Menu Content/Inhalt

誰在線上

線上沒有任何訪客

線上人數

生蝦咁釣 列印 E-mail
作者 拉丹   
2001/03/02, 星期五
《生 蝦 咁 釣》
日  期 :2001 年 3 月 2 日 (星 期 五)
時  間 :晚 上
釣  點 :紅 磡 "生 蝦 咁 釣" 釣 蝦 場
營業時間 :星 期 一 至 五         : 中 午 12:00 - 午 夜 01:00
星 期 六 、 日 、 公 眾 假 期  : 中 午 12:00 - 午 夜 03:00
收  費 :星 期 一 至 五         : 每 小 時 $40
星 期 六 、 日 、 公 眾 假 期  : 每 小 時 $55
學 生 享 有 半 價 優 惠
釣  者 :青 蛙 、 Le' Dan
釣  法 :蝦 竿 + 小 浮 標 + 雙 勾
如你也有新料欲與網友分享,請連同簡單資料電郵至 這個email住址已經被防垃圾郵件程式保護,您需要啟動Javascript才能觀看

 

文 : Le' Dan

釣蝦呢種玩意由台灣引入香港差唔多大半年,我都未試過去釣,因為我有一個信念就係越黎越多釣蝦場,釣蝦既價錢遲早就一定會下調。最近,土瓜灣新開左間釣蝦場,據網友講間野既收費係全港最平,一各貪小便宜既我等左半年終於比我等到喇! 嘿~嘿~!

星期五晚我同青蛙去牛頭角攪電波網既 Server安裝工程,攪完之後見時間尚早就無啦啦走左去土瓜灣新開既釣蝦場踩下場! 到底釣蝦既感覺係點咖呢? 同釣魚有咩分別呢? 釣蝦係咪真係咁過隱呢? 等我同青蛙同大家搜查一下啦!

原來個場唔係大街大巷,如果唔係有地址都好難摸到去,可能亦都係呢個原因,租金成本都比其他場平,所以釣蝦收費都可以收平。

一去到,見到個蝦池都有大約 300 呎左右,可以容納到三幾十人舒舒服服咁去釣。不過我同青蛙見個場人影都唔多隻,只有一個哥哥仔度釣緊。點解個場咁冷清既? 呢個場會唔會係黑店呢? 好唔好撇呢? 正當仲諗緊之際,釣緊蝦位哥哥仔好似有料到播! 我見佢支竿成支 U 晒之後又指直,指直之後又U番,連彈左幾野,於是青蛙同我就八八掛掛咁走埋去睇睇。個哥哥仔三兩下手勢就的左隻蝦上水。唔通真係咁易釣? 一於唔好執輸,一場黎到,幾大都釣番兩手先。

我地同睇場既阿姐登記左之後再架撐,場內有長長短短既蝦竿擺晒度,我隨手就立左支短野,而青蛙就左支長小小既去釣。釣組好鬼簡單,只係一支短短地既淡水浮標仔。魚絲經過浮標仔落零圈,零圈底再綁兩條綁左魚勾既子線,雙勾齊出,唔通真係~~ "雙重力量係會好過得一個?" 而零圈頂條主線夾左粒細到打個乞痴都吹走既G2 / G3 夾鉛仔。成組野已經Set好晒,只係係咁易較下釣棚水深同上餌已經可以開工。

我左個釣組落蝦池之後,見到池入面有三、五條斤頭既魚向住我舊餌衝埋去,如果一個唔覺意比我釣倒就真係發達喇! 死啦! 咁多條魚中邊條好呢? 好景不常,原來佢地只係路過。唔係丫嘛? 舉口之勞咋嘛,一啖食落去有幾難播! 哎~~! 唯有繼續去釣蝦啦!

過左十分鐘,我同青蛙仲係蕉緊,突然間見阿青蛙支標唔見左,阿青蛙即抽,中喇! 終於中左第一隻蝦喇! 唔通長竿真係得食? 真係一寸長一寸強? 講番隻蝦佢真係唔好彩,比其他人釣到就會好心急咁抽佢上水,但係比著我地就梗係幾大都 feel 下先啦! 上唔上到水唔係問題,最緊要係好feel。見阿青蛙一手都唔比咁玩左幾手,隻蝦上左水四、五次之後終於唔再啋阿青蛙,青蛙見佢冇掙扎就跟手的佢上水,原來真係中蝦咀咖播!

青蛙中蝦六步曲


1. 先勾上蝦餌

2. Zoom 個近鏡睇睇

3. 再拋竿,靜侯蝦訊

4. 中左! 仲想走!

5. 一手都唔比,拖你番黎先!

6. 第一隻蝦中招! 蝦?! 哈~哈~!

見阿青蛙有料到,我就唔信邪繼續努力去釣。平時出去釣魚就話十出九蕉! 釣蝦應該唔會! 結果連續幾口都係走口,真係激到我彈起。正當我機乎彈起之際,再望望個場,原來已經多左好多釣友身邊,當中更有一位是電波網既 CDR fans 傑哥以及幾個姐姐仔,為左保持我所餘無幾既形象,我同傑哥打左幾聲招乎之後就繼續去釣。個場已開始越黎越熱鬧,新黎既釣友大家都好友善咁打下招呼,黑店既感覺已經冇晒! 哈~哈~!



蝦場越夜越熱鬧! 有部份釣友都好緊張播!

唔使幾耐,新黎既釣友都開始有料到,一隻、兩隻不停上水,唔通我既釣法有問題。正當我抓晒頭之際救星終於出現,我身邊出現左一個大漢,佢叫做英哥,亦係蝦場既最高領導。英哥初見我鬼鬼鼠鼠,又周圍影相,就問我係咪記者,於是我表明身份話佢知我係電波釣魚網既會員。英哥雖然自己冇上網,不過都由佢客仔口中知道有呢個騎哩釣魚網存在。好彩電波網都有虛明唧! 唔係分分鐘數碼相機都會比人拆菲林,哈~哈~!

釣蝦的技術

英哥睇睇我個釣組,佢話我個勾底得濟,個勾最理想位置係離水底一寸咁上下。因為呢個高度岩岩好與蝦眼成一水平,容易比佢睇到。舊餌唔可以咁大舊,其實隻蝦個咀好細,大舊得滯隻蝦可能啃唔落,細細粒容易食嘛!

當隻蝦食緊餌都有技巧令佢容易上釣。當你感覺到支浮標沉下沉下,即代表隻蝦度攪緊係舊餌,但係唔代表佢已經勾實。因為蝦咀前有好多細爪,可能佢只係用細爪捉賽你舊餌而唔係入左口。呢個時候應該細細力帶一帶舊餌,等隻蝦以為舊餌走緊,唔食就走寶,隻蝦會跟住就會開始心急,拿拿淋吞左舊餌。到你見到支浮標潛晒水,你就可以抽竿。抽竿既力度都要好好握握,太大力會扯爆蝦咀,太細力可能勾唔到佢個咀,只係用洽當既力度輕輕的一的,隻蝦就走唔甩咖喇! 英哥一路講,一路示範,到講完晒最基本既技巧之後,一隻五寸長既蝦仔就比英哥釣左上黎。你都咪話釣蝦冇技巧!

英哥仲話有人鐘意用手絲就咁水面睇住隻蝦釣,不過呢個方法中蝦既機會較微,因為你睇住隻蝦之餘,隻蝦都睇緊係到底度攪緊乜,千奇唔好比隻蝦睇到你水面。另外,英哥話中左咀既蝦唔好番落水,因為爆左咀隻蝦就有心理陰影唔會再食野。而天氣都會影響蝦既胃口,一般較暖既天氣蝦會比較開胃。

英哥教完我之後,我就再試下再釣。哈~哈~! 真係 Work 播! 不過我玩得太耐,想feel 下中左蝦係咩感覺,所以玩左一陣唔的上水。玩到差唔多隻蝦冇力先諗住的佢上水,可惜面臨上水陣走左口,仲比在場既哥哥姐姐笑我走口添! 真係激死! 哈~哈~!

企我側邊既青蛙可能偷聽左英哥既秘技,跟手不停咁上,上上青蛙已經掌握到釣蝦技巧,數分鐘內連上三、四隻蝦。青蛙上到個樣越釣越寸,我就相機出黎影底佢個寸樣比大家睇下。咁多隻蝦當中,青蛙上過一隻係又中蝦頭,又中蝦尾,隻蝦係完全冇得反抗,真係騎哩!


勾頭又勾尾,一定的得起! 嘿~嘿~!

超~~! 又係蝦! (設計對白)

蘇蝦乖,哥哥幫你解勾之後再放你 ..........落肚!

釣都差唔多,有釣友就將釣獲連同自己帶去既食物即場 BBQ,燒烤既費用已包括左入場費入面。由於時間既關係,我要趕住走,所以我同青蛙就撻幾隻其他釣友已燒好既鮮蝦黎食。嘩! 真係咪講小,蝦鮮味到不得了。度飲品無論啤酒汽水都係一律收五蚊,一路嘆鮮蝦,一路飲可啦,真係好鬼正。如果有興致,仲可以蝦場既點唱機點下唱添播!


果度既收費平日係 $40 一粒鐘,星期六、日、公眾假期就收 $55 一粒鐘。每支蝦竿最多可以三個人一齊玩,佢個收費包括埋釣餌同一切所須既釣具。個場最底死既係學生幫趁仲有半價優惠,早知我都剿番十幾年前件校服去博一博,可能可以握到個半價都未定播! 嘿~嘿~!

個場唔係好大,只係有一個釣蝦大池、一個小賣部、一個燒烤場、一個撈金魚既金魚池、一部點唱機、而且仲有十幾個座位既樓上雅座添! 咁多樣野可以擺埋一間差唔多600呎既鋪位同附近既街道都可以總算係一個神話。唔單只係咁,最正既係鋪頭出面可以唔使錢泊車,成條路又冇乜車行,就算將架車打橫擺都可能冇問題! 哈~哈~!


撈金魚每次收費 $20

 
 
< 前一個   下一個 >