東龍磯釣
作者 電波釣魚網   
2001/11/10, 星期六
《東龍磯釣班》
日  期 :
2001年11月10日 (星期六)
時  間 :9 : 30 ~3 : 30
釣  點 :東龍
釣  法 :磯釣
釣  手 :Captain、Steve & MBS
釣  餌 :中基圍蝦、蝦肉、紅蟲
釣  獲 :簾占、石剎、玫瑰班、花頭梅、芝麻仔

(文: 威威 @ nov 2001)

   好耐無去東龍啦 ... 都有三個星期 , 東龍島係我第二個主場 , 一有時間就去釣幾條魚加料我去東龍交通非常方 , 最重要是每次都唔白果 , 島上有士多飲飲食食 .  因島唔細一定有釣位可以配合到水流同風向 .

 今次因大導湯叫局 , 要我帶他去止下痕 , 又在吹水區收到風話香港無魚釣啦 , 釣穫報告仲話東龍無魚訊 ~ 死晒咁話 . 無奶油架 !!! 東龍夏天成日有驚喜 , 秋天都可玩磯 , 但冬天就因當風魚少些 . 春天釣紅石狗釣到唔大唔要 !!

 一于再探下我個雜班竇仲有無班 . 以前在那處起過班有芝麻 ; 紅班 , 青班 , 花頭梅 , 烏絲班等 . 雖然無幾斤一條 , 但都上得檯 . 我約好 MBS 就在吹水區問大家去唔去釣 . 一盡 OSF 手則 , 偷釣前廿四小時登出釣局 , 如有興趣就一齊與眾同樂 . 今次提目 "東龍磯釣班" 希望玩磯釣釣友試下釣石班啦 .

 一早買了一斤紅蝦仔拆肉 , 及買了二兩中指大基圍蝦做主打 . 在 "蝦滴屎" 早餐後就上船 . 因上次遲了少少送船尾今次早了半小時到 . 走上頂層吹風 . 船今次要等一少女遲開幾分鐘 , 打MBS手提問他是否在山瑚號 ? 從剛睡醒聲音回覆還在家中 .. 唉 ! 又放我飛機.

 船一直向東龍駛去 ; 今天大北風 , 釣魚會較差 . 但是舊曆廿五正死流是去班竇好日子 . 因流太大反而對釣石班不利 . 船過了大赤沙 ; 有一釣友上前打招呼 .... 奇 ! 好似無同佢電話聯絡過 , 但佢係太苦開朝CD_ROM . 我一舉一動佢都十分了解 . 大家一同去班竇啦 . STEVE 佢好好人 ; 笑談中船到岸都唔知 .

 行過兩個山頭再爬過少少崖就到班竇 ; 經驗告訴我 ~~ 釣班在上午 ; 下午 2 點至 5 點比較靜 , 立刻開竿 ; 我同 STEVE 一人一個釣位 ; 好在人唔多 ; 因那處只得三個較高少少釣位 . 其餘位隨時濕身 . 我先用蝦肉試底先 ; 因死蝦肉味大同身淋 ; 俾石班做早餐最好 ; 當佢食得兩只細蝦肉後 ; 胃口大開 ; 先用生蝦釣同一位 ; 中班機會大好多 ; 亦唔易玩死晒蝦都未釣到 . 當用蝦肉引班時 ; 個波一沉一沉又昇回 ; 有細魚偷餌 ; 好一於陰佢 ; 用 2 ~ 3 只蝦肉 ; 俾佢食到波沉都唔揪竿 ; STEVE 好快中條大石剎 ; 我俾佢食完餌之後 ; 再上一粒白豆般大蝦肉投同一位 ; 當波一沉我立刻揪 .... 哈哈 .... 仲唔中我奸計 ! 原來又是大石剎 ; 但今次俾我用千又六號釣到正吃 ...大勾是釣石班用 ; 石剎用大勾釣到真唔易架.

 試左唔同位;今天好多位都無班訊 . STEVE支 1.5 磯竿突然彎曲 ; 一條六兩花頭梅上水啦 ; 我立刻再努力時 ; 電話嚮起 ; 原來MBS到了東龍碼頭 ; 哈 ………… . 還有些口齒 . 等一會電話又嚮 ; 原來MBS問路 ; 半小時後先見佢爬落黎 , 我立刻老點佢一個靚磯位 ; 因佢打誘餌 ; 釣位要較企同無咁多暗礁 ; 我見他好倦地開竿 , 我想佢快些唔好錯過釣班黃金時間 , 不問他便取佢餌袋同誘餌黎開 . 一路吹水一路開竿 , 開誘餌 , 見佢準備好就同佢講釣棚五尺 , 在大暗礁邊釣 , 但小心主絲掛暗礁就全組玩完 … . 嗚嗚 .. ! [我將我今朝真人騷如實同佢講] 個新波用唔夠半粒鐘就咁去左 !

 見佢勾好紅蟲後 , 我立刻返自已位再戰班竇 . 但個波跟流由東去西 ; 一次二次三次 …都無漁訊 … 突然個波有力沉下又彈回 , 沉下又彈回 , 怪細魚唔攪大蝦 , 大魚又好少食得咁樣衰 … ! 當再沉下就揪竿 , 空鉤一只 . 再用生蝦試同一個位 , 又是一樣 .  當第三只圍蝦下沉我慢慢拉絲 , [生力精啤…有d 野喎 !] 當釣組出水時 … 有只衰墨魚攪鬼… 唉 ! 唔怪得之無魚訊啦 , 條死野咬散我幾只蝦但都釣佢唔到 .

 遠看MBS 好像掛石 , 支名弓彎晒 , 叫他唔好咁大力 … 會炸竿 . 但他好似想開網 . 都正確想法 ; 希望救回浮波 … . 但都唔洗一手唔俾 . 唔通佢中大魚唔出聲 ! 我走過去立刻同佢開網 ; 見一條鮮紅魚浮面 ; 網到魚啦 . 嘩 唔細條 , 都有八九兩 . 問佢唔飛條班上來 ; 佢答支 1 號立竿好軟無力 . 大家看看這是什麼班 , 好冷門呀 ; $7 蚊兩貴野 . 做完漁僮再玩啦無耐 , 唔係呀嗎 … . 佢又中魚仲叫 "撈基" .. 又走去同佢撈 , 支竿成支曲晒 ; 條魚左右插水 ; MBS 嘩嘩聲話條魚好好力 ; 唔係班 ….. ! 我見條魚舂水 , 叫佢唔好俾佢入石 , 玩了兩個八字見佢白肚出水 ; 立刻撈佢 , 嘩條泥黃成斤二都有 . (好似廉占但無乜花紋) . MBS 好開心話支新竿今次開齊啦 … . 哈哈 ! 見佢位咁旺立刻改位放只生蝦試下先 … MBS 好大方話讓個食胡位俾我釣返條 … .. ! 做人有時要識轉彎 .

 無幾耐 … 我中班啦 ! 唉得幾兩芝麻班仔 ; 立刻放生 ; 真好 ….個個釣到班 . 正配合到今次主題 , [東龍磯釣班] . 我又讓返靚位俾 MBS , 時間大約下午二時 , 個肚要開餐 , 我再釣一刻就收竿返總部食午餐 . 留下佢兩人再努力 . 食完在岸邊玩前打 ; 三點後見STEVE 也回來 , 因我同佢坐四點船走 , MBS坐五點不同船返九龍 .

 時間三點半一定要起程返碼頭 . 等了幾分鐘唔見 MBS 返黎 . 唔通出事 ! 我立刻走去崖邊 , 見佢困在中途唔上唔落 ….. ! 我爬上去先接左佢的釣具 , [如有乜野都有釣具用喇…..!] 叫佢慢慢落碎石坡 , 碎石坡真係有生命危險 . 趴過左碎石坡再爬橫到我企位四尺上; 我找著他衣服要他直落我 2 尺企位 … . 終於成功 .! , 因佢走錯一少段引至身處困境. TOUCH WOOD!

 我同STEVE走先要趕船 ; 留下佢再攪磯 . 今次收穫一般 ; 但心滿意足 . 及後再電話問MBS 有無再釣到什麼 ; 他說因水一路返漲 ; 出唔到我指佢釣點所以行人止步 . 但兩條魚可分兩餐食 . 先食條左游水玫瑰班啦 .