Menu Content/Inhalt
首頁 arrow 釣遊 arrow 岸釣釣遊 arrow 電波欲蒲團

誰在線上

線上沒有任何訪客

線上人數

電波欲蒲團 列印 E-mail
作者 拉丹   
2000/12/30, 星期六
文章索引
電波欲蒲團
頁 2
頁 3
頁 4
頁 5
頁 6
頁 7
頁 8

(三) 攪飲食    文 : Le'Dan @ Jan 2001


電波指定 GAS 爐

Rayrol 仲係同條魚搏緊老命,見佢又頂又拉,一個唔留神比條魚入左石,可惜最後都係斷絲收場,否則食飯前都有條過斤魚睇睇。

於是,我同Rayrol就執埋晒釣具跟手再閃去島上酒家開餐。碼頭上點解仲有幾個人唔動身咖呢? 細問之下,佢地冇打算去酒家食飯。原來電波廚神浪花大人為釣友 David、Loren 同埋KK 打算留碼頭打邊爐。好,果然夠晒電波feel,充分表現出自生自滅既精神。

浪花呢個GAS爐真係幾好用咖,兩舊幾水一個,可以用平時屋企打邊爐用既GAS。一樽氣又可以燒幾粒鐘,真係釣夜水既極品,所以已經被釣友列為電波指定GAS爐,值得推介。

浪花帶黎既食物份量都好鬼多,據消息人士透露,淨係餃子都有成七八十隻。有時真係懷疑我地到底係去路營定係去釣夜魚呢? 次次通頂釣局都係攪飲食,而且次次都攪到有聲有色,又有排骨煲仔飯,又有 Coffee or Tea 任君選擇,你都咪話唔寫意丫! 見到佢地打邊爐,我就開始有肚饑,都係拿拿林閃去酒家醫下肚先。


開餐喇!

一去到酒家,已經有十幾廿位釣友灘左度等開飯。坐定定之後睇睇餐牌,見佢炒粉麵都係四十幾蚊碟,而加大都係五十蚊碟,所以我地見唔係好貴就同個小二講: "餐牌上面所有既炒粉麵飯既款式都比一碟加大既我地" 。係咪好豪呢? 其實唔係我地豪氣,只不過係餐牌上面只有六款炒粉麵,所以我地冇其他選擇既情況下全部掃晒。

岩岩叫完野食,坐左船出去兩 Team 磯佬都到左酒家。Loren 首先向大家匯報釣獲只得石狗公兩條,而另一 Team 磯佬就衰到連石狗都冇。唔通呢擊真係蕉得咁緊要? 唔會既 ! 上年中既過斤魚都係入夜同埋早水中既,都係快快手手食飽飽去搏命先。


好大咬丫! 好密口丫!

唔知係咪好似電視節目話齋因為時間既關係酒樓已經預先整定左碟,唔係唔會咁快手就上第一碟炒粉麵咖播。唔好理喇! 都係醫肚最實際。於是我向同既釣友講 "大家飲杯",但係當時我已經左手執碗、右手執筷,手快口慢,一路講,碗筷就一路向前衝。雖然同既釣友好多都有哎 "飲杯~",但係出面筷子已經此起彼落。手持水杯等碰杯的新釣友見到勢色唔對,都即刻底隻杯,立起碗筷出去搶埋一份。當第二碟炒粉麵到既時候,大家都齊齊哎 "飲杯~飲杯" ,不過當時成已經冇一個人會杯喇? 哈~哈~~~!

食飽之後,我睇到年少氣盛、血氣方剛既阿旺不時向企酒家魚池邊既阿婆眼金金。過左一陣,阿旺終於把持不定走向阿婆面前問價。阿婆當時冇覆阿旺價,只係陰陰咀笑,而且不斷點頭。阿婆當時既表情已經出賣左佢自己,佢面部表情仿佛話比在場既所有人知佢好耐都未試過欺騙無知少男。過左一陣,我就聽到佢地交易既金額係四十蚊。

聽者心酸、聞者流淚既一幕終於上演,一個大好青年就咁比一個年過半百、見者恐慌、聞者逃亡既阿婆握左! 真係世風日下! 道德淪亡! ........ (待續)

P.S. 到底我當時有冇上前阻止佢地交易呢? 成件事既經過又係點咖呢? 欲知後事如何,請看下回分解吧!



 
< 前一個   下一個 >