再戰域當奴 ~ 下集
作者 拉丹   
2001/11/03, 星期六
《再戰域當奴 ~ 下集》
日  期 :2001年 11 月 3日 (星期六)
時  間 :朝早十一點至十二點
釣  點 :洛杉磯 - 域當奴海灘附近石堤
釣  手 :Le'Dan & Anthony
釣  法 :磯釣
釣  餌 :青豆
誘  餌 :青豆

 



圖/ 文 : Le' Dan @ Nov 2001

大自然的呼喚

上回講到我同安東尼係架車度去小睡片刻,準備第朝一早再去附近第二個位攪攪磯,釣翻個早水。平時訓大慣既我好小可咁早起身,不過我大概七點幾就醒左,點解? 我都唔想,因為我要接受大自然既呼喚,所以局住起身落車四圍搵廁所!

一落車,睇睇附近既環境先,附近有一幅壁畫,畫得唔錯咖。幅壁畫都幾長咖,上面畫左好多唔同既魚類,唔知係咪全部都係附近海域常見既魚種呢? 八爪魚都有播! 仲有紅斑.......... 。當時大自然實在呼喚得我好緊要,所以我影左一張相就閃左。

行左一陣,終於比我發現左我要搵既地方。覆左大自然既 Morning Call 之後,我又四圍睇。原來附近既影色都好唔錯播! 所以我又囉相機出黎影左幾張比大家睇睇。好~! 去片~!


 按圖放大

 按圖放大

 按圖放大

唔好睇咁多船污染一定好嚴重丫,D水不知幾清,我視線範圍既海底情況我全部都睇到。下面有好多魚仔,間中有三幾條手板石霎游過添播!

 

若要收獲好,就要起得早
由於我估計安東尼仲係昏迷緊,所以我就一條友四圍貢下。貢下貢下比我貢到去一個沙灘,沙灘傍邊有一條碎石石堤,堤上隱約可以見到有幾位釣友已經開始晨操。當時天寒地凍,所以我都即刻閃番去架車度。見阿安東尼仲係昏迷緊,於是我都閃番上車恰多陣。大概朝早十點幾倒啦,我地終於昏迷完,於是就起身執齊架生釣番個遲左小小既早水。

出到去朝早既石堤,安東尼話我知果度就係傳聞既?蚌釣點。行出去理想釣點既途中,原來我朝早見到果三位釣友都未走。於是我地又搶左佢D魚獲黎影相,魚獲入面都有幾條手板大?蚌同立魚,真係有?蚌咖播! 唔好以為條魚好細,唔知大家有冇留意條魚呢次唔單只冇被伸前,而且仲係擺到好後,所以各位要自己放番大條魚黎睇咖。

呢位伯伯都係用既魚餌同誘餌都係青豆。安東尼真係冇老點咖播! 呢面冇誘餌粉賣,所以多數攪璣釣?蚌既人都係用青豆做釣餌同誘餌。

我地就選擇左係阿伯伯既附近拋竿,過左一陣,過左二陣,過左三陣,過左四陣,都冇魚咬,唔通真係 "若要收獲好,就要起得早"? 到左第五陣既時候,原先釣開果三位釣友已經前後閃左。我同阿安東尼仲繼續釣,但係始終都係零魚訊。所以我地得出一個共識就係下次要早 D 黎釣,釣到十一點就收工。

 

電波擊 feel

之後,安東尼又車我去真正既域當奴海灘釣位。乜得個石壆咁長既? 直隊出去太平洋咖播! 真係有好多釣位。而且又有針板同水喉比你?魚同洗手,真係好鬼正! 出到去石壆既盡頭,已經有唔小釣友係度博殺緊。其中最觸目既就係有一 Team 為數六七人既釣友,佢地既裝備的確驚人。幾個大冰箱同三幾十支竿就不在話下,再睇埋佢地裝釣具既大鐵箱,裝活魚既大膠箱,仲有一個手推車仔 .......... 咁重裝備,你都咪話唔過份。我再細心睇,原來佢地架戰車上裝左個類似擺桌球Q棍既野用黎泊竿,都幾有電波擊 feel 咖! 佢地既魚獲都唔錯,不過只係 Mackerel 較多,亦有其他魚仔同埋八爪魚。

噢~! 時間已經中午十二點幾,我地食完 lunch 之後又各自返歸了。下次一定要搭番幾尾斑先!