Menu Content/Inhalt
首頁 arrow 釣遊 arrow 岸釣釣遊 arrow Go! Go! Go! 電波秘寶團

誰在線上

線上沒有任何訪客

線上人數

Go! Go! Go! 電波秘寶團 列印 E-mail
作者 電波釣魚網   
1999/02/18, 星期四

  活動名稱   :   Go!Go!Go! 電波秘寶團
  目的地點   :   離島區長洲張保仔洞附近 
  出席人數   :   暫時仲係一個迷!  應該 15 or UP 
  活動日期   :   1999年2月18日 (年初三) 
  集合時間   :   07:30 - 07:45 
  回程時間   :   17:00 - 18:00 
  集合地點   :   香港島中環港外線碼頭往長洲閘口 
  食物飲料   :   請自備食物及食水。 
  大會釣法   :   投,磯,假餌,重磯,手絲,徒手皆可 
  魚餌魚具   :   照舊自備 
  負責人員   :   照舊自生自滅,冇人負責! 
  活動收費   :   例牌自備車錢。 
  報名辦法   :   參加者請 E-Mail給小柏柏以作預人數訂沙蟲及青蟲 
  注意事項   :   由釣點有潛在性危險,請各人千其小心。 

到達港外線碼頭後,即互相介紹自己!
( 由於新釣友太多, 一時間都唔知邊個打邊個 )
電 波 秘 寶 團

1999 年 2 月 18 日

電波釣友o係港外線碼頭等候其他釣友出現!
( 相信呢個時候, 罪人 Danny 因為訓大o左尚未到達 )
終於人齊, 電波釣友 坐船去緊去長洲喇!
 上船時,個個 D釣具一抽二 lun,引來長洲賓客居民哄動
到o左長洲街渡碼頭, 成班人影番張相先!
部份電波釣友往附近商店補給食物及飲品, 其他釣友則在街渡碼頭等候!
又人齊喇! 
終於可以上街渡喇!  !
街渡開價三舊水, 經 風師兄還價確認兩舊水成交!
電波釣友上o左賊船都唔知, 仲鬼死咁開心添!
果個唔老實o既船家, 明明講好話兩舊水, 走果陣居然反口老屈我地兩舊半喎! 
幾經波折, 電波釣友終於到達釣點, 一伙兒即刻影番張相留念先!
( 好 疊 馬 呀!!! 連 埋 o查 相 機 o既 威 哥 仔, 一 共 廿 四 人 )
好喇!!好喇!!   終於有條見得人o既魚睇下喇!  八兩 "金絲立"
活動結束, 電波釣友到長洲一間露天茶座飲 "哥啦" 同 Beer Beer 佢!
釣具擺堆一邊, 
都好多野咖!
JOEY 奪得大魚獎, 笑到見牙唔見眼!
開始天黑喇! 第五擊
活動亦告結束!
.
第五擊重點內容 

  * Danny 又訓大o左,又遲到,累街坊久候. 
  * 去 M 記買15個包包請電波釣友食以向各位謝罪!! 罪過罪過! 
  * 雄仔&阿妹居然冇到喎! 
  * 第五擊出席人數超過廿人大關. (Total : 24) 
  * 上船落船期間引來長州賓客及居民烘動! 
  * 魚竿總數四十三支. 
  * 有釣唔完o既虫虫! 虫虫多到得人驚! 
  * 威威將佢屋企個廚房搬堆去釣點咁滯. 咩o野煮食架生都有! 
  * 賢良淑德o既威嫂為電波釣友炮制撚手午膳! 正!! 
  * 投釣今Round 戰果比磯釣優勝. 
  * 蚊型石九曾孫唔覺意比我地勾到! 
  * Joey 獲得大魚獎 
  * 小柏柏以一條之差錯失白果獎比Danny. 
  * 廿幾個電波釣友終於可以o係露天茶座齊齊飲"哥啦"! 爽!! 
  * 阿聲拒絕拜仁o既追求, 佢地終於冇得"錫錫"!令眾人大失所望! 
 


 
第五擊精彩片段 
By Norm on Friday, February 19, 1999 - 02:06 am:

呵呵呵~ 
由於戰地記者威(偉)哥、電波特派專業釣魚評述員柏圖同埋太古電波宣傳部總監兼魚旦事業貿易專員丹尼都唔得閒,就等我哩個臨時垃圾會發言人兼代表律師, o黎做今次第五擊o既賽後報告啦! 

"當人地好夢正含,我地已經各就各位,準備出發, 務求做到更快更勁o既速度,達到最高魚獲" 

0730: 各釣友集結係中環港外線碼頭預備向長州移動, 點知係點名既時侯發現Danny唔見人,於是唯有等埋佢,由於Danny遲到o既關係,令我地miss o左班船。 幸好佢有些微悔意,幫各釣友買早餐,經太古電波活動小組執行委員會相議後, 引用電波條例第三條判罰當時人二十一枝"哥啦",及警告其日後活動必須準時出席。 

突然柏圖兄既手電響起, 原來係太古之父魚神Jorden o既越洋祝賀, 為太古電波釣友既第五擊壯行,令人振奮!集合後我地一行"大約"廿二人(數到頭爆)乘船向長州進發。 

到達長州後,買完午餐,各釣友都急不及待,即刻上船, 經風師兄同艇家一輪唇槍舌劍後議價來回二佰蚊,就開船向我地o既釣點五行石前進啦! 

隻船行o左一陣,向山頭一望,發現有電波fans向我地招手窩! 睇真d,哦!原來係Tommy兄同埋神秘女釣友,令我地第五擊o既人數增至二十四人。 當哩隻超載o既船就到達釣點既時侯, 我同亞Ray都異口同聲甘話"嘩!都幾有出礁feel窩!" 果然,上岸o既時侯要將各人o既釣具續件傳上去, 再一個扶一個上岸,又一次發揮電波o既團結同埋合作既精神! 

上岸後,我地一班"投磯"o既釣友就即刻設定釣具同觀察釣場, 
開始釣魚! 壯觀o既場面出現啦,超過四十五枝杆係岸邊揮動,極為震憾!(準確數目由Danny兄公報) 

過左好耐好耐,都未又人上魚,加上太陽猛烈, 另各釣友都透不過氣! 哩個時侯,終於有人釣到魚啦,係一條手指甲甘大o既石狗公!(唔記得o左釣友個名,請見諒) 

正當人人都冇乜心機,突然Joey o個邊傳來歡呼聲"有啦~~" 原來係一條大約七八兩既絲"魚立",將第六擊推至高潮,各人又再次恢服信心! 

到兩點鐘,午餐時間! 今次除o左有新鮮熱辣(晒到)o既麵包同蛋糕之外,仲有威哥同威嫂用古法炭爐泡製既公仔麵,正呀~~~~~~ 

一直到五點半,都好平靜,船家又到啦,各人收拾細遠, 搭船返長州市中心。點知落船o既時侯,船家突然發爛,話船費係二佰五十蚊, 由於電波釣友唔希望係新年同佢嘈交,只好無耐地俾多五十蚊! 

最後去左一間快餐廳門外樹下飲三蚊枝o既"哥啦"同埋傾計, 大家仲簽名留念,係樹下大講魚經,不亦樂乎!雖然魚獲不多,但係Joey兄既一條絲"魚立", 總算為電波釣友係新既一年打響頭炮, 亦印正左電波釣友"魚獲第二,娛樂第一"o既精神!

今次電波釣友第五擊,經已完滿結束啦! 而且仲創下唔少記錄! 
1. 最多人數參加(廿四) 
2. 最細魚毛(石狗公魚毛) 
3. 柏濤讚助o既"白果杯"明花有主(基於私隱條例不便透露 等等 

希望各為釣友同我一樣,玩得開心! 


 
 
第五擊重點內容: 
By Pakto on Friday, February 19, 1999 - 02:06 am:

己卯年正月初三(赤口)(小說版)以下故事有六成以上純屬老吹

一九九九年二月十八號o既天氣預測,大致天晴,天氣炎熱。氣溫介乎十九至廿二度……………

清晨六時正,開著收音機睡覺的小柏柏正漸漸的從夢中醒來…「唔~~六點o拿…呀~~好倦呀~~~~」。小柏柏帶著了疲乏的身體由床上輾轉的蠕動至洗手間來……

大約七時十五分,小柏柏經己到達了港外線碼頭。當小柏柏到達之時,標叔叔經已到達了,經過一輪的新釣友介紹下,威威伉儷又到達了。之後風師兄,Norm及其他新釣友陸續的到臨後,我們正式的向各新釣友介紹“第V擊”的顧問Ronald兄。……o依?
好似小o左個o既?…

…哦!原來我o地電波老SeaFood丹尼遲到!…嘿…嘿…你仲唔大鍋!今期廿幾人,每人一枝“哥o拿”你都咪話唔大檸樂!…正當大家知道吳生起唔切身,準備上船之際…“o冷~~”鈴聲響起,船亦無情的離電波釣友而去…

在大家失意的同時,小柏柏的身上響起了音樂聲!正當各人以奇異的眼光射向小柏柏的時候,小柏柏又突然在褲內拿出一條“蕉”形物體!…哦…電話響。…「喂?喂,邊位?」…「

喂!柏濤呀?」「o依?…Jorden?…恭喜發財,恭喜發財!o甘錯蕩呀?」Norm:「Jorden呀?」「係呀!同唔同傾呀?」「好呀」……………原來係我o地魚神Jorden來自澳洲o既越洋賀!…有o左魚神o既打氣,我o地一眾電波友尤如有神左右一樣,立刻振奮起來。

再半小時多後,遲到o既Danny終於帶同成廿個麥當勞包包到達。在人齊後大家都先後互相報上名來,場面之震撼非筆墨所能形容。跟著到了八時半,浩蕩的“電波釣友”齊齊上船向長洲進發。……

到達長洲後,浩蕩的眾人一起行至長洲碼頭旁的街渡碼頭。放低裝備在碼頭後我們亦分開的到不同地方補給糧水。在各人歸來後大家都急不及待的將裝備運上船(唔…果然有D出礁Feel),船上由我們電波講價皇“風師…奶”與艇家開了一個「五行石收幾
錢」o既辨論比賽!最終由電波代表以較低價二佰元(來回)取勝。

船,一直在海面上向著我們今次“第V擊”的目的地進發之時,突然有人發覺船的左面山頭有兩個手拿三呎棒狀物的人正到向船隻招手,而船隻亦向二人開去!……正在眾人心想「唔通佢o地係張保仔後裔?海~~海盜!?」。我們有位釣友突然大聲呼叫「Tommy呀!」……

哦—Tommy~~唔係打劫,好彩…………當呢隻超載超到沉o甘濟o既船到達釣點之後,船家立刻找一處上岸點熟練的把艇頂著!各人登時高速的搶灘及把所有裝備高速的登陸。在各人上岸後,大家立刻開竿的開竿,攪誘餌的攪誘餌,眾人都異口同聲說出「嘩!幾正播,幾有出礁Feel播」。

當各電波釣友設定及裝備好一切後,震撼o既情景又o黎啦!廿幾人,四廿幾枝竿。有大有細,由六呎到十八呎,由手竿至磯竿,不斷的在五行石上揮動。場面之壯麗,非比尋常。……

釣呀釣呀……o依?冇魚o既?……磯釣o既由原本六呎水,釣至廿幾呎……都係冇魚……打沉底o既不斷Kick呀Kick……都係冇魚。…加上當日天公嚴重做美,太陽伯伯異常落力o既打氣,仲有失o左約o既風之精靈…總之就係儸命!

不久後終於有魚上水喇!嘩!勁呀!九公皇…個曾孫呀!1CM大呀!………真係鉤都大過佢…陰公…………

冇耐後終於有希望啦!…突然Joey那邊傳來了歡呼的叫聲“有啦!~~~~~~Wooooo”。來自投釣界的Joey不斷吃力的收線!身旁的人不斷的拍手歡呼。剎那間長洲五行石上皆遍佈歡樂的氣氛!哦…原來Joey兄經過一番努力後,一條七八兩的絲立終於從離水上岸,第五擊的高潮就在比時。

兩點半了,唔…阿威嫂仲乜玩火呀?咦…威哥仲乜o係褲袋唔係…係背包度收埋個平底鍋呀?…嘩!唔通威威同威嫂冇魚釣,玩發脾氣玩食炭?…o依?又好似唔係o播,乜乜有o甘多杯麵o既?…好o野!有o野食!正呀!殺晒!...............

大家於午餐後亦再次開動,直至漫天金黃方才乘船而去。在船上…出事喇!正當風風比錢船家之際(二百),船家突然來一招「打死狗」開天殺價!收多25%,即係$250…小柏柏登時對身旁的人說:「唔好比,叫佢報警丫笨!隻船超晒載,我真係唔驚你唔驚呀」。最後由於各電波釣友都不想於赤口與人爭執,所以只好將$250大洋拱手相送。

最後,大家於長洲一間客棧內共享“歌拿”,並召開了第一次電波大會及吹水大會,大家都口沬四射,吹個不亦樂乎。而本次“第五擊~~Go!Go!Go!電波秘寶團”亦圓滿結束。
 


 
 
 
< 前一個   下一個 >