四傻遊牧場
作者 電波釣魚網   
2001/08/26, 星期日
《四 傻 遊 牧 場》
日  期 :二零零一年八月廿六日(星期日)
時  間 :10:00~12:00
釣  點 :大丫灣畔超巨型懵仔牧場 (深圳火車站打的,車程約五十分鐘)
釣  法 :投釣(另可作手竿台釣,磯釣及筏釣,手絲釣)
釣  手 :肥羊,肥貓,肥寶,肥黑汗
釣  餌 :游水生蝦,游雪水死蝦(不可打誘餌)
釣  獲 :細鱗,紅鼓,火點,釘公,沙鑽。共約十市斤左右。

 

 

(文:肥貓@ sep 2001)


話說肥羊某日提起,大丫灣附近有個超巨型牧場,最o岩傻仔去玩,搵夠四個傻仔,就可以成行。那知肥羊竟然只係知道大約地點,唔知道詳細情形,連對口單位係乜水都未知,就膽粗粗走上去劈友。同行o既肥貓,肥寶同埋肥黑汗不知就裡,俾隻肥羊就咁擺o左上檯都未知,上到去至知道俾人賣o左隻豬仔...

星期日上午,八點正,深圳商業城大碌木快餐店,四傻集合,大咬開始...係早餐,食飽至算。竿套,冰箱,背包,車仔(用o黎裝冰箱o既),大大話話霸o左兩張檯,而且四人粗聲粗氣,惹來一眾食客則目。好少理,食完即走,話之你。

落到的士站,求其跳上一部,叫的士司機大佬去大丫灣,車行大約九個字,的士大佬話,我地要去o既地方佢唔識,要搵個摩托佬帶路,我又打電話又問人,結果都係要俾五個人仔個摩托佬賺!死肥羊,一早唔搞清楚,差o的俾人賣o左落社都唔知!好彩個摩托佬冇老點,我地九點半就到o左位,重搵到個靚靚知客小姐同我地搞掂。個靚靚知客姐姐以為我地係"籮拔",叫我地去任釣區,原來o個邊段斤計,起條懵仔就係咁先,最多係十斤左右,一斤三十八,十斤就三舊八!嘩,食o左我隻車咩!

講返個場先。外邊睇,成間海鮮酒家咁o既樣,唔知底細真係估唔到佢會有魚釣,入o左裡邊就原來別有洞天,一個大約係個半大球場咁大o既主釣塘,分AB兩區,A區任釣不限時,釣獲段斤以市價計,價錢都算幾公道;B區限兩粒鐘,釣獲限10斤,超額就段斤計,劃一15人仔一斤。B區計落應該有著數。除o左主釣塘,另外有好多個養殖塘,係用o黎養魚花o既,除o左一個入水池塘之外,都唔可以釣魚,但係距離主釣塘太遠,要行十五分鐘,而且路途比較崎嶇,冇人過去玩。不過入水池塘有五米深,分分鐘有超過二三十斤o既巨物,有機會我要去再玩o下個入水塘,睇o下真係有乜料!

主釣塘水深約米半至兩米半,用浮波仔分隔AB區,上邊重放o左一個浮台仔,俾人玩筏釣。場區周圍,有陽傘陽棚,戶外檯椅,台釣竿架,設備齊全,重有小食飲料同埋魚餌供應,咁就梗係要俾錢啦!我一邊開竿搞o野,一邊同靚靚知客姐姐打罵,佢竟然同我地講,話冇魚餌供應,張單張都話有一份死蝦供應o架啵,咁,唔通要我返香港買紅蟲咩!同靚靚知客姐姐打(情)罵(俏)一輪之後,佢終於都俾o左幾隻死蝦我地,連埋幾隻生蝦,收o左我十蚊,都算係物有所值o既。

我地十點鐘開竿,照計可以釣到十二點,但係太陽伯伯唔肯放過我地,一路照住,驚我地俾人蝦咁話喎,四個肥人終於都變o左四隻燒豬。全程其實乏善足陳,上餌,落鉤,俾魚偷餌,間唔中中魚,上魚等等,都係例牌菜。不過,今次騎喱o既係,肥寶中魚o既重量係四個人總重量o既八成,佢整o左七斤幾八斤,我地加埋哂都係得斤幾,你話啦。我都算好彩,有條釘公仔,同埋一隻成斤幾重o既大羔蟹,好正好好羔,羌荵屈就正啦。

肥羊好他條咁,放低枝竿學人玩"拉得走當佢win",坐響把遮底同個老細打牙較,有大大力魚訊都唔理,結果彈到第三o下,就成枝竿好似火箭咁,射o左落水,真係俾條魚win o左。點算呢?好在有個員工自告奮勇,剝o左衫跳落水,同佢執返返o黎,唔係都唔知點算!

釣完魚收竿,走上去間酒家食飯,老細走入o黎同我地閒話家常。肥羊口痕,問呢問嘮,搞到老細鬼咁開心,食完飯重同我地去周圍走,介紹佢個場o既設施俾我地睇o忝。

老細第一時間帶o左我地上去天台,真係可以睇哂個場o既全相。個場o既賣相十分之好,好乾淨好靚,而且規劃得相當之好,前場係酒樓,側邊就係釣場,向後邊睇,就有十幾個塘,全部都係魚花塘,主要係將o的一兩指大o既魚花養到大,可以放落去釣場或者賣俾其他海鮮店為止。再望遠少少,見到有一個唔算細o既養殖區,大約有二百幾格左右,原本對佢好有期望,但係後來詳細瞭解之後,發覺o個邊只係海市蜃樓!點解?你地睇落去咪知囉。

落o左樓,我地一直向前行,經過住宿區。住宿區係一層平房設計,有十幾間房,每間房大約有十二平方米咁上下,有空調同獨立衛生間,十分之歸一,而且地點十分之清幽,最o岩兩口子避靜(或者係兩個爛釣o既麻甩佬釣魚)。

再向前一直走,就係魚花塘,大大細細都有十幾廿個,有o的係養花尾躉,有o的係養懵仔,重有o的係養青斑、紅魚、紅鼓、火點、黃等等。最尾係一個入水過濾塘,講起呢個塘就巴巴閉o勒!點巴閉先?原來呢個塘係唔可以乾塘取魚o既!點解?因為成個魚場所有o既海水,都係經過呢個塘過濾,魚塘海水o既供應,就全靠呢個塘o黎供應,呢個塘一乾,就全個魚場冇水,咁就大大鑊啦!就係咁,由開場至到而家,呢個塘都未乾過,但係魚場方面又開始o既時候,放過唔少魚花落去,而且魚種眾多,有斑、花尾、紅魚、懵仔等等。佢地已經撈過,但係,由於呢個塘o既水深,足足有五米以上,佢地冇辦法去撈走所有o既魚,而且呢個塘真係好大,有成兩個籃球場咁大,好難將o的魚撈出o黎。我地當時都見有大魚游過,真係好得人驚!聽講話呢個塘o既魚,都係十市斤(即係五公斤)以上o既巨物,唔講得笑o架!


老細重同肥羊講笑,話俾我地同佢釣o左o的魚上來,只要我地唔取魚走,就唔收我地錢咁話!講住先啦,到時真係去釣至同佢計啦。敝,掛住傾偈,唔記得帶相機,冇相俾你地睇o忝!唔緊要啦,下次去o個時,我同你地一齊去玩囉。

搞o左人地咁耐,都係時間告辭啦。我地一聲"西洋娜拉"就想走人,點知老細同我地講,架巴士已經o岩o岩開走o左,要等多粒半鐘至有車啦,o下,唔係咁玩我係嘛?肥寶同老細講,不如去釣多一條懵仔至走咯,老細就話冇問題,三十八蚊一市斤,一條都係二百幾,你咪去釣囉!肥寶真係開返枝竿,用一隻手板大o既生蝦,真係放落去個懵仔池度,想搏大霧!釣o下釣o下,老細同肥羊講,話有架中巴要出深圳,車埋我地出去,一齊傾o下偈咁話,又好,慳返七十皮(直通九龍塘)。肥寶挪手唔成勢,收竿跳上車~~唔記得自己個套(竿袋呀,唔好諗錯隔離呀!)重係個靚靚知客姐姐同佢保管緊!哈哈,肥寶今次衰o左啦,下次去返啦!

(文:肥貓@ sep 2001)

 

~~同場加影~~

三傻再遊牧場

日期  : 二零零一年九月九日
時間  : 1100~1400
釣點  : 大丫灣畔超巨型懵仔牧場
當日釣法: 投釣及筏釣
當日釣餌: 游水生蝦剪成蝦粒
釣手  : 肥羊,肥貓,肥雞(是日肥寶同肥黑汗有事,臨時拉伕搵隻肥雞頂上)
當日釣獲: 細鱗、紅鼓,共七公斤(十四市斤)左右。

上次玩得唔係咁過癮,今次上去同佢死過,天陰陰,冇太陽,o的魚應該開口o的!由於肥寶同肥黑汗有事,臨時拉伕搵隻肥雞,佢話帶埋重火力去搞o野咁話喎。我就帶枝筏仔,玩o下另類。

上到去,發覺o的魚例完全唔同o左!(今次有影相,詳情你地自己睇啦,我就冇眼睇o勒!)點算呀?肥羊話你真係好o野,帶定筏仔,係咪有預感我地去試o下個養殖場先?我就笑笑口咁話:"你尋晚報夢俾我,叫我要帶筏唔好帶投丫嘛!"咁樣,我地就搵架車,車去個養殖場邊個碼頭仔,落車上艇...點知我一走落車,就有一個穿著畢挺制服o既人走出o黎問我:"請問你們是幹什麼的啦?"嘩,普通人講普通話,字正腔圓。
我就用半咸不淡o既"補充話"同佢講:"禾文處dell魚。"
軍:"哪請問你們有沒有証件?"
我:"油!"
軍:"請你拿來看看!"
我就將回鄉証同香港身分証俾佢睇,點知...
軍:"對不起,不是這個!你們有沒有漁民出海証?"
我:"妹油啵!"
軍:"沒有漁民出海証就不可以出海,這裡是邊防重地,為避免不必要的誤會,請你們快點離開!"

哎,點算?唔通我地冇俾上島費、出船費之類,o的有勢力人仕唔俾我地去玩?又唔似啵!同我講o野o個位解放軍,雖然用語好機械,但係都係好客氣又好專業,而且完全冇乜o野暗示明示,要我地俾出船費就可以去玩o既感覺!但係我某個釣魚網o個邊,見過話冇過水就唔去得禁區釣魚,唔通唔係真o既?

即使我過水俾頭先位解放軍,我肯定佢一定唔會收!我更加可以講,俾黑錢一位咁盡忠職守o既解放軍,簡直係侮辱佢o既軍格人格,同時係侮辱o左我地全國所有解放軍o既軍格同埋人格!我係絕對唔會咁樣做o既!

個養殖區就在眼前,唔夠一百呎遠,真係游水過去都得,但係邊防人員已經下逐客令,唔走唔得o架o勒,唔通真係就咁衰o左?正在好徬徨o既時候,肥羊挺身而出,同個~~司機講,叫佢車我地返去,死就死啦!

個釣場已經改o左制度,B區一百二十蚊全日任釣,但係只可以走兩市斤(即係一公斤),有多就十八蚊一市斤(三十六蚊一公斤),不論魚種,你釣到紅鼓,福壽就係你唔好彩,你釣到青斑花尾躉就你著數!今日老細出o左香港,由個經理招呼我地。佢介紹一個正位俾我地,話早一日有個哥仔釣走o左一條四市斤幾青斑,同埋一條兩市斤幾黃"魚立"鯧,一共釣突o左五市斤。嘩,真就發達咯!百二蚊買一條一公斤幾(大約係斤十兩左右)o既黃"魚立"鯧,係貴o左少少,但係跟住o個條青斑就只係要九十大元人仔咋啵,有兩公斤以上(即係三斤半左右啦),唔錯呀,平過"PK"超級街市好多呀!

唔好講啦,開波為上呀!肥羊用上次枝放火箭竿,肥雞用枝3米6投竿,我就乜都冇,得枝筏仔,冇法,頂硬上!佢地兩個玩遠投,打到場中心。我重係織緊布,穿緊線,肥雞竟然已經中魚!"突.突.突."三o野就玩完!走口!等到我織完布,肥雞已經第二次中魚,又係"突.突.突."三o野,條魚就玩完!上水睇一睇,條魚如果兩千幾年前過秤,應該有七八斤,而家就係大約三市斤左右(即係1.5公斤,後來過秤,真係有1.65公斤,兩斤十二兩左右)。肥雞即刻丟o左枝竿,話已然夠數有凸,唔想俾多錢喎。姣婆又點守得寡丫,條友仔一陣就執返起枝竿,又再釣過!結果,佢起o左三條,一共約有三公斤多o的,要俾七十幾蚊贖身!

由於我玩筏仔,唔可以遠投,見肥貓肥羊中完一口又一口,我都冇厘動靜,正當我好灰好灰,差唔多想放棄o既時候,枝筏仔竟然自動出絲,抽一抽,中!咦,有少少力水啵,想玩一手都唔俾,但係條魚要玩"誓不抬頭","突"o左成十幾o野都唔肯上o黎,點都要俾返一手俾佢,搞o左成三分鐘,至上到條魚,係一條細鱗,睇落二千幾年前過秤,都有兩斤以上!後來又有一條斤頭仔同一條紅鼓仔,咁我o既贖身費最少,十蚊就得。肥羊就最削,成日上得一條魚,不過一條就過哂數,起o左全日最大o個條魚!為o左呢條魚,佢要俾多四十幾蚊至可以贖身!

釣o左三粒鐘,魚我地就中o左唔少,但係因為我地三傻釣魚完全冇技術,一個字~~削!上得到水o既只係得幾條。不過玩完之後,我地三個人都患o左個好嚴重o既"紅鼓恐懼症"!因為今次中o既,同埋上得到水o既,絕大部份都係紅鼓!又肥又大又重秤又冇力,又唔值錢!俾錢唔緊要,最緊要係物有所值!

唔緊要啦,玩完又食飯,個經理又入o黎同我地傾偈,又叫我地過入水塘,去釣佢o的魚上o黎。時間有限,興沖沖我地又邋傢牲去開拖!魚餌呢?經理叫我地秤多兩草o野生蝦去喎!好,廿蚊唧。跟住佢又話,你地釣住先啦,釣唔到魚我唔收你地錢。咁我問釣到點計,佢就話,照A區收費啦!o下,唔係嘛?老細上次同我地講,o個邊係巨物竇,隨時會有二三十斤o既花尾躉,咁我中o左魚咪賣身都唔掂?上次老細話叫我地同佢釣返來嘛,唔駛收我地錢喎!經理就解釋俾我地聽,係冇收我地入場釣魚費o架啦!我地三個傻佬夾埋,都未夠俾一條三斤花尾躉,咁唯有唔去住啦,又再下次至算o勒。

話口未完又有中港巴士到,咁我地就拖住疲乏o既身軀,踏上歸途。

 

牧場海鮮價格報導 (A區,每市斤計)

紅古 = 紅鼓   人民幣18元
紅由 = 紅鮪   人民幣39元
包公 = 細鱗   人民幣38元
海麗 = 懵仔   人民幣32元
花盧 = 花鱸   人民幣24元
羅非 = 福壽   人民幣5元
立魚 = 魚   人民幣32元
金古 = 金鼓   人民幣38元
芝麻斑       人民幣118元
紅魚        人民幣38元
青斑        人民幣88元
花刀 = 釘公   人民幣35元
金鯧 = 黃"魚立"鯧 人民幣45元
火點        人民幣39元
石蚌        人民幣38元
章紅        人民幣18元
青蟹        人民幣15元
龍躉        人民幣168元

鳴謝 : OSF會員肥熊提供文章、圖片