電波艇釣入門 - (6) 常識技術
作者 總魚神   
2000/07/01, 星期六
呢一環亦係最重要一環,直接影響釣者的收獲,不過亦需要幸運之神眷顧,配合埋釣者既釣魚知識才能大有斬獲。
 

(a) 環境及水溫對魚的影響

因為大自然你唔能夠控制,例如水溫過高或過低會令到魚類攝食慾望減低,又水質的清濁或水流的變化都會影響魚類正常行為。有一點要留意,魚類屬涼血動物,低溫狀態進食時,因消化緩慢不易感到飢餓所以冬天釣魚你會發覺非常疏口及魚隻唔多願吞,夏天就密口得多同比較「搶口」,比方魚排養魚,冬天唔多食野及成長特別緩慢。

除了運氣因素,釣者對魚類認識亦非常重要,因為可以選擇目標魚種和選擇不同釣點以增加撞魚機會,例如黃腳,花鱸是咸淡水魚,西水一定比東水多,因接近生存環境多就構成比較易中。又紅斑,赤,白,青鱸等喜棲息咸度高及水深的地方,東水及東南部就最適合了。
 

(b) 最佳釣魚時段

假使開通海都係魚,你唔好以為一定大豐收,可能很蕉,原因魚類基本上和動物差不多起居,作息,覓食都有一定時段,並非一日廿四小時唔停口勁咬。開口時刻難以捉摸,通常係起流時段就餌行動最為踴躍,即潮水漲盡而退或退盡而漲的所謂轉流時間。

其實呢段時間好容易察覺得到;差不多全艇人都會突然間忙碌起來頻頻感覺到魚訊比其他時間開口得多。黃金時間應盡量把握,因唔會維持很長,但未必會和潮夕漲退時間百分百敏合。

另外兩個時段,幾乎所有魚種都比較開口就是黎明和晚黃,最差是中午「神仙難釣中午魚,尤其是淺水區為甚。
 

(c) 排口與魚類

十分之九魚類聚集在十份之一的地方→排口即海底有礁石的地方。海洋面積雖大並不是平均地分佈魚群的,唯一就是海中間有障礙物;如珊瑚礁,礁石,沉船等為魚類提供棲息所,食物等因素,固此;聚集各種小魚,小蝦蟹,貝介類生物,亦會吸引大魚停留。

艇釣之釣點幾乎全部係排口,只不過排口亦有分種類,如砂泥碎石底,亂石如林之杉口排或平滑大岩頁等。魚種聚集方面亦有所不同,通常紅衫黃花,或黃汀,等喜歡聚於前者。而班科,如是芝麻班,青斑,紅斑,石狗公,牙點,白 等喜歡聚後者。
 

(d) 提高撞魚機會之因素及方法

1∕我留意多年,發覺中大魚通常都在船停剛下絲冇耐釣到居多,及魚勾下降時比較楂定唔郁得食。這點証明動態餌會比靜態餌稍勝,當然生蝦較死蝦好。

2∕冬天水溫低,大部份魚類因生理關係變成唔多開口及幾乎靜止活動,有部份更游向海底深處避寒,因海水深處是較暖的。所以釣冬水應盡量釣深,這是夏釣陰冬深既道理。基於咁唔願開口情況,用餌就要更加小心,夏天可以用稍硬的餌如虫頭螺肉等。冬天就一定要用柔軟的魚餌用蟲就用淋身果種以博魚之歡心。各位初哥,呢點就要醒d啦!

3∕除了上述兩項,間歇性拉動魚絲以針對某種目標魚類如馬友,黃花等。藉著蝦之上下動作以增加對魚的吸引力。

4∕控制魚釣落點之深度,每一種魚類在海洋活躍的深度未必會相同。例如石狗公班類,細型雜魚牛秋等底棲魚類最聚底,又扁身魚如立,火點,牙點,細鱗,鰔等,稍離底而馬友,雞魚,青鮫等喜愛於海底高石邊緣打滾。控制魚勾不同深度以迎合不同魚種慣常活躍之高度,增加撞魚之機會。

5∕魚類就餌習性亦如一般動物無異,有些動作兇狠,一口氣吞,但有些警界心很強,稍有輕微動靜立刻逃離,又有些「擔」住餌帶去另一位置才吞食,不一而定。前者當然係最易釣啦,但後者就要俾些耐性,甚至要作出輕微牽引動作,又或者適當時候鬆少少絲佢走以剌激魚之食慾。警覺性高之魚中,黃腳立就是代表。
 

(e) 大魚上水

講到釣大魚肯定是每一釣友最終目的,既然咁難求都俾你撞到,問題是有冇本事收上來。任何魚中勾後都會受驚拼命逃竄,有部分摶命向下衝搵窿捐(班類),亦有部分向左右橫片(大多數扁身魚),產生一股強大而逆方向的拉力,其實我們承受得到的是兩股力:衝力和扭力。合併而成。

衝力就係由魚之體重加以速度產生,而扭力由魚體肌肉收縮擺動而產生,一邊身肌肉收緊,一邊身放鬆往往扭動力是大於衝力。

最開頭兩三手絲一定要大力抽起,亦是關健性一刻,避免魚頭向下俯衝(魚保持這動作是很難收的)。你亦不必恐懼因拉力過大,超過魚絲負荷而折斷,因為魚絲有相當長度,而tension亦足以令魚絲產生足夠仲延距離以抵消拉力。如果你有過勾石經驗會發覺到就算是8磅絲亦要用很大力度才能拉斷。當魚頭被拉向上而掙扎這個動作所發出力量相應是稍弱的。

這時需順著力度逐下逐下平均向上拉,如發覺阻力突然過猛,可以鬆小小絲「就」魚,當然不是完全放鬆,太鬆俾佢「中」番頭就難控制,要俾番多少friction牽制住魚速兼消耗佢體力,放番小小俾佢但又要慢慢帶番緊,再帶佢上水。
如果佢向左走,你要「就」住力拉番向右,令佢不由自主順番你。要記住大魚會嘗試不斷「中」番落底,一收一放,盡量消耗佢既體力,通常個頭升到上水面,佢就衰梗,再冇辦法發力,可用撈箕「畢」之。

頻頻聽聞釣友話大魚扯斷絲,其實被「界」斷通常被海底蠔石、尖利魚牙或鋒利之腮蓋片所界。筆者曾經在魚塘以4磅幼絲收十多斤,重大鮸魚亦綽綽有餘。正是「一寸短,一寸險」,越是水淺收大魚就越是難,理由咁簡單唔駛講啦!因為絲短冇機會伸長,同埋淺水位釣魚通常魚頭唔會被抽起變成「頭岳岳」
,魚隻紮「行」馬同你死過,很多時做到真正「逼」斷絲。

釣魚就係為左享受呢樣野,千祈唔好過手俾人,死就死啦,點都要試一試如果你未扯過粗野的話,有得十斤八斤重既魚保証過足引,好似拉住一舊會郁既石頭,又好似拉住條繩放狼狗咁,咁過引!!
 

(f) 大魚消氣及放血

當魚中勾後被高速扯上水,因而超越本身調節功能,引致魚鰾充氣及不能自動解壓,身不由己地翻側或[游背泳]。這條[背泳魚]就算在生倉都有機會命不久矣的,可以試試用支尖而通空幼長利管由肛門斜斜刺入[尖頭指向口部],直達魚鰾,繼而輕輕用力壓向魚腹排氣,或者加一輔助方法就係用大鉛頭勾勾住腹鰭以助平衡。

假如是一條極高價之大紅班又點呢!職業釣手一定要救魚才賣得高價錢,佢地將魚放入聚有重量的魚籠,徐徐沉番落海底[浸],救生機會相當高。 至於大魚[神仙]左,又有排都未得走,魚[谷]左血就會冇咁好食,豈不是[徙]左條好野,咁又點呢!可以把魚鰓棄丟,用利刃在鰓蓋後及尾柄兩點各割一刀[即沿住魚體側之側線頭尾兩點],兩邊都要做,將魚倒吊令到體內污血流出體外,有助消除魚肉之腥味。
 

(g) 勾鉛連結法及試地

船釣初哥最適宜使用波子鉛壓頂法,非常簡單實用。就係將魚絲穿過一粒適當重量子彈鉛或波子鉛末端縛上「散拉」魚勾,即係鉛可以自由上落直至緊壓魚勾頂部。

隨隨下絲,感覺到鉛的重量將魚絲帶到海底,鉛到底就會覺得魚絲不再下墮及輕晒,亦等於魚勾同時到底。這時可以輕輕將魚絲拉高一尺左右,並保持這離底高度作釣。又因為石底是高低不平的,有高有低或有大高石,不一而定,如果感覺魚勾頻頻勾石,不坊將魚絲稍為帶高些少。

因為採用呢個方法最容易試地和控制釣離底之準確高度,控制魚勾不同高度,可以迎合不同目標魚種慣常活躍的深度,增加撞魚機會,魚有分上層魚和中層魚及底棲類,通常班科,石狗公最聚底,扁身魚如立,火點等稍高,適當離底高度沒有固定的呎餘至兩呎左右,視乎不同釣點及不同目標魚種而定。
 

(h) 勾石問題

不論採用任何一種船釣法,因水流風浪關係,船停留在海中心垂釣時是絕對不可能如汽車般真正stop夾唔郁位。船是以緩慢速度前進或後退,令到魚勾在很大程度下和海底礁石發生磨擦。微微kick 下kick下現象非常似細魚食餌,其實用一簡單方法印證就掂,稍為拉高少少到魚勾自然離地,仲係有微微郁動振手,咁仲唔係魚咬。

反之勾死左個地球又點甩身呢?冇理由個地球可以俾你拉得起架。就咁用刀片界斷又好肉赤唔見左幾十尺(有可能七八十尺過外)。你可以做輕輕拉下又鬆下鬆下又拉下或者彈下之動作,睇睇有冇可能將隻衰勾帶番出來。

如果都係唔得就索性扯鬼斷佢,不過千祈唔可以用手或手指咁笨,因為魚絲很刃會將手皮界破。用絲牌將魚絲全部繞起晒直至絲被繞到冇tension為止,跟住用力猛然一拉。假使間發覺個釣點係勾石到飛起的排口就不坊將魚絲帶起多少就就。
 

(i)真實謊言

艇家說話不可盡信,佢通常都會講番上次或前次魚穫點好點好法,不過今次就差左d,查實佢次次都係講緊至叻果次,報喜不報憂相當於部份釣友成日都話大咬特咬,其實香港重邊鬼道仲有又密口又大條魚釣既地方呢,有都唔到你同我啦!

重有,同一釣點你上一次大豐收,今次可能食蕉,又或者上次勁蕉今次釣到笑。因為水流水溫等會影響魚類正常活動又或者時間唔夾。最緊要係排口,釣點聚魚與否及配合適當之客觀條件,咁你就唔會大敗而逃。
 

(J)基本常識
  
近年來魚穫顯著銳減,釣者不能單靠運氣,技術或經驗,更須充分了解各種魚的習性,加以釣魚常識,才能有好收穫,因為不同魚種有不同棲息處,而活動範圍亦有所不同。因此選擇釣點應最為重要,魚餌次之,技術排到最後,假使釣點根本冇魚存在或活動,任何技術都不能發揮,舉例釣警界心強魚類;如黃腳立,黑立,花鱸等,夜釣就會比日釣好得多。還有釣淺水魚要留意魚絲一定要拋開遠離影子或切勿背著陽光釣,呢d都係基本常識。

魚類攝食本能可以透過視覺,觸覺,嗅覺,聽覺和感覺等,潻黑晚上也可以利用感覺器官如鼻孔,側線等進行覓食。大部份魚類對會動的東西十分敏感,甚至很細微的動作也能精確的感受得到。如果巧妙地拉動魚絲,可以達到吸引魚類的效果,而動態和靜態餌食因拉動與否有完全不同的效果,尤其是在魚隻不大活躍的季節?。
 

(K)風勢與船釣

船釣最大忌是吹大風,日曬雨淋可以抵擋,唯獨是大東風一起,幾乎所有船釣活動都要停頓(西水除外視乎個別釣點而定)既然不能去撞魚機會較高的釣點就要退而求其次,往背風處其他釣場試試。不過有一現象就係大部分背風釣場都是不大聚魚的,亦等於食蕉機會相應提高,呢點要有心理準備。

因此釣魚前要留意天氣預報,例如風向級數等。以我個人經驗釣東水及東南部外海一帶,東風級數極限為4級已經海面起波浪船身微微搖幌,下絲比較困難,可以勉強「頂」得住,5級東風或以上,不獨冇魚釣,甚至會影響釣者的安全。如果是東北或東南風因山勢和地勢關係,風勢相對會緩和得多。其他風向,假若達到4,5級或以上風勢都會相當強勁,出艇要小心衡量釣點與風向的位置,才作出適當的決定。

順帶一提,chok魚之動作大細亦因水的深淺而略有分別,淺水魚只須輕輕一「?」順勢隨隨收起即可,數十尺或以上深水位就必須猛力抽起如打拋拳般過頭。因絲長有tension及魚絲有機會呈孤狀或傾斜魚勾是不能即時被帶動的。
 
 

(L)氣數問題

釣魚除了技術,知識之外,始終都係有多少運氣因素存在的。因為大自然既變化你唔能夠控制,如天氣、水流、水溫等影響魚之正常活動及生態。我有一經驗就係當你果日唔好彩勁[香],千祈唔好死[螺],捻住臨尾 [柯]大尿搏番咀,倒不如早走早著,留番下次再砌過,當如今次供左會下次來標會算了,就算你釣到天光都係有機會註定白果的。

仲未算,假若望到隔離艇有d好野起緊,唔得切[扑]埋去搏分番一條半條,通常結果不特止冇,重睇住人家起多幾條添。釣魚既野就係咁,只有錦上添花,冇雪中送炭,就算俾你中番條好野都唔好咁快高興住,仲有[撻手][崩口]果d衰野等住你。釣得到,固然好。釣唔到都莫強求,能夠絕處逢生,臨尾收回失地呢個例子唔條冇,不過少d啦。還有一經驗,通常好魚果日差不多一起步就有番咁上下,越釣就越順,淨係上半場已經頗有睇頭,呢d日子唔係咁常有架。天時、地利、水流、運氣全部夾到正,正是餌又靚時口又開,一於砌晏d,搏到盡,最多俾O.T.艇家。記憶所及,好多次豐收臨尾仲會扯多幾條好野,真係富者越富;貧者越貧。不過有少部分操守唔多好既艇家我曾經遇過,佢話夠就算,唔好去咁盡,橫掂收夠籌,不如早d走。我啋你才怪,咁難得既一日叫我早d走,咁好彩既野點解唔用到盡呢。呢日肯定流水又好,夾晒時辰兼且適逢晚黃,釣大兩條一d都唔出奇呀。