東水極品~大廟全攻略
作者 十九   
2006/04/01, 星期六
《東水極品~~大廟全攻略》
(資 料 由 肥 熊  提 供 @ April 2000)

釣點名稱 :清水灣道大廟灣天后廟碼頭
釣點級別 :I  級 (AAA+ 級),適合兒童及老人家
釣點位置 :西貢清水灣道去到盡 (地圖1 及2 ),清水灣高爾夫  "香穿佢落部" 對落,天空海闊之處,白雲天水之間...
釣點交通 : 
最直接就係o響新都城巴士總站,搭 16 號綠色小巴,直入布袋澳路口落車,車費 7 蚊雞,全程約 20 分鐘左右。30 分鐘一班車,逢嗒正嗒半開車,頭車新都城開 0630,尾車布袋澳開 1800。回程就o係落車o個度等。如果搭狗巴 91 到總站,轉打的唔會跳錶。自己?車就自己識?路,唔駛我教o勒。
釣點 view :o響布袋澳路口落o左車之後,向 "門口又高狗又大  香穿佢落部" 行過去,右手邊停車位邊有個好很細  o既路牌點你落大廟o架o勒,兩條小徑都得,冇分別,不過千祈唔好上山,唔係你就死硬!!!向落行o下行o下,你就會見到個好靚好正o既 view,你會覺得成個海成個天都係你o既,佢就係大廟灣o勒。
釣點概況 : 最正就係開大開細同o羅淡水都好方便,因為 "一號" 好近便,就o係間廟隔離 (地圖3 ),來回都唔駛兩分鐘。

  右手邊有個大碼頭,左手邊就有個細碼頭,前面有幾級梯級 (地圖3 ),最左及最右有礁石,全部都係好位。

  ISO 就係磯位,O 就係投位,Y就係手竿位,其他好似手絲、筏仔就基本上成個碼頭都得,個個位都咁正。

  大廟玩磯唔算好正,因為水流唔係大,而且係小內灣,但係屬於好安全o個隻。

  投釣方面,就成條碼頭都咁好,基本上係沙礫底,唔怕棘石,但係要小心有幾舊石頭同埋有兩堆海草 (見地圖3 ),但係話時話,我就比較鍾意投近海草堆,好多時都有唔錯o既魚訊 (即係都幾密口啦,起唔起到就睇技術同運氣o勒)。如果吹大東風 (即係頂頭風)  o既話,出絲就會有少少困難,而且收獲會少DD。

  手絲筏仔不能遠投,但因為碼頭係 "在水中央",機會亦十分唔錯。手竿我就從來都未試過,唔敢評論,不過時常見到有幾個蛋家呀嬸用手竿,起到唔少沙鑽仔同 "魚立" 仔。

  細碼頭方面我未去過,真係冇乜意見。
 

魚獲參考 : 乜 "魚立" 物 "魚立" 同連米係最基本o既收獲,不論日水定夜水,差唔多次次都有,睇大定細o即。沙鑽、牛揪同鼠銜亦係常客,沙鑽要熱少少,牛揪同鼠銜就不論情況都會同你玩o下。火點、左口亦不時見到。

  天熱會有鮫魚拖,重係好多很多o個隻,舊年水尾九月,我都重見到有人拖到三四條 (舊年我見人拖得好很過 "引",但係硬係唔識去買塊鐵板仔,蠢!)。

  雞泡亦係時時見,日日見,最大我起過十幾兩,亦見過一次有超過三斤o既超大雞泡上水,日本仔見到都會大叫 "一番" (Ichiban)!

  夜水方面,就有紅?、雞魚仔 (斤頭)、斑等等比較好玩o既魚。日水我都試過上青斑仔,不過就係一指大,錢頭o個隻。要玩中斑大斑,就要用生蝦,投向石邊,要小心棘石。夜水都係生蝦比較得食。

  幽面我都見人起過,不過屬於可遇而不可求。

  老泥唔多,而且唔大,都唔知點解,用籠o黎裝都裝唔到。石狗亦係好細,林哥、梳欏,都係孫仔輩,釣到都冇用。

  呢度又有好多蟹,差唔多次次我都有收穫,但係蟹多就好容易俾佢地偷哂 D 餌。

  在此釣魚要小心,因為老虎仔同老坑係呢度陀地,成日上,不論大細,不論日夜,不論水流,小心小心!

  肥熊我次次去都係o響同一個位落竿,個位唔係特別正,但係可以自成一國,有條欄杆梆o下生籠,又有個船纜蠆坐o下,連凳仔都唔駛帶,個船纜蠆好少船會用,有船埋只要小心 D 唔好俾人掃竿就得 (地圖4 )。
 

照片 : 今次照片欠奉,下次都唔會補o架o勒

 

地圖  :
1. 清水灣道泳灘至布袋澳
2. 清水灣道尾布袋澳路口及門口又高狗又大香穿佢落部停車位
3. 大廟灣釣點圖略
 4. 大碼頭頂部示意