Menu Content/Inhalt
首頁 arrow 釣遊 arrow 內礁、磯邊釣遊 arrow 黑角頭芝麻斑

誰在線上

線上沒有任何訪客

線上人數

黑角頭芝麻斑 列印 E-mail
作者 拉丹   
2000/04/06, 星期四
黑 角 頭 芝 麻 斑
日 期 : 2000 年 4 月 2 日
時 間 :  9: 00am - 6:00pm
釣 手 :  Cobra,堅 勇,小柏 柏,青 蛙 & Le' Dan

堅 勇 與 芝 麻 斑 合 照

Le' Dan 都撻黎影番張

青 蛙 打 沉 底

黑 角 頭 好 易 Kick 石

釣 場 環 境

小 柏 柏 正 在 博 殺

(by Le' Dan @ April 2000)

星期日一早約左幾個釣友去小西灣黑角頭偷釣。雖然小西灣黑角頭我已經去過好多次,但係今次係由 Corba 帶路,帶我地去我一個從未去過既新位。

釣點非常安全,但前往釣點之前所經過既路就好鬼危險。地點係小西灣南灣半島沿海向東行,爬過不知幾多個險峻既峭壁,有部份山路更要爬上山再爬番落黎。總括黎講係一個兒童不宜既四級釣點。

前往郊通 :
可以坐任何前往小西灣村巴士總站既巴士,總站落車之後向南灣半島(海邊)方向行。於南灣半島地盤附近,有一個比圍板圍住晒既入口。沿住圍板小路行五分鐘,就可以見到海邊。這個釣點就是小西灣了。

如要住堅勇中芝麻斑果個位,就要沿海邊向東行,行到一半就要爬上山,否則冇可能去到果個位。如果唔係有熟悉地形既人帶路,相信好難搵到入口。我以前都去過小西灣好多次,但係最遠都係去到大平台。大平台以外地方,就一定要上山後再爬番落去先可以去到。

釣旅行程:
我地一行五人沿海邊行左一陣,Cobra 就叫我地向山上走。我心諗,唔係丫嘛,釣魚要上山?? 唔通比佢撚化?? 由隱蔽既山路行左一陣,已經距離海邊越黎越遠。突然Cobra 叫我地各山下面行。唔係丫嘛? 果度係山岸黎咖喎?? 跟本冇路可以行! 我都未諗完,Corba 已經好小心咁爬左落去。 冇計啦! 既然黎到唔通唔跟埋落去咩?

小柏柏第一個跟住 Cobra 好小心咁爬左落去,我就跟住小柏柏好小心咁爬落山,而青蛙同堅勇就殿後。 行左幾個 Over 45度既樹位之後,發現 D 樹旁邊有一條游繩。條游繩係由一條尼龍繩,尼龍繩既中段縛左好多結以防止 Sin 手! 游繩一邊縛住一棵大樹,另一邊就縛住山坡下面既大樹。加上當日落緊毛毛雨,D 沙泥都好似好鬆,一個唔小心碌左落去,有九成機會會 Certify! 釣魚要玩游繩我都係第一次。

我一路跟住條游繩慢慢 Sir 落去,諗住只係一段路有游繩,過左希望會好行D 。點不之玩完一條又到另一條,一共換左四五條游繩。又到左換游繩既時間,我發覺點解果度有兩條尼龍繩咖呢? 發達喇! 歌仔都有得唱啦 --- "雙重力量係會好過得一個"。點不知原本有兩條繩係代表危險情度加倍。

捉過唔知幾多條游繩之後....... 大鑊! 點解呢段路冇繩咖?? 雖然冇游繩,但係果段路都幾危險咖。 對於我呢D 平時小運動而擁有六舊腹肌合而為一(肚腩)既我就更加辛苦,幾經辛苦先爬到落去釣點。

去到釣點,我地先周圍視察下環境。走去釣場既另一邊,原來已經有兩個釣友係果度玩緊手竿。佢地都有D 泥猛仔玩下,不過果日天陰加上間中落下毛毛雨,泥猛既釣獲未如理想,只得十條八條。

同果兩個釣友係咁二吹完水之後,我地返返去大本營開竿。小柏柏同我就第一時間開磯竿攪磯。青蛙同堅勇就開投竿,而 Corba 就開相機周圍影。

冇幾耐之後,小柏柏就中魚,第一條上水既係石狗,跟手再中多幾條。而企係另一個距離較遠小小既釣位就咬都唔咬下。突然間我見個浮波沉左,我一抽,嘩! 中啊! Cobra 第一時間影下我 Kick 石既情況! 而我亦Mut 底扮出同條魚角力既姿勢 (如照片)。

之後 Cobra 用手絲都中石狗,而青蛙同堅勇都有斬獲。我於是轉磯為投,即刻開投竿開下齋,總算都有幾條石狗交下差。不過釣點比較大流,出面又有D 大大細細既船係出面飛,加上又易 Kick 石,所以差唔多 12點我地就轉位去之前兩位哥哥仔果度睇下咩環境。

佢地主要既魚獲都係泥猛同石狗,而有一個釣友用手竿釣得一條比手板大小小既石霎。果陣雨勢開始加大,果兩位釣友就開始執野走,而我地就係佢個位試試。

我即刻用投竿加淫X釣組,用細既勾同埋小型浮標釣下魚毛。小柏柏就開筏竿試試。青蛙繼續投釣,堅勇玩手絲,而Cobra 就閃埋一邊同我地打氣。

過左一陣,小柏柏已開始轉玩我支手竿。我既淫X釣組郁都唔郁。堅勇同青蛙都係豪無動靜。於是我又變陣玩手竿直 dum。 果度都有十幾呎水深,因為係內灣位,所以都叫做靜水。而內灣入面都有幾艘船先後到黎落簾,即落即收。但係我地睇唔到佢有冇料到。

釣呀...釣呀...突然間我支手竿一下幾大力既力拉落去。我一抽,就連埋個勾都唔見埋! 唔通有大野係附近?? 青蛙同堅勇都半信半疑,不過冇幾耐之後,我見阿堅勇開始有所動作。見佢一手都唔比係咁收絲,我再望去水面。 嘩~ 係~~! 我見到有個白影係水面由左至右咁游,照睇都有斤頭。青蛙亦走埋黎大叫 : "慢慢呀~~我有撈箕啊!" 堅勇就話 : "唔使! 我6磅絲黎咖!" 跟住堅勇就一手都唔比咁的左佢上黎。

上左水之後,我地一齊為堅勇歡呼,而 Corba 就相機出黎影下堅勇既戰利品 ---- 一斤芝麻斑。 當時各人既戰鬥力又上升番,紛紛換上正常 Size 既勾去作釣。 可惜到臨走都冇乜驚喜!

三點前,小柏柏同 Cobra 因為有事先後撇左,只係淨反青蛙堅勇同我三個繼續釣,間中都有石狗幫趁下。 到左五點咁上下,我用手竿釣左一條加大碼既石狗斑。石狗係計真係大兜。

冇耐之後,青蛙發現海面黎左一班泥猛,為數最小一千條。於是佢地兩個就開手竿,希望可以撈番幾條,可惜釣極都釣唔到 Sample 上黎,而我就繼續用大勾盼望奇蹟既出現。

到左差唔多天黑,我地執野走既時侯奇蹟先至出現。較早時後我只係係咁二帶一帶條絲就好易 Kick 石,但係到我 Last 口餌既時間,我諗住 kick 左石就走,結果我由左邊帶到右邊,又由右邊帶番去左邊來來回回十幾次都唔 kick 石,激鬼死我! 真係奇蹟! 於是青蛙左我支手竿,希望可以幫我 kick 石,點不知佢玩左好多手都唔 kick ,連之前有一個 Kick 硬既位都唔 kick,真係激到我地彈起。一個唔覺意仲比佢中埋一條石狗添,真係冇天理。 因為怕天黑山路難行,所以放棄釣石頭,於是就剪絲走頭!

人地話上山容易落山難,我就話上山難落山更難。 上山既時候雖然比朝早落山時候容易,但係因為路面濕滑加上 Mut 左成日同埋個竿袋陀手lun腳,成日kick 住D 樹枝,都有一定難度。青蛙佢覺得我地好似左長槍既士兵,係山林入面爬游繩向住敵人既陣地前往。 好不容易先可以離開個釣場。

雖然我今次又係白果,但係阿堅勇有斬獲我都好"躉"佢高興! 總算不枉此行!

 
 
< 前一個   下一個 >