Menu Content/Inhalt

誰在線上

線上沒有任何訪客

線上人數

太平洋艦釣 列印 E-mail
作者 撈云   
2000/11/01, 星期三
《太平洋艦釣》


文 : 電波駐阿美利堅OSF釣友 Loren @ Nov 2000

今次有得去都係多得朋友K!事因日前佢從LA番上黎搵我出街,而佢既朋友仔J小姐話好想出海釣魚,所以K哥就叫我陪佢地去啦!聽到有魚釣當然開心啦,正當我應之際….咪住先!上次出海釣三文魚蕉得好緊要喎!而且太平洋又勁大浪,我同friend加另外十個人都有最少四個人〝打左柴〞(不過冇我份,因為我唔暈浪既)所以立即話佢知以上有可能發生既情況。不過佢話唔怕喎!最多啪定暈浪藥咁話…既然佢都咁講…好啦就出去陪佢玩啦。之後立即打電話去出海既釣魚店問有冇船聽日出啦,咁好運地竟然剩返一隻深海釣石班船有位喎!(因為呢幾日係感恩節,美國人黎講係大節,所以人人有假放)立即留左4個位今日零晨5點要去到果度,所以立即執好之後覺。 3點am阿K哥就接埋我同2位小姐出發去釣魚店報到啦!

4點零去到報到,例行公事就梗係租架買釣組啦!竿用上沙士比啦既〝核突〞船竿7尺受力20至50lb,用PXXN60橫絞配50lb絲。而釣組係50lb生餌捨棄式同散'賴'毛勾加12安士同16安士鉛錘各一。好勒,攪掂晒上船啦….同阿K哥影返張相先!好啦船開啦~~~不過唔係直接出去釣點…而係去佢地養生餌既魚排D魚仔放落生餌倉先,完之後佢地立即講解點勾生條魚。講解後終於向釣點出發,佢地話要2-2.5個鐘先到所以有爭取時間食同休息。而我地就玩啤牌諗住玩到目的地點知一個鐘後佢地3 個不約而同咁左,剩返我一個又冇人陪我吹水咁咪行出甲版吹海風啦….

一吹就2個鐘,而正當我望住個海諗緊今日D浪冇上次咁勁我諗佢地冇事啦,點知講完一陣2位小姐終於醒左而又走埋黎同我講同一句:〝頂唔住想嘔呀〞唉終於發生啦冇法啦唯有扶佢地埋船邊嘔啦(船內廁所唔比人嘔)好快有一個船員好nice咁行過黎送上青檸汽水同紙巾比佢地話飲左會好D,之後又左D 專治暈浪既藥油比佢地搽,又比佢地食,多得佢我先冇咁惆悵咋。當2位小姐好番D之後M小姐話要入番去,剩返J小姐陪我吹水到目的地。
 

30分鐘後終於到啦!好立即將3支竿勾上餌先…好彩J小姐幫手所以話咁快落晒3支竿,正當我點緊X〝抖氣〞之際有船員嗌話我最右手邊支竿有魚,正當我想上先收絲之際,K哥無端端從後閃出黎收竿… 乜佢唔係船倉昏迷緊咩?好快地佢就收左條2磅零既班上黎,置於係乜班我地呢度叫黃班(同HK d唔同)之後佢立即走返入去,之後我同J小姐到船轉位前都冇起到魚。

而當我地收起d竿比船轉位時船員又走過黎睇我地個麻包袋有幾多魚當佢見到得一條佢就有D不滿問我地點解3支竿得1條魚,咁我就話J小姐唔識釣魚同我又冇深海船釣經驗,佢聽到後立即話轉到新位後立即教我地睇魚訊同幫我地上魚。當去到新位佢幫我地從新上餌同下竿而佢又落自己支竿,點知都係佢支竿中先。呢個時候佢叫我收佢支竿玩,我梗係第一時間跑過去收啦。

嘩!好重呀!支50磅竿咁硬既竿攣左三份二,而且絞2下又"空轉"幾下收到果時又勁掙扎,我諗都好大條。上水!原來有3條斤頭班因為佢支竿用散 '賴'4毛勾釣組而我d竿用生餌捨棄鉛釣組。佢睇到後嘆氣一聲話左時間,我問點解佢話應該等到4個勾都有魚先收…我同佢講我收3條斤頭班加12安士鉛已經好辛苦,4條既話我諗我手都軟晒(成百米水深中魚呀!)之後佢話3條都比晒我地,真開心(因為當時我地個麻包袋得一條)。正當我又想〝抖氣〞之際佢又話我支其中一支竿中魚啦!

係咪咁玩我先?頭先我企支竿面前望實就唔中,一行開抖氣就中魚… 天啊!本來我想叫J小姐去收魚因為佢最近支竿點知佢話未抖順氣喎咁我又要跑過去收啦,收頭兩都冇乜料到,收多2手後竟然jack絲係咁出線!心想哩條應該係好!立即從竿架上支竿手持作戰,第一時間摟緊d橫絞粒星同佢搏鬥,但係都係咁勁成日空轉。收左3分鐘到J小姐同我講話我面青緊問駛唔駛幫手,點知唯一識聽廣東話既船員話唔比J小姐幫手要我自己上又話我咁渣同埋收得慢。

既然咁唯有頂硬上啦!再4分鐘後一條接近手臂長既Ling Cod上水…立即落網撈。正當我諗住叫船員幫我放落個麻包袋時佢竟然話唔得要放。!咁大條都要放?(美國釣魚每一隻魚都有一個准尺寸,大過或細過都唔比。如果左而又比人捉到每條罰5百美金)我立即問佢係咪唔夠大 (Ling Cod可以有成個人高,什至更大)佢話唔係係因為過左准釣佢既季節。唉好黑呀!正當佢放返之際J小姐叫住佢話等佢幫我影返張相先放。好彩佢提醒我影相如果唔係你地冇相睇你地可以睇到相中我個樣幾殘都係拜條魚所賜。

影完相後我真真正正要抖氣時另一支竿又中魚。今次個船員終於叫J小姐上魚(我終於有得抖啦~)好喇坐底睇佢表演…雖然佢係女仔而又嘔完,不過佢玩魚都有板有眼(又多一個女釣女喇)終於收到上喇又係黃班不過大過K哥果條。我立即叫佢擺"鋪屎"比我影相。跟住船員幫我地上餌然後我地下竿,但係J小姐話要自己上餌喎,所以個船員又插我話我咁Q懶(咩呀!我HK都成日叫人幫我上餌嫁,吹咩)點知下完餌後3支竿同時中魚!好彩有 3個人(J小姐,我加其中一個船員)先收得晒3條魚。

之後2個鐘都不斷轉位同大咬,我同J小姐都不斷上魚,夾埋都有30條不過 Line Cod全數要放所以只有20零條。到後來M小姐都有出黎客串上左2條魚(有一條Line Cod)而我又中一口一揪竿收2下jack絲入石…立即叫個船員黎幫手不過佢揪左2下比魚射斷左。佢話唔駛失望因為咁堅既多數係15磅以上級 Line Cod先可以射斷50磅絲所以上到都要放(比佢吹漲走左我條魚仲咁大條道理)。



好快又到差不多回程船長叫大聲公話釣多5分鐘要回程,呢個時後阿K哥又忽然閃出黎話要埋齋喎。好啦立即上餌幫佢下竿,幸運地佢又真係中魚所以立即幫佢影張同魚搏鬥先,點知又中Ling Cod又要放。之後另一支竿又中魚所以佢又去揪今次係黃班立即影低呢條我地全程最後一條魚穫。好喇終放收竿回程,D魚員立即問大家要唔要擋魚,片2邊肉用黎做魚柳5蚊10條,打鱗清內臟10蚊10條(多功夫所以貴D)。差不多全部人都片肉(鬼佬同墨西哥佬唔識蒸魚食)不過我梗係話要打鱗清內臟啦!

佢話我大約有接近30條又話可以比多十條我(每人最多十條)。但係我話佢知我地4個人得3個准釣証而有2個係只可用一日(我個一年)因為佢地唔識釣所以我叫佢地買2個一日証分黎用之後佢話照比多十條我話比多10蚊佢D人黎查時果十條入佢地數(咪以為佢地乘機屈水,美國新鮮石班係頂級高價海鮮平均4-5蚊美金一磅,你去餐館佢地實同你收或者可以用幾條換一餐好既晚飯都得)不過我諗過都係唔要喇因為我地都係抱住玩既心態黎而我仲唔食魚既添!


之後佢地3個又返入去我就睇人魚見到有一個亞洲人釣到幾多…立即影低先,之後冇耐到我地袋魚穫…立即又影低先。完之後我都入去到埋岸,又係執走既時候梗係阿K哥負責抬果個有接近60幾磅魚穫既麻包袋(成日都冇乜操勞過而佢又大隻)最後比貼士…D鬼佬話我知比5蚊己好多。但係我一諗到佢地幫我照顧2位小姐(當佢地嘔時)等我可以專心釣魚,又比佢2個飲同食又成日幫我地上魚上餌(真係差不多全程企我地旁邊) 。所以我都好識做比張100蚊叫佢比番40蚊我就得(連30蚊魚)佢聽到之後問我係咪講笑,我又點得閒搵銀紙黎講笑呢!佢立即好開心讚我好人。(不過我覺得好人果個係佢先真)最後跟佢地D船員道別走去食飯。

總括全日消費:上船55蚊位,租竿絞加買釣組16蚊位,生餌船上供應。另佢地買一日准釣証7蚊位。大約每人80蚊我自己覺得價錢合理同有魚穫保証,好過上次去隔一個公路出口果間又係咁多錢又釣唔到魚又唔鬼理我地。








各位釣友如果到開三藩市而又想出海釣魚可參考呢間釣具店

網扯: http://www.emeryvillesportfishing.com 。我坐果隻係 " C-Gull Ⅱ"
註1:每一隻船由唔同船長擁有,咪以為去到是但上一隻都一樣。
註2:以上金額以美圓計算。1美元約等於7.8港元。


 
 
< 前一個