開釣點。 在此真多謝各位師父。

21:00 上岸後眾釣友一齊到海鮮酒家，發揮電波大咬精神，將條重達5斤12兩 o既白立放入肚，吹水其間師父Ronald & Stanley 說：用06竿起條咁大o既魚，可 能係香港一個記錄。

(Wilson心聲 ： @ March 2000)

能夠同各師父級釣魚，使我學到好多野,而且對磯釣加深了認識， 再次多謝各位使我上了寶貴的一課！！

(鄉下仔心聲 ： @ March 2000)

好彩今次唔使過夜，如果唔係就大鑊啦!! 睇黎個痰罐都唔使旨意離開個頭頂 ！！