Menu Content/Inhalt
首頁 arrow 釣遊 arrow 岸釣釣遊 arrow 電波欲蒲團

誰在線上

線上沒有任何訪客

線上人數

電波欲蒲團 列印 E-mail
作者 拉丹   
2000/12/30, 星期六
文章索引
電波欲蒲團
頁 2
頁 3
頁 4
頁 5
頁 6
頁 7
頁 8

 

(二) 一時人山人海、一時水盡鵝飛    文 : Le'Dan @ Jan 2001


碼頭場面一度混亂

估唔到,佢真係...........今次冇玩野、公公道道,按照協議去收費。雖然做生意老實係應該,但係佢不嬲個底唔多好,而今次終於有改善,所以都值得我地一讚。

架船開左半粒鐘之後,終於到左蒲苔島碼頭。一到步,老規舉釣友無分彼此合力將所有帶黎既物資搬上岸。連人帶貨,碼頭場面一度混亂,因為呢一擊都有四十三人參加。以通頂既擊類活動計,今次都算係最多人既一次。有幾疊馬? 睇下相啦!
 

呢一擊都有七位女釣友參加,總算唔使次次擊都係陽盛陰衰。雖然比例都係小,不過都係一個好既開始。

影完集體相之後,碼頭邊有隻小艇咁岩經過,有部份釣友就走去勾搭個船家,希望可以以一個平平地既價錢車佢地出去靚靚磯位釣番轉黃昏水。斟左一輪之後終於斟掂數,於是大約十幾個磯佬就分兩轉車去唔同既磯位作釣。

有部份釣友就碼頭開營,等夜晚唔使路宿街頭。因為蒲苔島碼頭正常黎講唔會再有街渡埋,極其量只係有三幾艘遊艇接載遊客去食海鮮,而我地營又唔係開正路中心,所以雖然好霸道,不過絕對唔會影響倒其他人。唔使幾耐,碼頭上面已經有三個營幕搭好。

與此同時,有幾位釣友就走左去天后廟對出既石邊試釣,而後守碼頭既釣友就已經開緊工搵食。有人玩筏釣、有人玩投釣、有人玩手竿釣、有人玩擬餌釣、有人玩睇人釣、有人玩唔釣,各適其式,全完合符電波活動自生自滅既宗旨,冇令大會黑手失望。

走既走、散既散,一時人山人海、一時水盡鵝飛,碼頭又回復平靜。我所指既平靜,唔單只係環境,而且仲包括左魚訊。因為碼頭係直落式設計,所以冇位比魚棲身,相對有樁既碼頭,釣獲同魚訊都一定係掙咖喇。當時碼頭邊真係魚仔都唔多條,估計到黃昏前都全碼頭都唔夠三十條小魚上水,而過手板既魚就梗係影都唔見啦!


KK 原來都係一減七釣法既高手

當時浪花借左支筏仔比一個從未試過筏釣而又初黎報到既女釣友 KK 。KK 當時坐我側邊,唔使幾下手勢就中左魚。冇幾耐,佢又中! 如是者,我就做左魚僮幫佢上餌解魚。我心諗,原來佢都識釣技最高層次 --- 一減七(-6)釣法,真係失覺晒! 哈~哈~!

而我呢? 我當時就蕉氣勃勃,連魚毛都唔吼,點解呢? 不其自然另我諗起一句歌詞 "亳無魚訊不可思議心中一想又蕉過"。呢句歌詞係我當日將卡通片叮噹既主題曲重新填詞之後送比侯活既一份小小心意。

 

★【唔掂檔】
填詞: Le' Dan(原 曲 : 叮 噹)
侯活又再嘔白泡,講起釣獲必糟糕,
無窮嘗試不可改變,搓下波仔期望轉好
魚餌夾在誘餌裏,想必釣獲可增高,
毫無魚訊不可思義,心中一想又蕉過!
想得到過斤的魚,成世釣唔到 !
你睇,又冇魚食佢舊餌喇! 哈...哈 ...
侯活啊,何解只得你!
爆粗更在嘈.....

講起侯活,我就知道我點解釣唔到魚喇。因為侯活當時坐我附近,好衰唔衰佢又用同我一模一樣既筏竿(望爛海)作釣。傳說中侯活用咩牌子既釣具, 種釣具就必定釣唔到魚,呢係宿命,無人可以改變倒。早排我去三杯酒艦釣,當時侯活手持望爛海坐第二隻艦作釣,佢隻艦一飄埋黎我支望爛海就即刻冇晒魚訊。而廿二擊又係呢個傳說既另一個鐵証! 所以我對呢個傳說深信不疑。嘿~嘿~嘿~!!
 


堅勇,太陽好唔好味呢? 哈~哈~!!

釣下釣下,堅勇可能蕉得緊要,所以佢隨手執左個太陽手玩。玩下玩下,可能覺得有肚餓,就開口吞左個太陽落肚。

大會安排左七點鐘島上既酒家食晚餐。由於太陽比堅勇食左,成個天即刻黑晒,我再睇一睇隻錶,原來已經係七點鐘,又係各釣友開口既時間喇! 不過我當時唔死心,無理由一條魚毛都釣唔到?! 我仍然堅持釣多一陣,點知都係無魚訊。算啦,唯有得食完飯再繼續啦! 於是我收絲一抽,唔覺意比我中左一條石狗,唔通真係近朱者赤、近-6 者-6 ?? 哈~哈~!

我一路收竿既同時,Rayrol支筏仔黎左一下好堅既魚訊。Rayrol 見時機成熟,咩都唔講,狠狠就一抽。中喇~! 中喇~! 終於唔單只有番見得下人既魚訊,而且仲比阿 Rayrol 抽中。見阿 Rayrol 左就右就,條魚既拉力都有番咁上下,Rayrol 只可以就,唔可以死頂。在場釣友估計條魚必定過斤或以上,所以即刻周圍搵撈箕。大鑊! 碼頭當時所有撈箕都未開,於是釣友就急急忙忙去開撈箕。過左一陣,撈箕已經開好,但係阿 Rayrol 仲係同條魚搏緊老命,見佢又頂又拉...........


 



 
< 前一個   下一個 >