Menu Content/Inhalt
首頁 arrow 釣遊 arrow 艇釣釣遊 arrow 電波烏Sir Sir 墨魚團 (B船)

誰在線上

線上沒有任何訪客

線上人數

電波烏Sir Sir 墨魚團 (B船) 列印 E-mail
作者 電波釣魚網   
2000/06/17, 星期六
電 波 烏 Sir Sir 墨 魚 團
魚 樂 圈 二 打 六 餵 魚 大 會 -- 第 十 六擊
 
[電波活動][行程表][簡 介][ A 船][ B 船 ] [ C 船 ]
上船前碼頭盛況阿屈望咩呢?小豐師傅拒絕與釣迷合照電波五苦槳電波六苦槳?肥熊唔知攪乜!
一朵鮮花插在侯活上。哎~~!撈云&朋友仔某某父子A船外貌B船船艙獎品晒冷
準備描獎Le'Dan死唔放手撈云撈到荀野喎小妹妹中獎小某某都有份Tigerman又有!
呢位太太都有份中獎小DeeDee又中Cobra都執到份好野抽唔中既青蛙手指指將悲憤化為食量大咬喇!
我咬!我咬!我咬咬咬!Le'Dan第一個中墨魚青蛙擢到一條紅衫魚B船上的電波釣友合照小柏柏個咀....得食之男撈云&朋友仔

下 載 (3.6MB) 以 上 30 張 照 片 (另 加 17 張) 640x480 pixel 版 本
(鳴謝 : Cobra 提供以上照片)

 
 

下 載 (1.2MB) 以 上 18 張 照 片 的  640x480 pixel 版 本
(鳴謝 : Le'Dan 提供以上照片)
 
  B 船 報 告   by Le' Dan @June 2000

臨上船一刻,遲到半粒鐘既青蛙終於到達碼頭。

最衰個船家都係早多小小,如果唔係我地可以大條道理放左阿青蛙既飛機丫嘛 ! 嘿~嘿~! 隻死佬青蛙真係好彩,架船泊碼頭既同一時間到左碼頭。果陣時佢都以為我地真係咁好心等埋佢! 我地當然冇將呢個事實話比青蛙知,眾人由上船埋怨到佢落船均埋怨佢遲到攪到我地小左半粒鐘時間先上船 ! 不過可惜冷嘲熱諷對隻青蛙黎講都冇乜用!

上左船之後,助理即刻向船家單聲,通知佢我地既目的地係科技大學,個船家冷醒咁同助理講佢一早就知。攪到助理非常冇隱。

將帶黎既食物同水安頓好之後,阿助理為左減磅,就將黑手大人買既獎品出黎抽獎。太古網都算係咁啦,今期讚助左千幾蚊出黎買獎品,每架船都分到幾舊水。如果一個唔覺意抽到一兩件,報名費都差唔多返晒老本。

第一個獎由助理先抽,之後因為助理處事公平,所以就交比第一位幸運兒幫我地繼續抽出第二位幸運兒,再由第二位幸運兒抽出第三位。所有獎品都係一D釣具,對唔釣魚既人黎講可能冇乜用,但係偏偏抽出黎既就係電波家屬居多,而電波釣友命中率就差左小小,只好怪助理今次太過公平喇! 哎~~! 唔使一陣,D獎品就抽鬼晒。

抽完獎之後,就即刻第一時間將帶黎既自助餐食物晒冷,一時之後好鬼密口。估唔到最受電波釣友歡迎既就係 "豬扒",特別係青蛙,一見到 "豬扒" 就流晒口水,連最後一舊賣剩蔗既 "豬扒"都比佢 埋。日後大家發現有咩 "豬扒",真係要第一時間通知阿青蛙先得喇! 嘿~嘿~!

大咬完之後雖然仲未天黑,但係阿 Le'Dan 已經急不及侍,立左一個手排開工,死擢爛擢。其他釣友見Le'Dan咁勤力,有D 就持觀望態度,有D就加入一齊同阿Le'Dan死擢爛擢。

擢左一陣,中喇 ..... 個頭! 有D雨水開始打落眾人既頭上面。唔係丫嘛! 唔通架船飄埋左阿 十五擊過期黑手 既船邊,攪到烏雲蓋頂?? 真係掃興,擢左十幾分鐘,一條墨魚鬚都擢唔到。突然之間,............ Le'Dan 電話響起,原本係 A 船既釣友急Call,佢地已經中左第一條墨魚。唔係咁邪丫嘛! 我地點會乜都冇丫 ?

收到呢個Call 之後,眾人就更加努力擢呀~擢呀~擢呀~! 不過都係冇乜料到! 阿某某個仔仔當時企阿 Le' Dan 身邊,Le' Dan 為安全起見,第一時間通知阿小某如果中左墨魚,千奇唔好心急扯佢上水,要等佢水入面噴完晒墨之後先好的佢上水。大家日後擢墨魚既時候,記得提醒你身邊既朋友丫! 如果唔係你好有可能隨時變包公! 嘿~嘿~!

再擢多一陣,終於有條墨魚中招喇! 第一條墨魚咁唔好彩比阿Le' Dan 擢中! 大家見有料到,就開始打入戰團。一時間,勾起勾落,真係唔覺意游埋黎都死得九成。

另外一邊,撈云開始開動筏竿,去船尾釣魚。筏剛初現,唔使一陣一條傻下傻下既石狗公唔覺意比佢釣中左,好彩差唔多上到水同阿撈云講聲 : "Just to say Hi!" 之後就自己跳番落水! 不過後尾都有一條魚毛中左招。撈云幫佢支筏仔開左光之後,就閃埋一邊吹水。

果陣時,船上既釣友都開始有D收獲,不過就疏口到暈,全船果陣時只係得三幾條。突然之間,有釣友發現有一大群墨魚蒲頭,於是大家又一窩蜂飛撲埋船邊死擢爛擢。不過唔知係咪D墨魚近科技大學,所以好似受過高等教育,只係八爪勾邊漫游而唔撲埋去,所以都船上既釣友連一條都擢唔中。與此同時,個天又開始落雨,而D讀過書既墨魚唔知係咪走鬼晒去避雨,一時之間,成個海連一條墨魚都釣唔到。

又過左一陣,CC都加入了戰團,佢用一支短竿,綁隻假餌落海,Dum 下 Dum 下,一個唔留神,連隻假餌都Dum 埋落海。據當時人稱,當時有一下巨大既魚訊,之後隻假餌就 Certify 左! 科大對出D墨魚果然唔同D! CC 再接再厲,再綁過另外一隻假餌再次搏殺,不過D 讀過書既墨魚又點會 so 佢丫。

而青蛙條友仔已經心灰意冷,將手上面既魚絲放晒落底,唔知佢攪邊科。突然之間........... 青蛙既手電響起,原來係 A 船既 Jorden 問及釣況。正當青蛙同 Jorden 吹緊水之際,Le'Dan 見青蛙既手絲有異動,就一手搶左佢個手排收絲。臨上水之際,點解呢條野唔識噴墨咖呢? 再睇真D,原來一條兩只手板大既紅衫魚比青蛙條絲個勾擢中 (手板以 CC 十五個月大既囡囡為準)。真係冇天理,可能條紅衫讀書小,所以先慘遭青蛙既毒手。

剛才持竿既CC 突然間好鬼緊張,唔通佢今次又唔見多一隻假餌?? 原來呢一次佢真係有料到,一隻大墨魚終於比佢勾中。因為佢係持竿去釣,所以手感比手絲跨張左小小,各人見佢驚死比條墨魚走佬,當噴完一次墨之後就的佢上水。哈~哈~! 終於有料到喇!

當時海面又唔知點解有一大班墨魚遊近,跟住又唔知點解落起雨黎! 再跟住又唔知點D墨魚又走晒去避雨。好似咁既情況出現左好鬼多次,次次都係開始有料到既時候就落雨。迷信既釣友都認為係因為十五擊過期黑氣未散,直接或間接拖垮左成個釣場。查實呢D唔係迷信,跟據好多數據既分析,個過期黑仔真係黑到貼地,所以呢個推斷都極具科學性,因有有實質數據支持嘛! 嘿~嘿~!

再過左一陣,可能係架船飄離開 "過期野" 隻船,所以青蛙就趁機起番一條大墨魚。條墨魚臨上水之際,有另一條大墨魚走埋去睇熱鬧,幸災樂禍一番,結果唔覺意比阿青蛙勾中埋。不過隻青蛙當時睇唔到一箭雙鵰,仲度攪左一陣,結果比條誅事八卦既墨魚走甩左。

另外一邊既情況又點呢? 嘩! 非常密口播.........D 釣友! 原來到左果陣好多釣友同埋家屬已經放棄,而且已經進入完全忘我吹水狀態。 "電波精神,吹水頻頻" 可見一斑!

到左最後一刻,另一位電波家屬亦不甘示弱,一手中左一條加大碼墨魚,條墨魚亦係全船最後既一條。埋單計數,Le'Dan 既釣獲佔全船總釣獲既20%,共有兩條之多。 而最多釣獲既係一名電波釣友親屬,佔總釣獲既30%之多。有咁既釣獲,真係聽者恐慌,聞者逃亡 ! 哎~~~!

差唔多完場既時侯,船家問我地整唔整黎食。我地異口同聲都話要整,不過平爺千叮萬囑,叫船家切細舊D,最好切埋絲。而 Le' Dan 更提議不妨切粒,如果唔係點夠咁多人食丫?! 哈~哈~!

唔使幾耐之後,一碟新鮮墨魚就出現大家眼前。再唔使幾耐之後,一碟新鮮墨魚就消失大家眼前。因為數量實在太小,加上有電波消化菌在場,碟墨魚可以捱到半分鐘已經好難得咖喇!

掃完一大碟墨魚 (一大碟加小小墨魚) 之後,大家就懷著興憤 (又興又憤) 既心情回航。

人地話 "十個電波,九個帥哥",我就話 "十個電波,九個口水多"。回航既時侯,船外面風平浪靜,船上面波濤起伏,水吹過不停也!

十六擊活動 B 船既報導到左呢度又告一段落! 多謝各位支持電波活動!

 
 
< 前一個   下一個 >