Menu Content/Inhalt
首頁 arrow 釣遊 arrow 岸釣釣遊 arrow 直壆搏大霧保釣報告

誰在線上

線上沒有任何訪客

線上人數

直壆搏大霧保釣報告 列印 E-mail
作者 電波釣魚網   
2001/04/16, 星期一
《直壆搏大霧保釣報告》
日  期 :2001 年 4 月 16 日 ( 星 期 一)
時  間 :0730 ~ 1730
釣  點 :西 貢 灣 仔
活動團友 :

預先報名 :
黑手十九, 黑手浪花, Snoopy, Leo, 震震王, DeEdd, 老虎, 肥仔耀, Allun, 高原CKF, 某某, 威威三父女

白撞團友 :
威威個細女, BigCat, 花尾躉, 威鱸, 小鬼馬, 老虎細妹兩公婆

白撞團友 :
Killer

釣  獲 :沙鑽, 連米, 石狗, 老泥大咬, 池仔, 疏蘿, 雞泡, 鼠銜, 赤  (仔).......

 

文 : 山本十九 @ April 2001

集合時間:0730西貢巴士總站
集合地點:西貢巴士總站集合及解散

話說廿二擊做過助理黑手, 坐隻呠呠船由 "黑氣石碼頭" 開去 "龍眼莊", 途中經過 "灣仔", 見到有條好正o既直駁, 心諗條駁咁正, 有得玩啵, 不如下次搞次偷釣都好..... o係咁o既心態之下, 我就開始收集 "灣仔" o既料, 同埋試o下聯絡車船, 跟住就推出呢個 "直駁搏大霧保釣團" o勒.....

由於要叫 P4 艇駁腳, 一隻 P4 坐得幾多人, 就大家都知, 所以最初構思, 係有限人數, 只限我有提及過會有偷釣活動o既釣友兄弟姊妹, 係唔想太過混亂, 同埋容易照顧安全..... 點知...... 哎, 唔好講!!!!!

當我出o左行程表, 就有唔少我冇邀請o既釣友問我可唔可以白撞, 我本著言出必行o既一貫作風, 婉拒所有有心白撞o既釣友, 最後 confirm o既釣友連大夾細有一十五名, 兩隻 P4 o岩o岩好, 雖然少少超載, 但係都係o響安全範圍之內.

由於船家有個忠告, 話早o的上船會好o的, 因為怕o左查船, 咁我地就倒塔咁早 (0730) 就集合.

Leo 仔鬼咁有心, 開架車o黎接我 (其實佢係o響半威逼之下, 無奈地做o左一o的遺心o既o野......), 停好架車去食早餐, 點知, 就見到第二個白撞人士 ~~ BigCat o勒..... 至於第一個係乜水???? 咪就係威鱸囉..... 我上車o個時, 就見佢大模施樣咁坐o左o係度, 唔通我趕佢落車咩......

叫o左個早餐, 趁住o野食未上, 走出去買魚餌先...... 點知, 又見到條白撞花尾, 同埋個司機F一齊, 敝.... 都唔知會有幾多個白撞o忝..... 佢地話已經食o左o野, 咁就質o左個水桶仔俾佢兩個, 買o野..... 哈..... 唔駛做 "牙"?????
 

三扒兩撥食完個早餐, 飛出去買食水人餌, 即刻到位排隊等 94 號巴士, 原來係 0800 同 0900 有車, 一邊等車一邊等人, 架車未到, 人就已經到齊, 一點之下..... 眼前一黑!!!!! 原來一共有 "十九" 個人咁多 (詳細人物, 請睇白撞名單)....... 慘!!!!! 唔知初一哥肯唔肯車o忝o架...... 隻老虎即刻話 : "冇有怕, 唔係十九, 係廿一.....", 因為佢細妹兩公婆已經入o左 "黑氣石碼頭" 等緊喎...... "砰"..... 有人暈o左, 跌o左o響馬路邊......

因為我早一日囉唔到禁區紙, Leo 仔架車只可以泊o響北潭涌停車場, 上返大隊架巴士, 一齊入去..... 去到總站落車, 真係見到老虎妹同埋老虎妹夫..... 齊人, 廿一件!!!! 初一嫂一馬當先, 同我講話多個未算多, 收我十六蚊一程, 咦...... 平o左幾蚊雞啵..... 原來, 佢兩船同我搞掂, 超哂載呀, 大姐!!!!!

十分鐘左右, 就到o左灣仔, 真係好正。灣仔有完善o既露營設施, 有草地 (多餘!!!!), 有個大亭 (更多餘!!!!!), 有淡水, 有廁所, 最緊要就係有沙灘, 有直駁, 有出水石, 有石駁, 嘩, 真係投磯手筏打, 各適其適.......

重講o野???? 開竿喇....... 我地一於秉承電波一貫精神, 自生自滅!!!!! 我就同 Snoopy, BigCat, Leo, 花花, 威鱸去右邊個沙灘, 一於玩一陣 Surf Casting 先, Surf Casting 係我其中一樣好想玩, 但好少機會玩o既o野, 之但係唔知點解, 投極都係 "蕉氣蓬勃", 我只係中o左一條雞仔, 係雞泡仔, 唔係雞魚仔..... 重有一條沙鑽, 威鱸就有幾條沙鑽, 反而 Leo 仔, Snoopy 同埋 BigCat 就中o左我地今次o既對象魚 ~~  o勒..... 重係赤  o忝!!!!!

其他人就有o的玩直駁, 有o的去o左左邊石駁出水石o個邊玩投同埋磯. 有消息傳過o黎, 話石駁o個邊好好魚, 咁我地又走過去試o下, 又俾我中多條大沙鑽, 都好, 但係目標魚就一條我都上唔到!!!! Katy 妹妹就真係醒過佢老豆好多喇, 手竿上魚, 一手都唔肯唔俾, 打廿幾個八字, 一於玩殘條魚至上佢水, 原來係手板大細o既連米, 好好力水o架.....

又到開餐時間, 返去大本營, 囉個 "屎餅" 咁樣o既面包出o黎, 食o左佢 ...... 隻老虎同埋 Leo 仔差o的一手搶o左我個午餐, 話 : "好多o野, 食唔哂, 你一齊食喇....." 嘩, 係鐵板燒!!!!! 有肥牛喇, 有醉雞喇, 有鮮菰喇, 有豆腐乾喇, 有牙菜喇, 重有油麵...... 正!!!! 咁我唔客氣喇!!!!!

食完個靚靚中飯, 都成兩點鐘. 個太陽伯伯又當頭晒, 又唔記得帶埋個緊勇o黎, 唯有走埋個企駁, 試o下落入得唔得. 用隻蟹仔試o下試o下, 試o左半粒鐘, 唔掂!!!! 見到隔離有 pair 好似情侶檔, 連連勁起老泥, 咁我都試o下喇, 橫掂乜都起唔到....... 開枝 "打石狗棒" 3米6, 串好 "兩人行" 漂 (唔係七星漂, 因為我只落四粒), 調 8 呎棚, 用烏雞丸, 唔掂!!!! 點解???? 老泥唔食屎???? 唔信!!!! 再試, 都係唔食!!!! Allun 哥用愛心蝦仁切粒, 得o左???? 我又用!!!! 中!!!!!!!! 四指!!!!! 跟住我就好似半日安上o左身咁, 起哂頭, 連上七八條三四指大老泥.......

其他釣友見狀, 個個走埋o黎想分一杯羹, Katy 妹妹就好叻, 叻過佢老豆好多, 上o左好多條, 而且最大一條手板裝o既老泥係佢經手o既....... 條 4米5 滿哂弓, 勁!!!!! 其他人就唔好提囉, 好似個 Allun 咁, 最初佢起到我起唔到, 到我起魚佢就收哂口, 條花尾重堅, 起o左條超大型 "林哥", 而呀司機F就全程上 "赤", 上到唔停得手, 真係釣到學哂死佬標, "挑, 又係!!!!!" 我睇佢老哥都放生o左十幾條 "赤".......

其實除o左老泥之外, 我地都起o左唔少 "池仔", 約五至七吋左右, 如果我地釣埋夜水, 就一定留番o黎做生餌, 釣紅鮪章紅好得食o架.......
 

我就真係人削冇得醫, 起魚唔少, 但係走口甩手重多....... 約係三與五之比咁喇, 你話o勒, 熊貓哥!!!!!

大家坐定定捽老泥, 有個口痕釣友o響後邊爆o左一句 "真係好有中環碼頭 feel 啵, 又係排排坐, 又係釣o的咁o既魚......." 哎, 你估我想咩????? 咁o的唔開口嘛, 其實當日我地都算有少少釣獲, 你地睇o下o個o的老泥同大狗o勒...... 重有十條八條沙鑽仔, 已經俾浪花充o左公, 入o左佢個肚咯.....

又差唔多夠鐘, 一眾廿一人開始疏散o既準備, 我又去 call 返隻艇, 點知初一嫂話水狗勵害, 唔敢出o黎車我地, 又話架 94 號尾車開九點, 唔怕出唔到九龍咁話喎...... 突然有架有牌艇出現, 老虎妹同老虎妹夫話趕時間, 咁就上o左艇, 拜拜咯, 老虎同威威重叫佢兩個同初一嫂講, 唔駛返o黎車我地, 因為我地會坐有牌艇走...... 其他人就只可以好無奈咁o響碼頭仔度等.....等..... 等......等......

說時遲那時快, 初一嫂隻艇唔知幾時出現o響碼頭, 車o左一部份人出去...... 冇幾耐初一哥同埋頭另一隻艇又告出現, 咁我地就上..... 車到一半路, 初一哥話水狗出現, 要車返轉頭, 重要上埋街...... 終於, 有驚無險, 返到 "黑氣石碼頭", 大會終於完滿結束.....

總結今次灣仔之行, 都算係幾成功o既一次, 雖然釣獲乏善足陳, 但可以o響一個咁正o既環境釣半日魚, 忙裡偷閒, 都係人生一大快事...... 相信o響不久o既將來, 就會有一次灣仔碼頭擊, 大家請拭目以待........

(Remark : 已經俾人屈o左, 灣仔擊已經出o左爐, 請大家踴躍參加.......)

From 田中: 嘩~! 點解唔放生??? 仲成世界既?? 搵日攪個內部處分先!

 
 
< 前一個   下一個 >