反十七擊浮台半日團報告
作者 十九   
2000/07/01, 星期六
《反十七擊浮台半日團報告》
(文 : 肥熊尚義 @ July 2000)

日期 : 2000 年 7 月 1 日( 星期六 )

由於鬆 C 狗狗同埋呀平爺放o左飛機, 所以只有八件傻佬上o左浮台, 計有浪花, 探花, 肥熊, Akula, 老虎狗, 阿誠, CHRIS, 同呀熊貓, 連隻熊貓女都放埋飛機, 女釣友共有零位參加.....

因為早兩日已經聯絡好個船家, 今次好順利咁就上到船, 上浮台亦好順, 絕冇亞之亞佐, 上船之前我地影定一張全家幅, 個個都笑到見牙唔見眼咁, 唔知係唔係唸住一陣間起黃腳起到唔停得手呢...... 上得浮台, 好o野, 有瓦遮頭, 唔駛晒, 雖然地方就唔算乾淨, 但我相信一定好過馬小強屋企!!! 到o左位, 梗係本住電波精神~~~自生自滅喇, 各方 "強者" "勇者" 自動開竿, 掛餌, 郁佢!!!

冇幾耐, 唔知呀邊個邊個話..... "車, 咬都唔咬o下!!!!! 等我開枝投竿打出去睇睇有冇料到先....." 唔記得話你地知, 肥熊哥我冇帶投竿, o個位仁兄一定唔係我!!! 不過唔知係邊一隻(男人老)狗呢???? "Akula 開齋喇....." 大家精神為之一振, 車, 係條大青鱸~~~~花, 都有成五斤.... 鎖你鎖你, 搞錯單位, 係有成五吋長......

眼見成璣成璣老泥, 開枝手竿梳孚o下喇..... 好彩探花哥帶o左白鳳丸, 真係好得食, 我都起o左幾條 (無三不成幾, 係, 我係起o左三條, 不過係用三號"魚立"鉤, o野o野中咀, 唔係咁難o架.....)

敝, 唔見o左阿誠同阿CHRIS, 唔通佢地..... 雖然電波精神係自生自滅, 但我都唔想咁快唔見o左兩個咁有希望o既釣友o架.... 哦, 原來佢地去 o左個秘竇釣老泥, 冇事冇事.....

餵o左半日魚, 都要餵o下人至得o勒, 食緊面包o個時, 有隻黑白色o既動物發o左狂咁指住個海~~~"嘩嘩, 成璣烏頭, 郁佢!!!!!!" 咁我地全人類即刻將手頭上所有o既午餐 丟 哂落水, 希望 "願能留住佢....." 我數一數, 一共有三十幾條老烏, 我地就得六個狂人, 發喇發喇...... o傑o 傑..... 但係..... 佢有佢游水, 我有我餵? 佢唔食, 你吹咩???? 熊貓同探花一於少理, 繼續努力, 我就轉個位, 起過風..... 哈, 真係唔同~~~我隔離個 Akula 仔..... 佢中o左條魚, 一手都唔俾, 十秒鐘後, 一條我地o既對象魚~~~"交通督導員", 終於上水喇..... 雖然只係有三指, 唔夠一兩, 但都係"交通督導員"ㄚ..... 我唸, 等我上番條手板大o既, 大魚獎就係我o架喇...... 唔夠三分鐘, 我又有魚訊, 重唔係你??? 清脆琍落咁拉o左三o野, 起魚係時候o勒, 咦, 點解好似冇o野o既, 咁輕o既???? 唔係啵, 又好似有o野啵..... 拉佢上o黎碌碌, 嘩嘩, 勁爆~~~~係兩斤大細~~~~鎖你, 係兩指大細o既 "交通督導員",嗚嗚, 咁我就錯失o左個大魚獎o 勒..... 跟住, 我全力向"交通督導員"開刀, 但係..... 佢地話我好守交通規例, 唔理我..... 浪花, 熊貓同埋Akula沖完涼, 啐哂 D 老泥之後, 又係冇乜料到, 不過阿誠同阿CHRIS好似十日冇沖涼, 搞到成身老泥 (好似有兩斤幾三斤) .....

差唔多四點鐘, 走返去前邊睇o下, 隻老虎狗就同我講~~~~"下次咪預我!!!!!" 係我錯, 老虎哥你有怪莫怪, 我都唔知o架...... 探花哥帶住隻國家一級保護動物, 唔停咁o也蕉..... 冇耐, 船家返o黎接返我地, 咁我地就好 "高興" 咁原船返歸......

由於我地都好似冇乜點食餌, 就一行八人(連埋動物), 去間茶餐廳大咬, 順便頒獎!!!!

大魚獎 : Akula ("交通督導員"一條, 約三指大)
多魚獎 : 阿誠 (三斤老泥, 哎, 好心喇, 下次沖o左涼至好o黎呀.....)
少魚獎 : 李探花 (得兩條魚毛.....)
今次好在冇人白果, 雖然冇乜收穫, 但大家都好開心咁釣o左一日魚, 反十七擊至此完滿結束, 多謝多謝!!!!!