Menu Content/Inhalt
首頁 arrow 釣遊 arrow 外礁釣遊 arrow 電波削友初探白瀝水域

誰在線上

線上沒有任何訪客

線上人數

電波削友初探白瀝水域 列印 E-mail
作者 電波釣魚網   
2001/10/20, 星期六
《電波削友初探白瀝水域》
日  期 :2001年10月20日 (星期六) 至 9月21日 (星期日)
時  間 :20 日 14:00 至 21 日 10:00
釣  點 :白 瀝、萬 山 一 帶 水 域
釣  法 :磯 釣
釣  手 :AL、亞禧、剛哥、阿然、阿璣、了神、Vampire
釣  餌 :南 極 蝦、青蟲
釣  獲 :細鱗、白毛、幽面、絲、白、火點
AL與白

 

(文: Vampire @ Oct 2001)

  哈哈!今次好高興又再有機會同電波友一齊去釣魚,果日約亞磯同亞然2:00pm係灣仔發記買粉同難食蝦,順便食埋飯,其他人就直接四點到西環等,而今次用既粉就聽亞磯講用Chinyu Power + 蜆粉同三磚難食蝦。

  食過飯後,就坐的士直去碼頭,到達時其他人還未到,不過好快亞了、剛哥、AL同亞禧等就歸位,大家等船之際,談論梗天氣不太好,出面吹梗五六級風,唔知出唔出到去及能否上到礁,就算上到去,都可能好難釣,心諗死啦!第一次出外礁,唔係咁對我呀!真係削!終於隻船黎啦,唔理咁多,分工合作搬野上船先!

  Oh!出發~~~~今次坐既船有四百匹,應該都好鬼快,但由於風浪太大,隻船亦慢落黎,最後終於都到達目的地,首先上礁既係亞然同亞禧,跟著就到我亞了同亞剛哥,我地搵個內灣位,背東北有山,面向西南有海,希望可以避開D風啦!聽AL講,上次佢黎依個位,釣十八尺比人姦四口,希望今次有景啦!

  上到去已經五點幾,周圍睇睇先,左面有一塊平台石向東,對出D位望落好正,可惜食正風,唔駛諗!行番去中間,係一堆斜石直入海中,本來都幾理想,可惜食哂左邊既浪湧,仲上埋浪,好危險,所以skip埋,去番個上船位睇睇先,無風無浪,只有少少湧,而且記得AL講,就係依個位比魚姦,身為滿有正義感既我,梗係唔可以比依D事發生啦!好,等我佢復卓啦!嘻~~~其實右手邊仲有位可以釣,但係要攀山涉水,所以我放棄!既然搵好位,就梗係快快手開誘餌同釣組先啦!

  今次既釣組我set4B DUEL浮波(自重較高果隻) 3B水中五尺3號子加1B夾鉛,而竿就用DAIWA中通離島大物1.5號,希望減少風既影響啦!第一口餌用青蟲試試先!等呀等,等呀等,個波飄呀飄,連續幾竿如是者都係冇魚訊,跟著仲掛埋底,真削!跟著調番淡D,釣十五尺,跟著黎料啦!個波拉下拉下咁!心諗又掛,唔係卦!一抽,中呀,有少少重量喎!唔郩既,唔理咁多,收上黎先算啦!再抽!上水啦,飛梗過黎啦,望真D唔係魚黎喎,鮑魚……………..擦,嘩~~~~~~~海黎!!!我閃!!!好險!!! (P.S.隻海係勾咀,抵死!) 天黑lu! 都仲係零魚訊,慘!而且D湧仲愈黎愈大,仲黎埋落山風,無奈!咁唯有休息一陣先啦!

  好!再黎過,用番難食蝦先,咁又繼續再等呀等,個波又再飄呀飄,都唔知收呀放呀投出幾多次,天呀!點解咁對我呀!唔通我比人落大龜咒,出到咁遠,外礁喎!都礁!經過我一輪發皮四後,都無氣啦又無mood!差唔多9點幾,魚唔食餌人都要啦!咁我同亞了就開爐煲水,煮杯麵食,一句講哂,正!釣夜魚都可以食到D咁熱辣辣既野,簡直係人生一大享受,之後飽暖就梗係思床祳,訓陣先!

  訓到差唔多十一點半左右再釣過,可惜都係一樣削,其實係睇浪多過釣魚,嘩!!!!!浪又黎啦!我地就愈企愈高,D浪就愈黎愈勁,各位釣友,記住呀,出礁一定要有磯鞋同救生衣,如果唔係,一個走避不及,沖落水,真係好危險!安全第一!老實講,我已經進入放棄狀態,唯有等天光睇下天氣會唔會好轉啦!果時大概一點到,而亞了同剛哥就轉磯為投,但係風浪實在太大,根本就睇唔到魚訊,又係人餌時間 Lu,食飽野當然再訓啦,訓訓,聽到尖叫聲喎!有人中魚?聽真D,係吱吱聲,唔係 fa!開頭燈睇睇先,唔睇由至可,轉頭一睇時,一隻黑濛濛,手板咁大既老鼠同我對視,哈哈 ~~ 我仲勁!唔知幾時師父上身,一個蜈蚣彈180度轉體釘地站立,再黎個高橋跑石法,諗番都要讚自己呀!但係 Miss周亦都冇放過我,不斷急call,無法啦!搵個高D既位再訓過,希望可以避過D小米奇啦!(果時大概三點到)

好開心第一條白毛

  周公個女真係好鬼好客,一訓就訓到六點幾,起身再釣過先,D風同湧真係細左喎!但個上船位依然係一樣,釣多幾口餌,亞了就叫我過去佢個邊,話有魚喎!反正我依面冇料到,過去偷魚先,而釣組方面亦有少少改變,一樣係4B浮波,今次冇用水中,用4B夾鉛,2號子3尺長,Total釣十尺深,第一口餌一落已經有魚訊,不過就好精同好細口,一抽就中,但係收到埋岸邊時走口,好彩唔係好大條!唔緊要,再黎過,你睇到嘛你感覺到嘛 ? 我個小宇宙燃燒梗啦!哈 ~~ 再落 ~~~~ 冇喎!等等,隔離亞了中魚喎!正當佢上魚之際,我又中喎!嘻 ~~~ 掂!一人一條手板金絲,如是者一條兩條三條係咁上,都幾正!不過唔大條最衰,跟著起條幽面,真係幾好片,拿拿聲打多兩棍誘餌先,再上多幾條金絲,黎多條白毛仔送既,原來毛毛真係食浪口位架,我本身都冇諗住釣佢既,但當我收到埋岸時,佢好狼咁衝出黎食,仲拉竿tim,無法啦!呵~~~~~~佢係我第一條毛黎架!跟著釣多一兩條已經夠鐘要走,D誘餌都好用哂!總括今次釣魚有D天不造美,只釣得兩三個鐘,如果唔係相信釣獲會再好D!

(文:阿禧 @ Oct 2001)

  自從上次大小鴉中到條小牛屎比我知道乜野係魚之後 , 巳經有成個月無釣過魚喇 . 到今個星期收到團長同一號電話 , 當然第一時間應承話去喇 . 到出發當日 , 由於公司太多野做 (又要去買干炒牛河上礁食) 所以攪到約左團長都遲到 . 到上的士之後團長問我買蟲末 , 如果末買就打電話落天后發記訂埋 , 咁有咁方便我當然話好喇 . 之不過團長打電話落去一問下 , 原來難食蝦同青蟲都已經冇晒 , 不過好彩團長一早以經打電話訂六磚蝦 , 而其他幾磚就一號係灣仔攪掂 . 不過蟲就無法囉 . 到西環上船位之後原來大家都以經到晒 , 不過離上船時間重有兩三個字於是我就個牛河出食 , 之後大家影相上船 .. 出到海之後因為太大風大浪關係去唔到原來釣點 , 所以就車左去第度而今次我同一號上左個靚釣位 , 一上到礁唔好講笑第一時間開誘餌開竿不過由於太大風釣一個鐘到就決定休息一下 , 到風細之後已經成八點幾 . 咁一於再釣喇 , 打幾下誘餌之後 . 嘩 !! 乜事咁勁記 . 一抽 , 中 , 收收收收收嘩比一手先再收 , 細鱗呀 !! 不過大件事末試自己撈魚 . 無法喇點都有第一次 , 響一條魚要撈四五分鐘情況之下斤庄細鱗上水 , 好解魚之後再落餌十幾分鐘之後又中今次好好多囉 , 因為有一號幫我撈魚 , 上水係磅庄細鱗又再落餌不過之後都冇乜魚訊 , 所以又休息同食埋個牛河下半場 . 之後再作釣不過由於太大風 , 所以就釣半粒鍾停一個鐘 . 之後見到一號開始礁上生火 , 原來一號響礁上煎午餐肉 . 電波攪飲食真係有一手 .

    而我就有 G 神響碼頭比我杯麵加一號  脆皮午餐肉 . 嘩 !! 從來末試過響礁上咁溫飽 , 食完野 D 風重末停所以就開始眠一眠 , 眠醒之後以經五點到 , D風無停過不突止 , 重好似大添無法喇自己又爛釣 , 所以就比 D 浪洗住面釣 .. 不過D魚可能知到我努力 , 所以就比我釣下喇 . 因為成晚無釣過魚 , 所以袋誘餌重有好多 , 咁我就一次過打左十幾廿下誘餌過左十幾分鐘後一條斤頭絲立上水 . 再過十多鐘一條磅頭雞魚上水原來打多 D 誘餌真係有用 .. 於事放底支竿一次過打晒全部誘餌落海不過過左十幾分鐘都無乜料 , 正當轉身"不"誘餌之制 , 咦 !! 重乜枝竿自己飲水 . 咦 !! 我個浮波呢去邊呀 ? 一抽勾石 ? 嘩唔係呀 !! 會走 . 收收俾俾又收 , 見到喇斤幾白立呀 .. 咦我個撈箕呢 , 唔係呀嗎 . 轉位冇撈箕 , 一號救命呀 .. 正當我想叫撈箕之制 , 一號已經個撈箕 Zoom 落海 , 而條白立又好似鍾意我個撈箕咁 , 自己游入去 . 好上魚之後 , 擺個遠矢國利姿勢影相 .. 釣到目標魚之後放血收竿等船走 .. 不過等到過晒鐘船家都末到 , 正當諗緊之制見到個船響遠處黎到 . 上船之後聽船家講原來出面好大浪 , 所以遲 . 齊人之後回程返香港 ..

今次要再次多謝團長安排 , 一號脆皮午餐肉同G神杯麵 ..

(文:AL @ Oct 2001)

  今年度的白立釣期早了到來,因海水溫度以比夏天時凍了三至四度,大東北風又吹了幾次,這樣應有一些在深水排的白立以開始迴游到達磯邊。這樣就同電波釣友去外礁試試,萬山至白瀝一帶有很多釣白立的釣點,只要天氣好機會也會高。但是當日風和浪都很大,應在六級左右,只可上一些內灣背風釣點。今次同生仔璣上一個位,大風大浪又玩過夜,有個PARTNER都是好事,釣不到魚還可吹下水 ... 上到礁時以是下午五時有多,看看釣點水色很好,水深一竿外一定超過二十尺以上。釣竿一號、主線三號、子線二號半、金色立鉤三號和小形1B浮標,釣約十六尺深 (這在我來說是釣白立正常標準)。好快開好誘餌試試先,水流很小,腳下十尺水深這裏有礁石成梯級型,釣約十尺外,打多兩下誘餌先,以到六時左右,開始有小魚吃餌,釣深多兩尺約十八尺深,誘餌打輕小小分開小魚同目標魚泳層,立刻中魚,有小小力水30秒後上水,34cm級一斤四兩小白立,吃餌明快,應不只一條,有可能是磯頭也應有些大 D SIZE。

  打多幾下誘餌去遠些約一竿外等D立吃下誘餌先,放好小白立後慢慢再釣,釣餌放在十尺外左右,打幾下誘餌在腳下。因為小白立活性大多比大白立高些,這樣就希望利用打誘餌的時間不同把大小白立也分開,大白立垂直游上吃餌時間大多慢過小白立,這樣小白立先行吃打在腳下誘餌,大白立就在慢些少游上吃誘餌的中途裏吃下釣餌,用這類誘釣不同步的方法大多可在一磯頭立魚中釣到比較大的(老實說在我而言,誘釣同步以經不會用於釣磯頭立中最大的)。做了兩次同樣的手法,十分鐘後就有魚訊,吃餌不明快,小浮標只是從外向內慢慢地走,走到腳下就不見了,中 !!! 中了後很重,還向外走,連放三下 LB 之後以走出二十米線到了安全地帶,在這不放它了 , 走左走右上上落落三至四分鐘後比生仔璣用撈箕.......上水了,一看是白立 over 50cm 級四斤四兩。之後浪口變大,先前釣點以不可再釣,全晚都以很小再釣魚,只釣多一條五線火點及細鱗。生仔磯就中多條細鱗而又比魚在晚上強了一野 ... 看來這個位中的都是好魚,這樣又多了一個老家呢?

 

釣友剛哥
G神風采

 

G神雄姿
出發前大合照

 
 
< 前一個   下一個 >