簾証行動
作者 電波釣魚網   
2000/06/01, 星期四
簾 証 行 動
(資 料 提 供 by Le' Dan @ June 2000)

港內係咪真係冇魚釣??

有釣友話十幾年前,係港內釣魚,都好易會釣到過斤魚。佢後生果陣時,邊有諗咁遠,港內幾時得黎冇魚丫! 但係依家釣友港內釣到過斤魚既機會真係細左好多好多。

近排同幾位釣友吹水果間,談及呢個問題。如果港內真係冇魚,點解仲有咁多小艇岸邊簾魚呢?? 先唔好講污染既問題,我地得出一個結論,港內唔係冇大魚,而係比港內簾魚既艇仔,以七重天既方法去簾。D 魚避得過第一個簾,避唔過第二個簾; 避得過第二個簾,避唔過第三個簾, ....... 大大減底左岸邊中大魚既機會。

聽聞香港有法例列明不準於港內或航道捕魚或簾魚,但以我釣了一年多魚既經驗黎講,經常都可以港內見到有魚民開工,而且好多都簾得好近岸邊。好多時 D 爛簾就"劈" 晒海底而唔好好處理,攪到個釣場寸晒,太古海濱就係一個好例子。

雖然有法例限制,但係班港內作業既魚民仲係咁囂張咁落簾,攪到我地班釣友冇啖好食,食蕉多過食魚,我地班釣魚佬係咪冇野可以做野?? 我同果幾位釣友都有一個奇想,就係希望所有釣友合作,一見到有魚船港內近岸落簾,就影相或者抄底船 No.,記錄底日期時間,取得簾魚証據 (簾証行動),之後打去有關既部門投訴。可能一兩個人投訴佢地會唔理,但係如果一日收到十幾廿個投訴就唔可以側側膀。如果真係側側膀,我地可以再集齊相片以及有關資料,向報館反映有關問題,又或踢爆有關部門忽視我地既投訴。 如果各位釣友都可以合作,相信唔多唔少都會增加我地港內中魚既機會。

但係由另一個角度去睇,我地釣魚只係娛樂消閒,而魚民可能靠捕魚養妻活兒。如果我地既 "簾証行動" 成功,會唔會影響魚民既生計呢?? 會唔會太過自私呢??

希望大家可以去吹水區就 "簾証行動" 比D意見,如果大家都讚成,希望太古可以成立 "電波特派簾証專員公署" (簡稱 : I.C.A.蕉.) 再委任一名 "簾証專員" 負責搜集有關投訴部門既資料、電話,以及全權負責 "簾証行動"。

香港...勝在有 I. C. A. 蕉.
(I.C.A.蕉. =Independent Corporation Against 蕉)