大澳聯屋排排訓
作者 電波釣魚網   
2001/10/28, 星期日
《大澳聯屋排排訓~試水編》
日  期 :二零零一年十月廿八日(星期日,農曆九月十一)
時  間 :09:30~16:00
釣  點 :大澳多個釣點
釣  法 :筏,投,手竿,前打
釣  手 :技安,肥寶,黑咪,威鱸公子
釣  餌 :紅蟲,死蝦
釣  獲 :魚仔,蝦仔,蟹仔

如你也有新料欲與網友分享,請連同簡單資料電郵至 這個email住址已經被防垃圾郵件程式保護,您需要啟動Javascript才能觀看

(文:田鴨大人 @ oct 2001)

( 序 )

話說本大人有日上仄窿,見到武七叔,就隨口問句,大澳團有冇安排試水,武七叔話唔駛試,去到隨機應變就得....本大人諗諗,好似有o的唔妥當,不怕一萬、最怕萬一!咁就落個柯打,叫幾個又唔識釣魚而又爛釣o既友仔,去踩踩個場先,免至到時哪手唔成勢,唔知點執生就敝!

(文:黑咪 @ oct 2001)

( 試水報告 )

田鴨大人開到聲,我就梗係老死都去喇。(即使田鴨唔開聲,我自己都諗住去玩o下喇!!!!)但係由於工作關係,聯絡爛釣友o既責任,就交俾技安搞咯,我返o黎就有得玩,何樂而不為呢????約好八點半前等,搭九點車,我就要玩倒塔咁早,六點鐘要起身....媽呀....爛釣危害爛訓者樂趣!!!!!

約o左肥寶,威鱸公子一齊出發,到東涌 join 埋技安,四人搭巴士不如打的,半粒鐘唔駛就到,多o的時間周圍睇,正!!!

落車向出睇,周圍都係水,個景靚絕。但係技安話,o的水好淺,最多心口咁高,水退就唔係好掂....下邊幾張相,大家可以比較比較.....
 

大澳巴士總站向外望
,周圍都係水,正!!!
水漲時船可通行,
水退後就得返o的泥!!!

無謂多講,行去睇o下先....技安恃住係大澳地膽,由佢話事,首先帶我地去寶珠潭同天后宮(田鴨大人按:其實寶珠潭在左,天后宮在右,好近o架咋!!!)寶珠潭畔有休憩區,燒烤爐,廁所,設備唔錯,又可以釣魚,有鱸魚,海水福壽,
魚,大青蟹,大草蝦,夜釣收獲應該唔錯。不過我地今次係玩上午,風又大,釣獲好一般。玩o左一陣,就轉去天后宮後邊粒出水石....
 

寶珠潭同埋天后宮,
只係一條小徑之隔。
有得坐,有攔竿,又有水,打沉底就最一流喇!有個口痕友話,最o岩就係o響度摸摸阿寶珠個底o勒!
咁大隻草蝦,蒜茸開邊蒸
o左佢喇!!!!
隻青蟹超過十兩重,羌蔥屈
o黎食都好啵!!!

唔係嘛,唔駛頂礁艇,我都上到去個磯位???望過去,有靚靚炒白位,粒石又好企,冇釘鞋都冇問題!!!上o左去至知,水太淺,大約只有五六呎,o個處係冇乜景o既....技安向外一指,話磯位係o響另一邊。挑,玩我????魚訊唔少,不過好細,鉤大難食,換個淫鉤,技安就即刻上幾條,我都不甘後人,整番兩o野,肥寶得一科~~投,但係風太大,影響佢o既表現,威鱸公子開枝前打,又係得個桔,終於搶o左技安枝蝦竿玩直感,先至上條狗仔....哎,又係一個字~~~削!!!!!
 

遠睇好似好正,睇真就好唔掂
,點解?水太淺之故!!!
炒白位,今次考起黑咪!
原來條罅太闊,跳唔過!!
威鱸公子前打無功而回!!! 肥寶沉底難敵頂頭風!!!

中午暫時收工,食過中飯轉位去碼頭,條路就好好行,不時蝦香陣陣(好彩唔係蕉香o即!!!!!)(田鴨大人按:蝦香又好,蕉香又好,你地班友仔咪又係...嘿嘿...)個碼頭好繁忙,一架船出另一架船入,冇時停過,即係得一邊有得玩,我開枝小磯當前打玩,有三幾口唔錯o既魚訊,不過因為太削而起唔到!!!後來竟然釣上一隻大寄居蟹,記得花尾話,呢種o野好鬼得食,我就借o左佢條尾o黎試o下...
 

大澳碼頭,船如流水!!! 邊個咁冇陰功,快o的還返
條尾俾我!o下,做o左魚餌??

睇返另一邊,三條友仔都好灰,只見釣竿起,不見魚上來,走喇!!!

回程行過橫水渡,有個叔台賣魚,口多問佢,條五o野黑鯛點樣釣o架???佢笑笑口話,魚邊駛釣o架,用魚籠浸返來o架嘛!!!!o下????咁大條都係浸返來???咁我o的竿咪可以全部送去將軍澳囉!!!(田鴨大人按:你俾哂我同你車過去堆填區,最緊要係枝櫻子啵...)

時為下午四時,等巴士條人龍幾里長,又冇的士,打上的士台又話冇車.....哎,都係幾線發展,一個排巴士龍尾,一個等巴士龍頭(等死雞位),另外就一直等的士同打電話上的士台,擾攘半粒鐘,終於都上o左巴士,完成我地咁悲壯o既試水之旅!!!