再戰域當奴 ~ 上集
作者 拉丹   
2001/11/02, 星期五
《再戰域當奴 ~ 上集》
日  期 :2001年 11 月 2 ~ 3日 (星期五、六)
時  間 :晚午十時至第朝四點
釣  點 :洛杉磯 - 域當奴海灘附近 (Redonald Beach)
釣  手 :Le'Dan & Anthony
釣  法 :沉底投釣、放流投釣 (唔落鉛)
釣  餌 :新鮮釣上黎既斤頭 Mackerel 起肉
釣餌既餌 :一條手板池魚起肉

 


再戰域當奴 ~ 上集
圖/ 文 : Le' Dan @ Nov 2001


 呢條斑仔雖然細D,但係都總算係斑!

自從上次洛杉磯既網友安東尼帶路,零魚訊開始遠離我! 大家睇翻上次其他釣友既釣獲都知道,Redonald Beach (域當奴)呢個釣點好唔錯,除左有成尺長既 Mackerel 魚獲保證之外,仲有石斑同龍蝦呢D驚喜。所以我同安東尼兩人又再次翻炒呢個安東尼既主場。
 

餌部尚書

呢次釣旅既集合地點係我屋企門口。安東尼五點幾就黎接我,真係唔該晒佢。佢先帶我去參觀一家魚具店,之後就一齊去食飯。食完飯之後,我地先去超市買魚餌。由於果日 D 池魚仔好唔新鮮,所以我地一連走訪四、五間超市先搵到岩心水既魚餌。我今次見議安東尼買小一D,因為我地可以 "取諸社會、用諸社會",用釣上黎既 Mackerel 起肉再釣。由於安東尼誤信左我既讒言,最後攪到上次以我既近身魚僮身份出現既安東尼,呢次要搖身一變變成滿手血腥既午夜屠夫,擔當餌部尚書呢個重要角色。

一去到,安東尼就用放流投釣先釣D斤頭既魚餌,唔駛三幾下手,就釣到幾條 Mackerel 做餌,之後佢都同我一樣打沉底。到底我地有咩釣獲呢? 請繼續收睇啦!


 呢隻龍蝦雖然細D,但係都總算係龍蝦!
 由於未夠秤,所以都比我地放左

 

心願達成

由於上一次其他釣友釣到唔斤頭石斑同大龍蝦,所以我呢次將目標鎖定為石斑同龍蝦。我地知道釣場既中、高泳層比成千上萬既 Mackerel 軍團佔領,而且聽講石斑係食底層,所以我就選用港式沉底以避開果D斤頭既雜魚仔。哈~哈~!

最後我地都可以完成我地既心願,石斑同龍蝦都釣到,不過Size就細左小小,所以都係影完相就放生。斑同龍蝦都係阿安東尼起咖! 主場釣手真係唔可以睇小。不過我都唔弱,到左兩點幾中左一口勁野,頂左半分鐘差唔多拖到身邊就比佢走左,都好大力咖! 安東尼仲見到佢個魚樣添,真係可惜。
 

乒乓波板

過左一陣,我又有料到。呢次明顯冇上一條食得咁狼死,不過都有小小力。見佢左飛右飛又唔似係雜魚 Mackerel 播! 玩左一陣終於見到佢個樣喇,原來係一條蒲蒲 (魔鬼魚)。哈~哈~! 唔好講小,於是拿拿淋一手都唔比咁的左塊 "乒乓波板" 上水。最後由安東尼再顯魚僮本色,幫我解魚。我地都係採取留勾留命既政策,好彩塊 "乒乓波板"都幾生性比翻個勾我,而我地都遵守誠承放翻佢,希望得佢長大之後再翻黎報仇。到時可以囉番屋企當地毯用咯! 哈~哈~! 我從未釣過蒲蒲,總算不枉此行。


 

風箏

過左多一陣,我支竿又再 dup 左一下,我睇準時機一抽! 呵~呵~呵~! 又中! 呢次比上一次好力,拖到身邊睇真原來又係蒲蒲。呢條蒲蒲同上一次果條唔同種,似唔紙"妖"呢?


 

靜侍黎明

大概釣到四點,我地就收工,坐上安東尼架車度去小睡片刻,準備第朝一早再去附近第二個位攪攪磯,釣翻個早水。到底我地早水有冇料到呢? 又有咩古古怪怪既魚種呢? 請留意下回分解。