洛杉磯恐怖突擊
作者 拉丹   
2001/09/29, 星期六
《洛杉磯恐怖突擊》
日  期 :2001 年 9 月 29 日 (星期六晚)
釣  點 :美 國 洛 杉 磯 Santa Monica Beach
釣  手 :Le'Dan、Kan (移左民既香港人)、kan's 表妹 & 表弟 (秘魯華僑) 共四人。
釣  法 :港 式 投 釣 、 港 式 手 絲
釣  獲 :零 魚 訊,你 都 咪 話 唔 恐 怖

 


文章、圖片 : Le' Dan @ Oct 2001
(圖片仍 Le' Dan 之前一次到訪該釣點時拍下,並非當晚圖片)

唔經唔覺黎左美國洛杉磯都成個幾月喇。我係呢面人生頭不熟,依家仲未買車,而最慘唔知邊度有釣點,所以黎左咁耐都未釣過魚。上個星期初突然好手痕,於是我就好落力咁勾搭左呢面D新朋友一齊去釣魚。我當然小不免叫佢地睇睇電波網既釣魚舊聞,再用D網友既釣獲圖片去導佢地昇仙。幾經波折,電波釣友既洛杉磯分部第一擊釣魚團終於組成。

我地既目的地原先係 ReDonalD Beach,不過美國分部都係同香港總部成立初期一樣,鐘意隨時改釣點。最後因為貪方便,捨遠就近,去左 Santa Monica Beach。 Santa Monica Beach 其實係一個旅遊區,有一個海岸線好鬼長既沙灘。而沙灘旁邊有一個專昆遊客錢既摩天輪,仲有三、五、七間冷係有情調既餐廳。餐廳對出既兩旁,有幾十檔賣紀念品既檔攤仔,仲有唔小人賣藝添咖播!由餐廳直行,就有一個用木搭成既碼頭,由岸邊一直伸到出去大海,長度起碼都有幾個標準泳池咁長,都幾大、幾闊、幾靚咖。行到去最盡,就係一個睇起上黎唔錯既釣點。碼頭下邊有好多樁柱,比我既感覺有D似香港以前既陰澳。咁多樁柱,照計都會幾聚魚。

呢個釣點我今年六月份過黎美國探親既時候我細佬都帶過我去釣過兩次日水,結果兩次都係白果收場,所以我地呢個釣點都冇乜好感。上兩次可能係魚餌唔岩所有機會感受到絕對零魚訊既滋味。咁,唔知呢次收獲又會點呢?我呢次選擇左係用魚仔黎做魚餌,貪佢個身反晒光,啖啖肉。

大慨夜晚九點幾,我地一行四人行到去沙灘邊果陣就已經發覺周圍都好鬼多人,因為實在有太多旅遊客喇!夜既既 Santa Monica Beach 仲比日頭旺。行到碼頭既盡到,終於到左釣點。原來釣點都係一樣咁多人,每隔三幾呎就有一支竿,情形簡直可以媲美星期六、日既太古城海濱公園,真係插針都插唔落。

由於只有我有帶魚竿同埋魚排,所以一去到釣點,我就好鬼忙。我開左兩支竿去釣,一支係我既至愛 11呎 3號投竿,另一支係假餌竿,釣法係打沉底投釣。開好竿後,我再開多兩個手牌比阿kan 既表妹同表弟。攪掂晒之後就四周圍睇睇,睇睇陀地釣友既釣法之餘,最主要係睇睇附近有冇靚女,哈~哈~!陀地釣友以墨西哥哥仔居多,佢地多數都係用船竿同勁橫絞,相比起我果兩套香港常規岸邊投釣裝備,佢地真係重火力過我好多。唔通下面真係真係有怪獸?我既裝備會唔會唔夠砌呢?

我既裝備會唔會唔夠砌呢?據聞當日下晝有人釣到一條三十幾寸長既鯊魚仔。條鯊魚仔更表演掃場添,佢由碼頭右邊一路掃過去左邊,掃完場攪完十大輪臨上水果陣先斷口。我當時好期望,希望可以試一試我套港式裝備夠唔夠砌。

所有陀地釣友都係將釣組有咁遠?咁遠,只有我拋入樁底。我堅信樁底較為聚魚,所以我就主攻樁底。唔知佢地會唔會當我傻既呢?哈~哈~!當我聚精會神之際,我眼尾立到有一位釣友抽左D唔知咩野上黎,一上水就搵報紙包埋,鬼咁神秘唔比人知係乜。不過抱著電波精神、八掛過人既心態,我就打聽下到底果舊係咩黎。係唔係魚獲呢?有幾大餅呢?打聽之下,原來佢中左隻差唔多一呎長既龍蝦仔,而跟據當地既法例,龍蝦仔係唔比罹走,所以佢先咁緊張、咁鬼鼠咁收埋隻龍蝦仔。

講開犯法野,據可靠線報,美國呢面釣魚原來要先罹釣魚牌。釣魚牌有日票同埋年票之分,但係當日我地就貪方便冇走去罹牌。雖然最後冇比人拉到,但係始終釣都釣得唔安樂,成日形住會比人掃場,所以下次都係咪制。

釣到十一點幾,唔單只我,就連我身邊果幾十位釣友都係零魚訊,真係不可不信邪。,我見班朋友仔已經停晒手,於是我就開始執野撇!廢事佢地三個等一個啦!

以前睇電波網討論區,成日都有人問~~邊度多魚釣呢?邊度有大魚釣呢?呢兩條真係好難答,因為如果有咁既釣點,個個都去左爆釣啦!仲邊有咁得閒上網播!但係,我都好想係度問一句~~ 洛杉磯邊度有大魚釣呢? 邊度多魚釣呢?咁唔知有冇人可以答倒我?哈~哈~!

早排睇過美國網友釣魚密仙先生 (Mr Fishing Machine) 既釣獲,真係睇到我流晒口水。大家都係係美國之嘛,點解魚獲會爭咁遠既?點解?點解?唔通真係十個電波,九個堪坷?終結呢次釣旅,如果十隻蕉係滿分既話,呢次我會比夠十二隻蕉。真係好懷念早兩年香港三杯酒一帶既澳洲feel艦釣、好懷念廊底釣極都釣唔晒既石狗、而最懷念都可以算係香港一班逢局必到逢到必早既爛釣魔鬼朋友。

P.S. 如果網友有 L.A. 既釣點提供,請聯絡 Le' Dan 吧!