艦釣、噢!蕉Feel
作者 拉丹   
2000/12/09, 星期六

left

《艦釣、噢!蕉Feel》
日 期 :2000 年 12 月 9 日 (星期日)
時 間 :0900~1800
人物 :A艦 (兩匹雞) - Cobra + 肥熊
B艦 (兩匹雞) - 水籠標 + Rayrol
C艦 (兩匹雞) - David + Le'Dan
D艦 (一匹人力) - 米青+蛙
地 點 :三杯酒、泥涌一帶水域

文 : Le'Dan @ Dec 2000

鑑於早排去三杯酒艦釣密口密到有澳洲Feel,所以例會一收到風有釣友去覆桌,我就即刻報名。

出發前充滿信心既 Rayrol
我地約左朝早八點半馬鞍山某釣店集
合。當日朝早,到接近大昏迷既我突
然札醒,睇睇個鬧鐘,嘩! 點解係下晝
三點幾既? 大鑊喇,上年有一次艦釣唔覺意大左放左其他釣友飛機,比隻青蛙唱左成年,呢次又黎一劑,真係唔知點算好喇! 算啦! 反正都遲左咁多喇,都係合埋眼多一陣穩陣。突然,又聽到鬧鐘響,再起身睇睇個鬧鐘,點解會係朝早七點既? 哦! 原來正話發夢,於是即刻彈起身梳洗下再執埋D釣具離家出走。

都係隻青蛙衰,唱左我成年攪到我去親艦釣都好大壓力。因為艦釣係兩個人一隻艦,如果一個人放左飛機揍唔岩人數,另一個釣友就要比多一份船費錢,所以放飛機或遲到影響會較大。

David 宜家點郁都唔怕lu~! Baai Baai Boo....
我由柴灣出發,坐左一粒鐘巴士就八點三到左馬鞍山,一落車就好邪咁撞到有個類似肥熊背影既物體。於是我就佢背後大叫~ :"死佬,去邊度偷釣丫?"。打招呼後先知道原來佢係魚神Jorden既替身,Jorden 因為有事,臨時臨急就搵阿肥熊頂佢個位。

見早到左,有時間去食早餐,於是就閃左去附近既茶餐廳打下躉。時間差唔多八點半,釣友相繼出現,當阿David到左茶餐廳既時侯,佢就話叫我地唔使買青蟲,因為佢同佢班朋友之前一日用淨左小小蟲,大慨淨番一板左右啦,都有成 26-28兩咖! 莫講話夠晒當日用,就算釣多兩轉都仲得。

米青隻艦由阿標隻艦拖住走,船上爭取時間綁釣組
到左差唔多九點,大家都到齊兼且咬完野,都係時侯出發喇! Yeee.. 點解仲未見到米青既? 原來今次輪到米青大,佢叫我地去馬鞍山船先,佢再去三杯酒join我地。於是我地成村人就行左十幾分鐘走左去租船既地方。

原先我地book左四隻兩匹雞,點知去到果陣個大叔話只可以比到兩隻兩匹雞我地,另外兩隻就冇船尾機。唔係丫嘛? Book左都冇艇,係咪我地上次介紹完之後多左人去租艦生意唔休做,所以寸左咁多丫? 租艇佬叫我地一隻拖一隻,我就同佢死撐最小都要比三隻有船尾機既艦我地。我地去三杯酒要成半粒鐘,如果比得兩部船尾機一拖一,一來船程會慢左好多,二來如果有其中一部船尾機突然打柴,要玩一拖三,有咩意外危險邊個負責。租艇佬講左一輪廢話之後最後都比左三隻有船尾機既小艦我地,再拖一隻冇尾機既一匹人力小艦。

水籠標駕駛電波水上拖頭。
呢阿Rayrol個姿勢幾寫意! 救生衣當枕頭fit晒!
講掂數之後原來佢仲未將D尾機裝上小艦上面,又未拖D艦埋碼頭。攪左成半粒鐘仲未攪好,攪呢攪撈,由我地到達到到出晒四隻艦,足足用左成粒幾鐘。我地左艦之後,米青已經差唔多到馬鞍山叫我地等埋佢先開艦。我地見還掂都遲,唔掙在再遲多小小,於是大家船上綁定釣組先。綁好晒釣組之後一陣,隻米青終於到左,水籠標於是開艦埋碼頭接佢。

擾........攘左咁耐終於可以出發喇! 由於David未試過兩匹雞,所以佢要求船,雖然我唔係好信得過佢D技術,不過都免為其難比左阿David試試。有鑑於近期興艦釣玩人形自立浮標(跌落水),小豐師傅話齋 "艦釣還艦釣、生命最緊要",所以我上船既時候,就第一時間同阿David講叫佢就中左魚既動作千奇唔好咁大,以免大家既生命受到威脅。同佢講完之後,我即刻學阿容租兒話齋 "宜家點郁都唔怕lu~! Baai Baai Buuu...."

米青隻艦由阿標隻艦拖住走,佢就爭取時間船上綁釣組。Cobra隻艦因為一早冇等米青,所以已經去左冇雷公咁遠。而阿標隻艦因為負磅過重,所以行得好慢,而我同David隻艦就好似加左 Turbo咁,我第一次覺得兩匹雞係可以開得咁快既! 嘿~嘿~!

由於快過連環船好多,所以我同David開船行先,到左中途就拋下竿釣下魚等埋佢地。當時真係有D龜兔賽跑feel咖! 只不過我地唔係,而係拋下竿釣下魚。嘿~嘿~!

回航時青蛙隻艦艦頭已經指晒天,不過同我地遇到既海嘯比起都簡直係碎料
當隻艦過左白石附近,大鑊喇....點...點...點解突然間會有海嘯咖呢? 我同阿David陣仲釣緊魚,見到有個巨浪遠處打緊埋黎,於是即刻大家收竿, David都即刻撻著部船尾機跟住問我點算。好彩我以前做兼職本地導遊坐艇仔坐得多,見D船家都係用船頭對住個浪,收慢隻船只係比小小油頂浪,於是要阿David 定D黎照做,幾個湧對於兩匹既船仔黎講真係唔細,而據水籠標同Rayrol佢地由遠處睇住我同阿David隻艦當時係+/-45度,好驚我地會出事。附圖為回航時青蛙隻艦艦頭已經指晒天,不過同我地遇到既海嘯比起簡直係碎料。因當時有一艘水警輪以高速駛過,所以海面有大湧,勢兇夾狼咁劈埋黎,好彩最後我同David都冇穿冇爛。

我地幾經波折終於平平安安到左三杯酒一帶水域,於是梗係第一時間開工釣魚啦! 當日簡直可以講話係超級辟歷無敵勁大流,釣左十幾分鐘一口魚訊都冇,一粒鉛落海簡直就沖左去容樹澳咁滯。冇可能咖播,我地舊年同今年去左三杯酒艦釣無十次都有八次,從未試過會蕉,次次都係起魚起到唔停得手既澳洲feel!

電波一拖二既 "頗蕉連環船"
我見咁運滯,於是見議阿David轉位。收好晒D絲之後,David就拉左幾下個尾機諗住撻著幅偈,點知撻撻下用黎撻幅偈既拉繩仲鎖埋炮,拉出之後收唔番入去。好彩 David幾經嘗試終於將鎖埋炮既拉繩攪掂。哈~哈~! 終於可以轉位勒! David 再用一一拉,唔拉由自可,一拉就斷鬼左。天呀~!! 唔通真係 "電波出礁,十出九蕉 ; 電波艦釣,偈都唔要" ??

於是我就用左一匹人力,爬艇仔去搵阿水籠玩連環船。爬左十幾分鐘,終於將隻艦加入埋連環船既行列。三隻艦五條大漢由一部兩匹船尾機開動,行起上黎好慢,平均每只艦都係得 0.6667 匹,哈~哈~!

Le'Dan 將藏體內既水溶性誘餌船尾投放落海
電波連環船一連轉左三幾個位都係蕉,只係好間中有一兩條魚上水,一D澳洲feel 都冇。哎~~! 到底有咩唔妥呢? 唔通未打誘餌,於是我走埋船尾,將藏體內既水溶性誘餌投放落海,希望可以吸引下D魚既注意,挑起佢地既食慾,點不知打左水溶性誘餌之後釣鑊未見改善。嘿~嘿~!

我地肉隨針板上,轉位就由拖頭既老細話晒事。不過唔使船都幾歎咖,第兩卡同第三卡所有乘客轉位既時候都係攤屍。一來可以船上面休息上下,二來欣賞下附近既影色,藍天白雲。唔信咁寫意同風景咁正? 比D相你地睇睇先! 去片~~!

唔玩一字排開,試下玩一拖二都得
轉位時候,我地又變陣唔玩一字排開,試下玩一拖二,大家可以坐埋D,吹水都易D丫嘛! 多諗頭,攪下娛樂不嬲都係電波既精神嘛!

大吉利事講句,如果隻拖頭都壞埋,我地可能要爬龍船番去添播! 講番 D船又舊又殘,D 尾機又成日死,小二服務態度又麻麻,所以我取定今年都唔會再幫趁佢,等出年我地班friends好似連米先生、黑鯛先生、沙鑽先生返去三杯酒先算啦!

David 船尾打水溶性誘餌
到左差唔多四點,David 見我今朝打果D水溶性誘餌可能效力已過,所以主動走埋船尾再打。

期間戰地記者水籠標更開動船尾機狙擊David,務求將阿David 最感性........應該講話最性感既一面用相機影底公開比大家品評下。可惜最後都影唔到水籠標想影既野,唔可以比電波fans評頭品足,嘿~嘿~!
 
 

全日最大既釣獲都可以算係 Rayrol 既牛秋仔

全日最大既釣獲都可以算係 Rayrol 既牛秋仔勒,而標叔叔同米青每人都有四、五條魚上。David同我每人都有一條交差,總算唔使白果咁核突。

我地見都係唔對路,於是Call埋阿Cobra拉大隊去遠征泥涌,盡快離開三杯油既水域。

轉位途中,我同Rayrol分別發現左船上附帶既救生衣最大用途。我用救生衣黎塾住個 Pat Pat,唔使坐得咁辛苦。而阿Rayrol就用黎當枕頭,打橫攤屍船上休息。

呢個位水較深兼大流,所以 Le'dan 索性玩手繩

唔知幾耐之後,我地四艘艦終於到左泥涌。我地已經將目標鎖定為不輪大小,只要有魚訊。大家可想而知我地當日蕉既指數極高,如果十隻蕉係滿分,我會比八隻半。

我於是收埋晒D筏仔,幅手繩出黎飛下,睇睇有冇魚會睇唔開而上釣,結果又浸死左兩條青蟲。真係一D魚訊都冇,實在蕉得太過份勒!
 

天開始黑喇! 會唔會有大野中呢? 答案當然係冇啦! 噢!蕉feel 真係唔講得笑!
事後我地檢討過今次 噢!蕉feel既原因,有以下既可能性 :

1. 流太急,食左都補唔番,所以D魚游晒
    去冇咁大流既地方唔使啃力去頂流。
2. Jorden冇黎,D魚無謂口食野,唔開口
3. David 青蟲唔係d魚食開既馬鞍山蟲。
4. 果日係立法會議員補選,D魚走晒去
    投票或幫手做助選團。
5. 附近兼職魚民簾魚

照道理應該係水流太急,D魚閃開晒避避風頭。不過我既直覺話我知, David 比我地既青蟲有問題。雖然David冇收我地蟲錢,不過我地唔排除集體向阿 David追討當天因為佢D蟲而食蕉既損失。嘿~嘿~!

艇家式船頭撐法 同 船尾搖栳
由於今次遲左出發,又唔係隻隻艦都有船尾機,又要拖連環船,轉位果陣就好鬼慢而且條流又勁急須要頻頻轉位,兼且仲要提早回航,所以真正可以釣魚既時間真係好小。

回航既時候我地見平時小運動,於是就玩下撐艇,我撐完到 David撐,最後仲玩埋艇家式船頭撐法同搖栳。

我去左三杯酒艇釣六、七次,米青又去過十次八次,次次都係澳洲feel,從未試過好似今次咁有 " 噢!蕉 feel"。係怕又要等出年先再可以三杯酒艦釣喇!

呢篇野既結尾再醒多張當日回航時候經過白石既靚靚風景相比大家欣賞下喇!