Menu Content/Inhalt
首頁 arrow 釣遊 arrow 岸釣釣遊 arrow 電波欲蒲團

誰在線上

線上沒有任何訪客

線上人數

我們有 1 位訪客在線上
電波欲蒲團 列印 E-mail
作者 拉丹   
2000/12/30, 星期六
文章索引
電波欲蒲團
頁 2
頁 3
頁 4
頁 5
頁 6
頁 7
頁 8

(五) 男人最凍     文 : Le'Dan @ Jan 2001

一抽之下覺得好重手,一定唔小野,於是我用去頂,頂到我支竿成支U晒,而當時我條4號主絲就扯到直晒,而且比風吹到鬼殺咁嘈。到底我中左咩呢? 的左幾下郁都的唔郁播,極有可能係中左魚之後條魚入左石。等左十幾分鐘希望條魚游番出黎,點知佢仲好耐性過我,於是唯有用我既絕招 ------ Kamcholier (鑑粗呀)。


電波熱咖啡 ~ Take 1

唔抽由自可,一抽之下我支投竿就啪鬼最頭果節。而最後就用人手將魚絲收番番黎,好彩鉛同勾都冇捐失,都唔算係 Total Loss! 可能支竿比我打左入冷宮好耐,計計下都差唔多有兩年冇用過,而且又係質料普通既平價野,所以我估久而久之支竿變得好脆,幾乎掂都會散。炸左呢支竿係我岩岩釣魚果陣既第二支竿,果陣對魚竿既冇要求,求其可以用得就算數,但係釣下釣下開始有自己既喜歡既調性,所以就好小用支竿去釣,炸左呢支竿都未嘗唔係一種解脫。太好喇,又可以有藉口買過支最岩我自己調性既新竿。

由於我帶黎其他釣竿都留晒碼頭,一來一回都要成廿幾分鐘,極之山長水遠,而且當時夜嘛嘛,島上又唔知有冇女色狼,一個男子上路都幾危險,有咩事大聲哎~~ "唔好" 都可能冇人聽到,所以局住用炸左既竿再釣。雖然話一寸長、一寸強; 一寸短、一寸險,但係好過騰番去碼頭總部。

如是這我繼續釣,但係當時釣點開始起風,唔知係咪堅勇較早時張個太陽食左既關係,攪到當時既氣溫急劇下降。一個鐘凍過一個鐘,而釣場既釣友都一個一個咁閃左上去天后廟避風,閃既閃、撇既撇,到到三點半只係剩底我一個傻佬仲坐釣點度食風。我孤伶伶咁食多一個鐘寒風之後,一來唔想變成雪人,二來寒風真係 un-頂-dable (不能頂),我終於都閃埋上去天后廟。


電波熱咖啡 ~ Take 2

上到去,原來天后廟都唔好得好多,依然都係咁凍,只係勉強可以擋到 0.5% 既強風。據聞堅勇會天光先吐番個太陽出黎,死啦! 離天光仲有兩三個鐘,長夜漫漫,真係唔知點算。當其時,我個袋入面有個Gas爐,雖衰冇帶 Gas過黎釣點,唔係都可以生個火頂得兩野丫。同在場釣友閒聊之間,我呻左幾句,突然間身邊既Tigerman 話佢身上有Gas 播,於是我地就即刻開個Gas爐黎取暖。雖然個爐唔係好暖,但係心靈上總算有安慰。過左一陣,Tigerman同Rayrol唔知邊度左幾罐咖啡出黎擺上個爐頂煮熱咖啡。


廟前既乾柴、烈火
又過左一陣,風勢好似又勁左,雖然唔知氣溫有冇進一步下調,但係肯定個個都比起先前又失左唔小體溫,所以變得越黎越凍。可能有網友唔知我地點解叫 "電波釣友",電波一詞其實取自前幾年香港播出既 "電波少年" 一個電視節目。節目入面依騰同超人兩位電波少年經常都要街、油站,呢種唔衰黎衰既街精神正正就係我地經常掛咀邊既 "電波 feel",而電波釣友既電波一詞,都係咁引申過黎咖咋! 我都有好耐未試過咁有電波 feel喇!

越接近黎明果陣就越凍,當時真係想講句黎明請你不要來,不過唔知在場既釣友有冇Leon既fans度,所以安全起見最終都冇講出黎。諗深一層,只要見到黎明之後就會冇咁凍,於是我心入面又學黎明既fans咁哎 : "Leon~Leon~我地支持你" ~ 如是這哎左一陣,哎下哎下唔知點降哎左"Leon~Leon~我地支持你.......唔住",男人最凍、男人最凍唔知算唔算這種。


火呀!
信主得救? 信主係咪真係得救我唔敢去討論,但係我可以好肯定咁同大家講 : "信網主一定冇得救"。好彩當時在場幾位釣友都同我一樣唔信網主,所以咁凍既時 我地終於有救。在場既 De'Edd 唔知邊度班到個鐵桶仔返黎,佢再走去山邊執左一埋枯枝、憑我地平時討論區扇風點火既功力,唔使幾耐,乾柴、烈火既情境就出現左廟旁。好彩當時冇咩滂沱大雨、冇咩雷電交加、雖然風大,但係總算冇將附近既小花吹落地,總算謝天謝地。就係咁,幾位釣友就渡過左一個發生廟前既一個乾柴、烈火既黎明。

到到差唔多朝早五點半,個天開始光,我地遠處望到碼頭總部既磯釣釣友已經準備好出發,希望佢地好似上年既蒲苔之旅一樣,釣多幾條大魚啦! 氣溫都開始止跌回升,我又係時間再接再勵,再次出動釣番個早水,睇下有冇大魚岩岩醒濛下濛下唔覺意比我釣到先! 其他在場既釣友亦先後出動,作最後既努力,希望打破 電波出礁、十出九蕉既 宿命!

早水果然係早水,在場既釣友投出去無耐之後,就............



 
< 前一個   下一個 >