大鬧大聖堂
作者 CC   
2001/03/10, 星期六
《大鬧大聖堂》
日  期 :2001 年 3 月 10 日 (星期六)
釣  點 :金山郊野公園
釣  法 :台釣、投釣、假餌
釣  獲 :保持一貫電波水準..... 蕉
團  員 :熊貓大人、Wai Wai、Rayrol、躉爺、十九哥、cc、c 嫂、小 c 妹

 

文 : cc @ Mar 2001

 

  四月開始,香港水塘就會進入禁釣期,一班電波兄弟趁住仲有少少時間,於是就臨急臨忙申請番個水塘釣魚“拉腎屎”(Licence),齊齊諗住去水塘起番三五七十斤魚。今次行動o既總黑手係熊貓大人,而十九哥就繼續做其助理鋤你黑手,行動o既地點決定o左係金山公園,分別有熊貓大人、Wai Wai、Rayrol、躉爺、十九哥、cc、c 嫂同埋小 c 妹八個人參加(其中有兩個純粹比人拉o左去觀光,唔係釣魚o既)!

 

釣魚牌照

  根據香港法例規定,去水塘釣魚係須要先申請釣魚牌照o既,申請方法好簡單,只要你年滿十三歲,去你屋企或者做o野附近交水費o既地方,出示香港身份證,比廿四蚊,就可以擁有一張為期三年o既水塘釣魚牌照,成個過程都係十幾分鐘唧!其實張證o既成本都唔平,淨係過膠都要幾蚊啦!再加埋正面底部有把 60mm o既呎,釣到魚可以度魚,見到相熟釣友可以度水(問佢借錢),見到肥熊仲可以幫佢度埋頸(佢成日都話自己唔知自己有幾粗,所以.都係舉手之勞o者),總之一個字講哂.....“抵”!!

  收到張證之後你仲會發覺有幾條附例,好似每年四月一日至八月卅一日唔可以釣魚,唔可以用魚網,一日o既魚獲唔可以多過 36cm 或以上鱸魚 x 2 + 30cm 或以上生魚 x 2 + 其他 18cm 或以上每種魚類 x 2(其他要放生),唔可以用爆炸品同毒物捕捉魚隻,每張證限用一竿一絲(所以聽講有人會申請多過一張)等.....

 

鯪魚訊

  朝早八點半我o地就已經o係觀塘“Max 蟬”快餐店集合,年紀比較大o既就負責食早餐( cc 一家),年幾比人小o既就負責買魚餌(其他釣友),大家分工合作,發揮電波米青神!之後大家一齊撘地龍到鴨撩雞,再打的到達金山攪o野公園。

  哩度果然風光明媚,彷如隔世,確係馬騮o既天堂!我o地趁住大聖哥未開工搵食,就用釣鹹水睇位o既方法搵o左一個咀位,跟住就各自各米青彩喇!Wai Wai、Rayrol、熊貓大人都用自己心愛o既投竿,十九哥就用手竿,cc 就做苦力,c-嫂負責揍囡囡,小 c 妹就負責食奶同訓覺,有人用金魚舖買o個o的淡水生蝦,有人開粉,有人用假餌,有人用人餌,總之各顯神通,務求釣到第一條魚上水。

  釣o左大約半個鐘,大家都感覺到好強烈o既“鯪魚訊”..... 應該係“零魚訊”至o岩,cc 亦開始加入戰團,諗住多個男人多枝竿,點都著數o的,不過始終都係五條大蕉棟哂o係度.....

  又過多半個鐘,躉爺打電話比我o地報告位置,無幾耐佢就出現o係我o地眼前喇!唔駛多講,躉爺又係拎出佢o既家傳之寶,使出“一絲走天涯”同大家玩o下,不過見佢擰擰頭,就知都係同大家一樣,無乜好o野碰到啦!!

  我o地望番出個湖,久不久就見到有魚打水,遠遠近近都有,不過睇唔到係乜魚唧!既然有魚,大家都繼續留o係度,不斷改變自己o既釣組同釣法,為求鎖定目標。此時亦開始有其他釣友出現,有o的三五成群(一個人一枝竿),有o的就孤門獨戶(一個人但幾枝竿),Wai Wai 見人越黎越多,為求留住班好魚o係我o地釣點,自言自語咁講o左一句“打個窩先”,跟住就二話不說,開o左o的毒門秘餌,一球一球咁掟出去o勒!

  可惜!無論 Wai Wai 點努力都好,走o既始終都係要走,唔走o既始終都係唔開口!咀位一共十幾人,大家都靜靜享受鯪魚訊(零魚訊)o既滋味!躉爺見大家咁悶,於是又數番佢o的舊屎出黎喇,原來金山公園都係躉爺o既主場,佢話o個時一有時間就上黎釣o下魚,貪哩度有車位又就腳喎!佢仲話自己今時今日o既釣技,有部分都係o係金山結功..... 唔係..... 係練功練番黎o架!聽完躉爺一番舊屎之後,我又開始對佢有少少欽敬,躉爺釣魚o既範圍真係非常之廣,可以稱得上係“有魚釣o既地方就有躉爺o既腳蹤,就算係無魚釣o既地方(好似哩度咁)都有躉爺o既腳毛”,總之就係無處不在啦!據我所知,人因為肉體o既限制,唔可能無處不在,躉爺能夠無處不在,就證明佢唔係人...... 咁品,而係躉..... 神!!

  我見大家都百毛尿賴,於是就拎出一隻未落過水o既假o餌試試水o勒,其實都係存心同其他釣友開玩笑居多,因為哩隻假餌個鉤上面有一堆紅色o既毛,我以為阿十九哥未見過o的咁新奇o既o野,於是就同佢講“你睇o下!我條餌有毛o架喎!”佢竟然冷冷咁回應“好o力咩﹖!我條餌冇毛潻呀!!”,佢態度咁 Cool,我就好無癮咁垂低頭走o左去咯!

  我o地見繼續咁磨落去都唔係辦法,於是大家商議之後得出一個結論,其實大家見到o個o的唔係魚仔打水,只係人o地放生o個o的巴西龜過度活躍o者,如果唔係巴西龜,就一定係水魚喇!於是大家一致決定..... 轉位!!

 

轉位之後

  咁樣躉神就帶o左我o地去另一處“秘位”,其實話秘唔秘,新位都已經有成十個八個釣友o係附近磨緊。大家都未開竿,已經聽到熊貓大人o係度大叫“米青蛙呀!米青蛙呀!”,跟住就已經笑到熱淚盈眶,再講唔到o野喇!我o地朝住熊貓大人所望o既方向左睇右睇都發覺唔到有乜特別,但係已經聽到身後o既 Rayrol 破口大罵:“邊個咁無功德心,放哂o的蝌蚪落水塘!”,哦!原來係米青蛙o的後輩,米青虫科蚪!唔怪得今次行程o既黑手熊貓大人一時咁感觸啦!話說電波釣魚網做“踢溺睪實卜”(Technical Support)只得小貓三幾隻,要背負成個電波集團咁大個鑊o既一切技術支援,真係做到想跳扭..... 腰舞咁滯!難得今日見到米青蛙o係度培養o左成班摺棒人,有乜辦法唔感動到喊喎!

  大家安慰完熊貓大人一輪之後,就繼續開竿作釣,此時我身後o既小 c 妹用只有我同 c-嫂先聽得懂o既 BB 話同我講“爸爸,的見到好多蕉蕉呀!”此話一出,我即時聯想到各釣友o既釣況,所謂寧可信其有,於是我就乘機暫別各位釣友,一家人走去上演一套“尋找馬騮的故事”喇!

  基本上成個攪o野公園都係大聖哥,當我o地行到一個燒烤場,見到了無人煙,得一個小家庭o係度燒o野食,我o地就坐埋一二角,知道好快就有好戲上演!說時遲,那時快,終於有部分大聖哥按捺不住,連番偷襲事主一家帶黎o既食物,所謂三拳不敵四手,數隻大聖哥連番報捷,光天化日之下搶去事主一家部分食物同飲品,可恨大聖哥們不會得些好意須回手,繼續對著事主一家虎視眈眈,逼得事主從車箱裡取出硬物將牠們驅趕,事件始能暫時平息!所以在下忍唔住都係奉勸各位一句,“大聖公園不宜燒烤,食物失去可以買過,唔小心比馬騮咬傷或抓傷,要入廠打針就無謂喇!珍重!珍重!!”

  睇睇個錶都差不多時候回本疊咯,當我o地返到大本營之後,見到個個都係蕉容滿面,唔駛講都知結果係點啦(真係比小 c 妹批中喇)!環顧四週o既釣友亦不好過,聚蕉會神者比比皆是,唯一較突出o既釣友都係釣到兩三條 80mm 級錦鯉.....

 

後記

  回來後有網友收到風,話金山水塘有人落網取魚,所以釣獲強差人意乃理所當然!對我o地黎講都算係一番安慰說話,蕉都蕉得無咁傷!不過當日我o地的確見到有魚打水,釣獲欠佳可能係天氣、釣餌或技術所致,不能全部歸咎於釣點.....

  o係香港水塘釣淡水魚對小弟黎講都算係第一次!雖然無乜收獲,但總算有個幾好o既印象,水塘作釣讓釣者安躺於山水之間,可稱得上優哉游哉,偷閒片刻,令人心曠神怡!釣具準備方面,或多或少,可按個人喜好而定,而且釣淡水的確乾淨好多!

  不過想深一層,釣友若果為一己私利,為求多取一兩條小魚而作出破壞釣場,甚至是落簾等非法行為,逃過了法律制裁,卻逃不了良心責備,實是可悲......

~全文完~