夏季初嘗阿姑
作者 電波釣魚網   
2001/08/05, 星期日
夏季初嘗阿姑
日  期 :2001 年 8 月 5 日 (星期日)
時  間 :15:00 ~ 20:00
釣  點 :紅 排
釣  法 :磯 釣
釣  手 :小齊、lalala、小鬼馬、電筒、現金、麟、小川、高高、叉燒、璣
釣  餌 :南 極 蝦
釣  獲 :牛屎、黑沙、黃腳、幽面、雞泡、梳籮、暗釘


 

8月5日,星期日一大班電波釣友幫親阿姑排,中午14:00在中環港外線碼頭集合, 十男女連搞磯裝備在船上以經虛陷加埋現金妹既美妙聲線,簡直係眾人焦點, 到左長洲第一時間更係每人整番碗例牌‘清湯腩’+凍奶茶=食飽飽, call埋艇家成成哥哥岩岩好出發.
 

電筒哥&叉燒叔叔~八號位 
(文:小齊 @ Aug 2001)
由於今日水位太低所以電筒哥冇上佢個食糊五號位改左去八號位,今次叉燒叔叔話要跟電筒哥學下起十七條立立,結果電筒哥都冇令大家失望,兩人起左十幾條手板立.而電筒哥仲有條大魚斤半黑沙潻,電筒哥真係人氣急升,釣技都急升.

 


 



 

川川,高高~香港小笠原 (文:小齊 @ Aug 2001)
川川,高高就上左個名位‘小粒原’果度d磯石真係好似小粒原咁架….不過d魚獲就……都有幽面既.
 

小鬼馬&小齊 (文:小齊 @ Aug 2001)
我地上到礁石開好晒野就見到~嘩!個海成個垃圾場咁.好難釣呀,釣組經常釣到d垃圾,入黑後垃圾比較少左…開始有番d心機釣下,好快就中番幾條立.雖然釣既時間唔係太多,但係都有立中,都算唔錯啦.


 

lalala,現金妹,麟~狗窿位 (文:lalala @ Aug 2001)
嘩!好曬呀~~個太陽好似想晒濃人咁,開好竿同誘餌,就拿拿聲釣魚,上次中斤頭黑沙個位今日似乎太淺水又有好多垃圾,於是試下去上船位釣,落左兩三口餌就見個浮波好青趣咁沈落去,一揪就中,嘩!好好 feel 呀!係條四指黃腳立(因為我今日開枝0.6號power come/2號主線/1.2號子線),噢~~條魚入晒扣呀,放入水池游下先,之後冇乜魚訊,仲雞泡大咬添,咬斷晒D子母線呀,無晒心機啦!後尾仲勁大流呀,個浮波好似快艇咁呀,唉,八點收工等船。
 

磯~窿窿位 (文:璣 @ Aug 2001)
一段時間冇去紅排垂釣喇!今次上左一個新位。平時多數係小川個solo位由於今次佢要同高高去另一個位(香港小笠原),所以我就上去試一試solo,臨上石前問左佢一D食糊位,一上石,第一時間走左去一個石窿避暑。

嘩30幾℃真係唔講得笑,背心、冰箱、生果、汽水,一應俱全,吹住海風乘涼、一邊飲哥喇一邊食住冰涼既士多啤梨woo~爽呀!爽到幾乎訓鬼著左丫!弊! 差D唔記得左今次黎係垂釣啵!

歎鬼完又開始他他條條開誘餌,咦?冇乜流喎,開稀D先!開完誘餌後發覺身前有艘遊艇駛近,當然第一時間打下招乎先啦!順便【目及】下有冇比堅尼女郎嘛,噓!你估有冇丫?哈哈哈!攪完一大輪,四點半開始垂竿。

唔係丫嘛,成海魚仔咁鬼熱鬧,一於餵飽腳邊個D先;一路打誘餌一路吸引各方魚仔,我諗在腳邊那群魚仔就佔據左五寸水面厚度喇!唉腳邊咁多魚,唯有試下遠D深D既釣點啦!哈,有料到力喎磅頭黃腳上水。嘩!好大舊雨雲呀!慘慘慘!今次濕硬身啦!咦?唔係啵,點解會轉灣既?仲吹向lalala、現金同呀麟度添,唉!你地就好啦!有雨水降溫。

嘻嘻嘻!釣釣下,做乜鬼冇左個浮波既,撞鬼囉,比條死雞泡噬斷左條母線呀!浮波咪走呀!撈完波再斷多五次母、子線後決定投降;太陽開始落山,又繼續去歎冰凍水果,飲哥喇!又係爽到震。

食完野,夜媽媽,乜都睇唔清楚,都係重調釣組釣腳邊吧,哈,又有磅頭黃腳上水,拿拿聲打番兩殼誘餌,未幾又有?今次好力左少少,樁下樁下咁?X鬼過癮啵,撈上來一看,估中啦!今次係牛屎喎,都有十幾兩架!垂多陣竿覺得有D【支力】索性收竿執野等船來。嘻嘻哈哈又一day,釣魚唔好放飛機。

總結:夏天去紅排雖然冇大乜大魚,但係總魚獲都不錯.

鳴謝 : OSF會員小齊提供文章、圖片