坑口碼頭仔釣點點題編
作者 十九   
2006/03/01, 星期三
坑 口 碼 頭 仔 釣 點 點 題 編
釣 點 提 供 - 坑 口
(圖 片 & 資 料 由 肥 熊 提 供 @ March 2000)



釣點
將軍澳坑口填海區

位置
坑口南豐廣場後面,尚德隔離,側邊係瑞安地盆。請參考地圖。厚德街市同南豐廣場都有釣餌 (青蟲,沙蟲,生沙蝦,生蝦仔,圍蝦同南極蝦) 賣,釣友唔駛週圍撲。

交通
將軍澳而家交通好方便,唔駛多講,狗巴91M,95M,98D,297,298,906 等等差唔多有個9字頭巴士都停咁滯,都南豐廣場或者東港城有站落車,真係好方便。總之落車後要搵到南豐廣場,側邊間小學隔離有條巷仔,由巷仔直行,就會見到個迴旋處,稔辦法過馬路(好似有條隧道)。過o左馬路就搵條最最污糟路口,慢慢咁行入去,要小心有好多泥頭車出出入入。跟住條路行到尾,就會見到個碼頭仔。

釣點情況
個碼頭仔好細,最多企三條友仔,而且又會有人用碼頭上落,又有人度玩遙控快艇,總之唔係好老o黎啦。但係呢度向出行,基本上成條石堤都可以落竿,但以我經驗,就係越出越好,最少要出到開闊D位,即係去到你就明咁解。又可以租艇仔釣,兩匹雞180蚊1日,星期六日就220蚊1日,一匹人力好似120蚊左右,一般般啦,D價錢!石堤可打沉底或可用手竿釣浮漂(針仔),手絲及筏仔應該唔得,搞磯就更加冇行(除非出到近鯉魚門o個邊),因為係內灣,基本上冇流。如果打沉底就考你技術o勒,水就好深,但離岸20呎左右就係大石頭,有技術就釣魚,冇技術就釣地球,大家都要好自為之。魚種講出o黎都冇人信,計有黃腳、斑、老泥、火點、油"魚追"、骨鱔、鱸、老烏、連米、、八抓魚、老坑、石狗、林哥、哨牙妹等等,沙底、石底、泥底、半水、水面一應俱全,我都唔知點解。不過除o左斑、油"魚追"、鱸同老烏外,其他都唔算大?。

地圖
坑口碼頭仔附近位置示意圖