（ａ）租艇方面
如果直接在落船地點或碼頭海邊租艇，一定要和艇家講價，佢地通常開價特高，還要講明去何處釣，以免拗，因為有部份艇家冇乜職業操守，為了慳油，根本唔願去遠ｄ及走位，明未！
 

（ｂ）魚絲方面
艇釣最好唔用壓縮絲，尤其深水釣位，一來價錢貴，二來彈性較大，如果水深超過五六十尺完全失去感覺，好似楂住條橡根咁。
 

（ｃ）天氣方面
如果吹東風四級或以上堅持出海，而釣點係東海或東南部通常 都係要走去ｄ避風位釣多肯定，食蕉食到暈。若果五級或以上，根本就不宜出艇免生危險。

天氣不佳，例如狂風雷暴等就要取消釣魚活動，避免意外發生，至於炎熱天氣身體大量流失水份要帶備充足飲料及戴帽等，著鬆身薄長袖衫褲及搽上太陽油以抗猛陽光。
 

（ｄ）身體狀況
有部份人未必可以適應船釣，因為暈船浪，呢樣野認真辛苦又嘔吐又頭暈，最衰有排都未夠鐘走人，簡直活受罪。可以試試落艇前半小時食定暈浪丸或載暈浪手腕，盡量望遠處及唔好食太飽落船。至於有無效就唔多清楚，最好話番俾我知！！

（ｅ）安全問題
最好就要識游泳，常言道欺山莫欺水，尤其是纖維小艇，因為船底是非常濕滑的，有時騰來騰去走動更加要小心。至於自駕小艇落錨就要小心計計位置通常都落在人工石駁，山邊或岩石邊，因水流風浪關係是有機會將小艇沖上石面或撞駁容易發生危險。另外往返途中更要留意航行船隻。
 

（ｆ）操守問題
艇釣時魚勾偶而會勾中漁民放下之網籠延繩釣組或魚網，切記不要破壞或取去魚穫。
 

（ｇ）環保問題
切勿將汽水罐膠袋等廢物棄置海中造成環境破壞污染海床，應離船時把廢物帶走。

至於釣得太細的魚穫應即時放生，絕不可留，避免破壞自然生態，自食其果，引致日後大嘆釣無魚。