CKF馬拉遊記
作者 CKF   
2001/07/23, 星期一
《CKF馬拉遊記》
日  期 :2001 年 7 月 23 - 30 日 (八天)
釣  點 :馬 來 西 亞 - Johor Baru

 


 

 


釣點位置圖 (放大地圖)

第一天 : 23/07/2001

人物 : CK + CKF
地點 : 香港 --> 星加波 --> 馬來西亞既Johor Baru

飛機上,兩名俊男高談闊論,誓要破上次紀錄,正當有吹水無抹咀時,忽然有個靚靚既“加老凸胸姐”一野“隊”埋黎,問要汽水嗎……..。就咁兩條友仔就流哂口水咁,一路飲汽水,一路吹水。

到星加波機場,CK個馬拉朋友良哥,已恭候多時,一上車就直過馬拉,再跟手車去一所擁有一個大露台,面向星加波河畔,絕對係“舢舨”feel既海鮮餐館。良哥做東道叫左條馬拉白鬚公魚 (類似塘蚕魚),四隻超巨大羅氏蝦,馬拉炒蜆,馬拉串燒,再加幾個地道馬拉菜,四條友食到反肚,正 :P

食完後,良哥就車我地番去佢間八千尺既豪宅,比間客房我兩過夜,真係舒服到震,話時話佢個客廳大過我間屋呀,哈~~~~~~~唉~~~~~嗚~~~~~。
 

第二天 : 24/07/2001

人物 : CK,CKF,良哥,亞Lee,Alan,
導遊亞古丹(武哥)

地點 : 本陽蒙(Burnyaemon)釣魚台( Katlong)

倒屎咁早五點出發,食早餐後到碼頭成十點,join埋三個馬拉人,一行九人就咁操去Katlong

今次呢個Katlong比上次個細D,伙食就麻麻,加上污糟又人多,根本無乜好位可釣魚,幾個好位一早已比班波仔插住,係用魚杆,咪唸錯呀 (圖4-6)。

就咁兩條友走左去個靚位………….釣魚,眠一眠 (圖7),海風陣陣吹來,真寫意。一覺醒來,夠鐘出船艇釣,執齊傢生上船就駛左去三粒島最右邊個咀口 (圖8),可惜魚訊其少,只有一口,CKF用港式勾蝦槍生蝦釣法,隻蝦曉彈下彈下,隨手一抽就中,再連拉幾手,以為無乜反抗力,點知就乃野,條衰魚開Turbo,係咁出絲,走到無雷公咁遠,仲玩埋燒手,CK見狀即刻幫拖,CKF就趁機戴手套再接力,唸住同條魚死過,一上手就拉兩野,即斷,當堂無哂心機 (圖9-10)。55磅子線齊口咬斷,估計可能係3Kg哨牙仔(大青衣),真黑 L !!!

回Katlong釣夜水,可惜魚訊極少,成晚得兩條大眼鯧仔 (圖11),都唔知點解傳聞呢個Katlong好好魚,CK話呢個Katlong永遠無下次。

 

第三天 : 25/07/2001

人物 : CK,CKF,導遊亞古丹(武哥),本地馬拉三人 (圖12)
釣點 : 刁曼島附近海域艇釣

今次包左隻魚船,由Katlong出發,去左個有散石底既海中心垂釣,用亞波羅式(Apollo)釣法,即一條絲六個勾,鉛在最底,係咁起魚仔,有烏絲班,紅衫,雞魚,畫眉同馬拉四寶(即青鱗,花鮫,池魚同黃尾仔)等等 (圖13-18),最多係黃尾池,約六兩重,釣左兩個3’x 2’x 2’ 既大冰箱 (圖19-22),由開心過足手癮至發瞞,到最後走去睡覺……..。

入夜後,艇家車去偷起人地個巨型捕魚籠,內有格子魚(細鱗),石班,石頭魚,雞泡等等,約兩斤size (圖23-25)。

CK + CKF討論後認為,無理由我地比錢,你走去起魚,跟導遊講想釣大魚後,結果艇家車左去一處好黑既海域拋撈,成晚CKF隻魷魚就“零魚訊”,CK話發夢斷一口,其他人就得D三尺海狼,小鯆魚及小沙魚等,收獲一般 (圖26)。

天光轉位博粗野,又係得D半斤裝既雜魚,CKF轉用六磅手絲玩半斤魚 (圖27),港式釣法,又幾好玩,有D feel。整晚全程無巨物,刁曼海比想像靚但無粗野。回航馬拉友玩拖釣,可惜無收獲 (圖28-29)。

 

 

第四天 : 26/07/2001

人物 : CK,CKF,導遊亞古丹(武哥)
地點 : 刁曼海-->Mersing 港--->Johar Jaya(柔佛加怡)

中午回著名既 Mersing 港,馬拉友就分魚 (圖30-32),我地就去沖涼,再搵間泠氣餐廳食Lunch,仲指明要食 "哨牙仔" 炆魚頭腩,釣唔到條衰野,都要食番條補番條氣,食落又幾好味。

下午回 Johor Jaya 間又平又五既旅館 (圖33),小睡快 Charge ,一注香時間後,同良哥行街,食地道著名 "亞華貴刁" -- 即係肥蠔帶子肉碎湯河粉,真正 !! 由其係隻肥蠔。晚上,導遊亞武哥知我兩想中粗野,便介紹船長亞Hee給我們,並相約明日出快艇釣通宵。


 

第五天 : 27/07/2001
地點 : Desaru 海域

下午兩點出發,到沙灘整理裝備,點知隻Warship --(差D變水中號),入水,呢勻唔通咁黑,結果攪左成粒鐘,3條友仔仲攪到反艇,高高低低,先至完事,可以出發 (圖34-35)。

百五匹快艇向住個海係咁出,好似出大青針咁,去到連岸邊影都無埋,喜哥笑口淫淫地左望望,右望望,個海咩都無,唔知佢望乜,跟手掟個測深機探下個底,嘩! 個畫面竟然有條魚型物體游過,船長果然利害,一搵就有大魚。

講多無謂,拋撈開始作釣,即刻中魚,船長連起兩條 (圖36),每條約兩Kg重的吉鱸魚(頭鱸),CK唔執輸又上兩條 (圖37),但CKF無魚訊,心唸唔係咁黑仔之際,有口,一抽就中魚,勁 ! 仲好大條..........收到中途,突然走口,CKF即刻激到反轉左,變左FCK !!

入夜後,隻粉腸友仔CK大我 2 : 0 ,仲笑住口咁話好重,好似勾垃圾,扯上水原來係隻800g重既龍蝦,船家話要影相 (圖38)。及後,CK話個底好多垃圾,又收絲,第二隻龍蝦又上水,船家又影相,仲想叫CKF幫手影相,兩條粉人先知,原來CKF激到吐血身亡 !!

走位後,CKF中鯆魚,魚訊相當密口,細鱗,班,沙魚仔,畫尾,海狼,不知名魚,三條友成晚係咁起,斤頭貨色,幾好玩 (圖39-43)。


 

第六天 : 28/07/2001

人物 : CK,CKF,船長亞Hee (圖44)
地點 : Desaru 海域

天光後,回航,船長表示釣唔到目標魚。CKF輸 2 比 0 ,條氣頂住,要求重賽。於是去良哥屋企小睡三粒鐘快 Charge,再戰江湖。船長仲勁,補給後,居然走去飲茶。今次用Warship --(一定浮水號) (圖45-46),三扒兩撥就開航,直出馬拉大青針,到達時已見另一釣艇作戰中,已中頭鱸四條。事不疑遲開工,CKF先上沙魚兩條,再上目標魚紅鰽(大牙點) (圖47),重2.5Kg ,條魚都有D力水,係咁上下沖,玩左 2分鐘先上水,而CK只上斤頭班,船家就無魚。

入夜,輪到 CKF 勾垃圾,1Kg 龍蝦上水,終於到我影相啦,哈~~哈~~。

CK發夢途中,突然起身,無厘聲氣甘話中魚,只見佢碌15尺兩插船杆 U 左,又收又放,CK越抽越精神,大嗌好爽,條魚發爛喳開 Turbo ,只見CK碌野 2/3 枝飲左水,狂嗌救命,枝杆 U 到想斷咁,又上又落,玩左約五分鐘先上水,3.9Kg 大牙點 (圖48) !!

激情過後歸於平靜,三條友係咁ZZZZzzzz,CKF起身飲水,咦 ! 有魚,好重,又係咁向下沖,心知係大牙點,果然 2.5Kg 又多一條 (圖49)。船家見起流知開口,作出提示,未幾船家即中,手忙腳亂,同條大魚玩左幾分鐘, 3.5Kg 上水 (圖50)。正當大家聚精會神等待,船家又中,大叫好勁,睇住佢枝船杆D絲有出無入,出盡九牛二虎之力拼搏,根本無得還拖,兩分鐘過後,條魚贏左,50 磅絲拉斷,船家估計過 7Kg大牙點。

無耐,船家又一大魚上水,2.5Kg 金黃頭鱸,正 !! 一輪搶口後,再增些斤頭魚,便平靜下來,三人就睡到天光回航。


 

第七天 : 29/07/2001

人物 : CK,CKF
地點 : Johor Baru 咸水釣魚塘

兩晚通頂,兩人似死狗,於旅館內狂睡至下午,然後食地道"苦瓜湯",幾好味。再連行五間釣具店,買些平價魚杆後,食晚飯,一條五柳大牙點,一條清蒸頭鱸,一隻龍蝦沙律,三斤淡水梅花班清蒸 (亞古丹釣既),炸四斤大魷魚等等,十人食到反肚。

吹左一輪水,最後衝刺,去釣咸水魚塘,此塘位於河口,面向星加波河,塘內放有咸水魚,如紅魚,金目鱸,班等等,入場收費 RM$10/hr,三個鐘起,生蝦 RM$0.6/ 隻,另 RM$3 用作集資大魚獎,24hr 運作,塘約五尺深,有蚊要穿長褲。

買左五隻蝦,玩浮波釣法,用左四隻,中斤幾金目鱸 (盲鰽),此魚似花鱸咁在水面狂洗鰓,左片右片,相當好玩。其他人多數中斤裝紅魚,好多條。
 

第八天 : 30/07/2001

晨早打飛機回港,又要多謝良哥,良嫂等的接送,及熱情的招待,麻煩哂,Thanks !!!
其他相片既網址 : http://hk.photos.yahoo.com/ckfishing