DIM 筏絞版權由山本十九持有，未經同意，請勿用作任何商業用途。

DIM (Do It Myself, 唔係 Yourself) 手指鉸的設計及制作

要釣魚，竿同鉸係主要用具 (除非你齋玩手絲)，而且係釣魚人主要資本性投資。竿鉸價格，可以豐儉由人，五七十蚊一套竿鉸可以釣到魚，一萬幾千一枝竿，五七千蚊一隻鉸又可以釣到魚。我最初玩魚竿時候，曾經有個高手同我講笑，佢話佢半杯絲就夠買起我～～成套傢牲。難怪，我成套都係六十幾蚊，連竿加鉸，又有魚絲，問你點頂！

玩玩，而家越玩就越騎喱，唔單止玩投釣，又學人玩筏釣 (貪佢中魚夠哂 feel)，又學人玩磯釣 (十分極度皮毛隻)。畢直就係得咁多，玩咁多樣真係好頭痕，而且市面出售釣具，唔一定自己胃口，唔係唔用，就係唔價 (其實係唔價居多)。磯釣就唔好講，我又唔係咁熟，都係講返我主修同副修喇。投釣用具唔係咁易做，設計複雜不特止，價錢唔貴先至我命，兩三舊水一隻鉸，四五百蚊一枝竿都已經可以用得過。如果你要求唔係咁高，一千蚊唔駛已經可以買到一套見得人傢牲。筏釣就唔同，一千蚊上落竿，只係中下價貨，三舊幾水鉸，係入門等級，重係冇 Drag 種，你都唔好話唔係。

話說有日同水籠標上浮台，見佢有一個好騎喱手指鉸，係乜都冇，只係得個塑膠收絲盤，同埋一個金屬座，係咁多。口多問句幾多錢？敝，唔問好過問，係五舊水冇得找。又有一次同鬆C一齊玩，佢有隻木做太鼓鉸，又問，點知重衰，要六舊幾，折都要五舊過外。

後來，我去到一間賣另類釣具釣具店一問，佢兩條友仔都冇老點我，真係咁貴！我問小二哥點解，佢話 "因為係人手做，物料唔值錢，人工都物超所值喇" 咁話。小二哥重大我，話 "你自己都可以做，你有齊機床咪得囉。" 嘩，你當我係 "囉拔" 咩？得咁，我係食鐵屎大，屋企度有車鑼磨鑽鉋火花機數控加工中心等等等等。好，我就試，睇我做唔做得到？

唔好話我講得口響，其實我都係試，得唔得都未知，而且我真係唔知工作量有幾大。

第一，要電腦度劃個圖，睇 work 唔 work，好彩我有個正版 AutoCAD，呢樣難唔到我，我又識用，咁就真係天助我也。

第二，要選好物料，有足夠剛度 (rigidity)，又要唔生銹，又要重量輕，本來不銹鋼最好，但係比較重，加工又較難，最後決定主料用合金鋁，但係價錢又比較貴。

第三，要上鑼床撥窿偷空減輕重量，上車床車個 profile，又要用人手執個 seat 出，最後梗係要裝配好喇。

第四，唔駛講，試水是也。

都係唔好講咁多，睇我個設計先喇。我個設計，係參考水籠標個手指鉸，加以改良而成。

主要零件，要自已做，其他就可以去旺角買，好似不銹鋼鑼絲同啤零喇。主要主料用合金鋁 ，都可以旺角買到。內定軸 (主軸) 要用不銹鋼，因為要有足夠剛度，重少少無所謂。

Part List

大家可以在上表睇到，主絲杯車削量真係好大，完成後得番 5% 都唔夠，即係加工過程中，超過 95% 物料係癈料，你都唔好話唔得人驚。

完成之後，總重量大約係唔超過 80 克，都算係咁上下，加埋絲，一定唔超過 100 克，大約係 Daiwa 筏鉸重量。最緊要係，買料只係用我百幾蚊，又可以打發時間，有 "細藝"，不過如果加埋我人工，就唔講得少，最少都要四五千蚊，即使我叫個師父仔做，都要幾舊水人工，真係唔知邊頭本邊頭利。咁，如果係大量做 (即係量產型) 話，又唔同咁講法。

都係講番個鉸設計制作重好。

首先，要諗個杯，點樣出絲先至夠順，點樣裝啤零至穩陣，點樣偷空至會在減輕重量之餘，又唔影響個杯剛度。終於，我劃呀劃呀，劃五六個版本，至決定用而家個設計。大大話話，我都用成百粒鐘劃呢個杯，真算係心血結晶呀。而最複雜劃好之後，其他零件就相對講係 "依絲桌"，不過都用我廿幾粒鐘。跟住，劃好哂所有零件之後，又要諗辦法去裝埋佢一齊，我個 AutoCAD 又冇 "assembly"  "option"，又要將所有零件 "export" 成為 IGES "format"，用另外一個軟件 "assemble" 佢，睇靚唔靚仔，又要稱重量。總之，排真係搞到我天旋地轉，呀媽係咪女人都唔記得咁滯。

個杯個藏絲位，係用小角度 (5度) 外斜口設計。咁設計好處，出絲同收絲都會順，杯口又唔會阻手指，又靚仔。偷空位要避重就輕，唔可以太過火，偷得少冇作用，偷得太多又會影響杯剛度，最少個位，都要留至少 2.5 mm 料至得，又要留位裝鑼絲，咁就用三排窿喇，最裡邊排可以用收鑼絲，好。撥窿唔好用鑽床，要用鑼床撥， "撥巴" 要用合金刀粒，撥出個窿會光潔。因為窿係 "徑向對稱" 設計關係，又要收個分度盤上去鑼床度。撥窿之前又要光正外皮，有個 "師傅位" 以後做至有個 reference。裝啤零個位，更加唔可以太薄，但係太厚又裝唔到鑼絲，唯有撥個杯頭避空佢。跟住，就要車條臨時軸，用幫手車個杯 "profile" 。車個 "profile"，梗係要用合金刀粒車，因為合金鋁係好 "邋屎" 既料，用普通鋒鋼車刀都可以，車出冇咁靚仔唧。做好哂之後，記得倒番哂圓角，要用標銼仔，慢慢做，唔能夠心急，心急只會壞事，搞到個鉸好似刀疤明咁，就唔好喇。

車外轉軸同車主絲杯，係大同小異，要注意，就係要盡量一刀過，唔好 "番刀"，咁車出就會好正，駁親刀就有個駁口位，雖然冇問題，但係外觀講，打少少折扣。

外轉軸個樣，其實就好似個線轆，做番個平位收主絲杯，鑽三個品字形窿仔，鎝度 M4X1 牙，咁就可以收個主絲杯上去，重好實淨忝。

內定軸就比較騎喱，車好兩頭啤零位之後，一頭一尾要鑽兩個窿仔，又係鎝度 M4X1 牙，之後重要鑼留兩邊平位，用落梗頭收實佢個 seat 度，要求唔高，只係鑼時唔好整 "孿" 碌，碌 "孿" 個鉸就會唔平衡，前功盡癈。

車介子就重簡單，不過咁細個介子，其實好 "蝦" 人做，要車得好，就一定要買長條合金鋁料，等個車床 joc 頭有位夾，先鑽個窿，可以鑽深，車好一邊之後用 "咭" 刀 "咭" 佢出，咁另一邊就出埋，唔駛番刀忝。

做個 seat 就冇咁多機床可以幫到你，首先劃好個 profile 件料度，鑽好窿，唔駛鎝牙，上鑼床鑼到咁上下，然後用銼仔慢慢執出。

出絲導線同埋出絲導圈就相對講簡單好多，出絲導線用 14SWG (約2mm直徑) 白鋼線，一頭屈個 4mm 多圈，然後帶直佢，另一邊用 AA 膠痴個投竿頭階上去，最後 "assemble" 時至屈個位，擺正就得。

自己要做 "parts" 就講過哂，其餘都可以買得到，不外乎係鑼絲，絲母同埋啤零，我相信一定唔會難到你地。 出去旺角新填地街，廣東道，上海街之類五金舖就有得賣，最多係平貴咁解唧。

執齊之後，就可以開工裝嵌，手板眼見功夫，三扒兩撥就嵌好哂，上埋號半炭絲，就可以去試水喇。 至於釣唔釣到魚，就唔好問我，成個海都係魚，釣唔到係你 "差強人意" 唧。

附錄 : 所有 "parts"  IGES file 可以 下載 (1.67MB)，如果重有乜問題，可以貓俾田中轉交。

加送另一款設計之絞仔供各位參考。

DIM 筏絞版權由山本十九持有，未經同意，請勿用作任何商業用途。