洛杉磯反恐怖行動
作者 拉丹   
2001/10/12, 星期五
《洛杉磯反恐怖行動》
日  期 :2001 年 10 月 12-13 日 (星期五晚 ~ 六朝)
釣  點 :美 國 洛 杉 磯 Redonald Beach (King Habour)
釣  手 :Le'Dan、Anthony
釣  法 :港 式 投 釣 、 投 竿 浮 波、投 竿 無 鉛 放 流、筏 釣
釣  獲 :請 留 意 內 文

 

文章、圖片 : 電波網駐洛杉磯記者 Le' Dan @ Oct 2001

上次 Santa Monica Beach 零魚訊恐怖事件之後,我開始對洛杉磯既魚獲感到失望。唔通洛杉磯真係冇魚釣?唔通我就咁要收山?

自從我篇釣魚報告出左街之後,都有幾位美國既網友聯絡過我,而其中一位就係住係我屋企附近既 Anthony。Anthony都係香港人,佢過左黎已經差唔多三年,所以對呢面既釣點、釣法都有一定既認識。佢話洛杉磯呢面好多魚釣,D魚仲好豬兜添!經過零魚訊恐怖事件之後,我打死都唔信!最後,Anthony 就約我係10月12日晚出動,由佢親自証明比我睇。

我地先約埋一齊去食晚飯,晚飯期間講開原來 Anthony 都係我地電波釣魚網既長期忠實 CDR (Read Only) fans,佢由未開網已經一直追到依家。席間,Anthony 居然詞無輪次,佢話可以同電波元老一齊食飯係佢既榮幸,聽到我連飯都機乎噴埋出黎。唔通電波真係世界各地都咁受歡迎?你話呢?

食同埋噴完飯之後,我地就去左附近既超市買魚餌。呢面唔興用蟲餌,所以釣店都冇蟲餌賣。就算我想用蟲去釣都唔知去邊度捉蟲,所以就跟據 Anthony 提供既線報,買左兩條池魚仔打算起肉做餌。攪掂左釣餌之後,我地就出發去我地既目的地........... 洛杉磯秘竇。

大約四份三粒鐘左近,我地已經到左釣點。我一落車,就見到一個好古怪既告示牌,告示牌上面寫住 "10 FISHING ALLOWED" ,到底點解呢?唔通只準十位釣友作釣?唔通呢個叫做 "10號釣位"?再諗多一陣,會唔係 "10" 字樣係由 "NO" 字演化而黎既呢?不過我潛意識話我知 "10" 就係 "10",係 "NO" 既可能性一定唔高,嘿~嘿~!另外,告示牌下面有個圖案,不過我睇極都睇唔明,唔知大家又有咩頭絮呢?嘿~嘿~!

釣位係 Redonal Beach 附近既一個類似避風塘既石邊,屬於一個 IIA 級釣點 (青少年在家長陪同下亦可前往)。石邊附近有一條長長既石壆,不過只係兩呎半闊,行起上黎都幾危險,屬於一個 IIB 級釣位。由於條石壆上面已經有幾個墨佬 (墨西哥釣友) 打躉,所以 Anthony 就提議先去附近熱門釣位睇睇,等夜D先再黎釣。到底係咪真係越夜越有機呢?希望轉頭返黎唔好超過 10 人釣啦!唔係冇得釣就真係大檸樂飲十杯都順唔番條氣呵!

上左車行左三幾分鐘,又到左另一個釣位。果度都唔錯,格局有D似香港既西隧一帶既釣場。當然我見到有十幾人係果度釣緊魚,佢地用既架生就以輕裝備為主,有人打沉底、有人玩浮波。我望住海上面浮下浮下綠色既螢光棒,唔知點解突然間覺得有一種好親切既感覺。有D似係異地見返個老朋友一樣,又有D似岩岩著左乾淨既衫咁,好soft、好爽、好舒服。我望住個浮波隨住水流咁越漂越遠,心諗美國既釣友都幾有耐性,放流放咁耐都唔收返個浮波返黎。隔左一陣,個浮波終於由各釣友既眼中消失得無影無縱,原來個浮波晨早已經解除左世俗加鎖,展開佢既太平洋長征放流之旅。

送別左個浮波之後,Anthony 就帶我行去其他釣位,Redonald Beach 既釣位實在太多喇!途中都有D租船、租同賣釣具既鋪頭,不過當時夜嘛嘛已經關晒門。行完一輪之後,我地就車返去 10 號釣位。

返到去,剛才果幾個墨佬仲未閃。不過唔理得咁多,唔去直壆都可以係附近既地方打沉底。於是,Anthony 就開始準備魚生做魚餌,而我就開我支至愛3號11呎韓制投竿。Anthony同我講,佢話果個釣位最好唔落鉛釣放流。不過我唔信邪,覺得唔多唔小都要綁番小小鉛仔落去會安心D,哈~哈~!最後我都係用返港式既投釣試下先,唔惦先再轉變陣。

2001年10月11日晚上11:30pm,我終於投下左神性既一竿。到底,我有冇比阿 Anthony 撚化呢?我會唔會又係零魚訊呢?我會唔會又走口斷口呢? Anthony 會唔會又冇料到呢?一切一切留侍事情發展!

我投左竿之後一直係度等,等左成五分鐘都係零魚訊。過左一陣,Anthony 已經綁好晒釣組,佢係用無鉛全飄釣法。佢行左去石壆多近,佢一拋,唔使一分鐘,即刻有料到。佢一抽,即刻開始同條魚駁火,條魚返應都幾激,都有返D力咖。唔通真係陀地惡晒?一放落去就有料到?天啊?!玩左一陣,我地第一條魚終於不敵上水。第一條魚係 "Mackerel",大約有10寸長。呢種魚魚個樣同香港1999年7月份既鮫魚有D似樣,又有D似吞拿魚。真係好好飛,簡直渾身是勁!

Anthony 解魚之後就將條魚放生,我叫佢 hold 住比我影返張相交差都趕唔切。佢仲話:”唔怕!陣間一定有好多!大把機會影啦!”係真唔係呀?唔通佢釣技真係咁堅? Anthony 再次投竿,又係唔駛一分鐘,又釣到另外一條差唔多12寸長既 "Mackerel"。

誰說不可不信邪,邪到不可不相信~!據我明查暗訪所知,我地到之前果幾個墨佬釣左三、四粒鐘都只係釣到一條魚。Anthony投左兩次,兩次都好快就中魚,而我同幾個墨佬支竿都係郁都未郁過,唔通我真係遇上左洛杉磯魚神?係就冇死喇!

我見勢色唔對,都係轉下釣組穩陣,試下偷下師完全唔用鉛玩下先。當我剪左絲之後,我突然間心血來潮,不如試下用浮波啦!於是我就綁左個浮波釣組,水深釣四呎。

我投出去之後,唔使十秒鐘個浮波已經唔見左,唔通又玩太平洋長征放流?唔係,原來係有魚食餌,我一抽,中呀!呵~呵~呵~呵~!Anthony 真係冇老點,真係有料到呀。條魚一中就直中入水,於是我就頂,收下放下,因為怕嚇走下面璣魚,所以我就唔係玩左好耐就的左佢上水。登~登~登~登~! Ladies and Gentleman all attention please! Le'dan 係美國終於釣到第一條魚喇! 佢就係一條差唔多12寸長既 "天婦羅"。條魚一上水就係沙地上打滾左好耐,所以佢成身都係沙,成舊 "天婦羅" 咁款。再睇真,佢原來都係一條 "Mackerel"!Anthony 就第一時間走過黎幫我解魚,佢手腳都幾快,真係一個做魚僮既好材料。佢解左勾影埋相就張條魚放生。

哈~哈~!好!唔好比佢停~!我見個勾仲有餌淨,就第一時間再投。又中呀!呢次條魚既力比上一條大,於是我就同佢夾下8字。原來8字同佢都幾夾,所以我就趁勢彈佢上水,又係一條"Mackerel",都有12~15寸長,Anthony 又再次幫我解魚。
* repeat x 7 (請將本段連讀七次)

如是這,我一口氣釣左七條磅頭至斤幾既 "Mackerel"上黎,而我身邊既魚僮就忙過不停,唔停咁解勾放魚、解勾放魚。解勾後我地都係採取即捕即解既政策,唔入扣既一律留勾留命。好彩只得一條入左扣,其餘放生後都可以重過新生活。到左第一舊餌釣左七口之後,我舊餌已經變得好細舊,但係我都想試下一舊餌可以釣到幾多條,哈~哈~!結果,我証實左一口餌係可以釣八條磅/斤頭魚。

D魚真係好易中,我覺得好似比田中上身,我指既"田中"唔係電波網退居左幕後果位,而係釣界名人"田中釣心"。哈~哈~!實在多魚得太過份喇!我支3號竿殺氣指數係登時轉變左紅色。由於只手有D痺,所以都係抖抖先。抖緊果陣,我係度諗點解?點解果度D魚咁易釣咖呢? 唔通D魚收到風 "電波魚神 Jorden" 最近大壽唔出黎釣魚住,所以比平時鬆懈?

休息左一陣,睇睇隻錶,原來已經十二點半。我地兩個期侍已久既時刻終於來臨喇!果班墨佬終於執野走喇!我地可以試試夢幻釣點~~石壆,石壆亦係唯一有以玩到筏仔既地方。果班墨佬原來都古古惑惑,我地密密起既時間,佢地又密密起。不過佢地起既係斑而唔係 Mackerel,佢地四個人都有四、五條磅頭以上既斑咖。為左令到呢篇釣獲報告更精彩,我地特別情商左其中一條斑仔客串做我地既特別嘉賓。好~!斑仔唔該望望鏡頭,三、二、一.....笑!
(嗚謝 : 墨佬們借出魚獲供拍照)。

原來班墨佬霸左個靚位釣斑,所地都係用投釣重鉛去加速釣餌既沉降,以避開 Mackerel 既泳層,結果釣到D好野。除左果四、五條斑之外,佢地仲釣到一隻大龍蝦。當然,果隻龍蝦都比我地借埋黎影相。

Anthony 佢未玩過筏仔,於事我就試下玩筏仔比佢睇下。因為我用輕鉛,所以舊餌都未落到底就比 Mackerel 惡性侵犯。用筏仔我帶左幾下,第一條中既魚好大力,我一手都唔比佢......的話支竿一定炸硬,所以放完一手又一手,完全冇得還拖,支竿仲不時有格格聲傳出。玩左成分鐘,最後條魚甩左。唔怕啦,學 Andy Wong 話事齋:”成海都係魚,釣唔到係你削~!”我再黎過,一連氣又上左四、五條。而 Anthony 又繼續放流,結果又釣多十條八條。佢咁多條魚當中,有一條有成呎半長,佢支竿都幾乎唔夠力的佢返黎。到左差唔多一點幾,我支筏仔又一次受到嚴峻既考驗。條魚同筏仔第一條不相伯仲,條魚好大力,好肯走水,簡直入左"勁量",渾身是勁。玩左好耐,又同佢夾左好耐8字,最後支筏仔都唔夠力彈條魚上水,結果只好用人手拉,拉左2-3米之後,終於上左岸,原來係一條呎半長既 Mackerel。由於隻手頂魚頂得多攪到好痺,所以耐唔耐都要休息下。

呢次既反零魚訊恐怖行動好成功,原來洛杉磯真係好多魚!雖然呢次釣魚既時間唔係好長,但係我已經覺得好正,好耐都未試過有爆釣既感覺。我地釣左差唔多兩個鐘,釣下、停下都總共有成三十條 Mackerel,不過就一條斑都冇。下次如果有機會再去,我會試下主力釣斑。

如果有住在 洛杉磯 知道有咩秘竇,歡迎你約埋我地一齊去釣啦。