西貢半月彎
作者 電波釣魚網   
2002/01/27, 星期日
《二五擊試水篇- 西貢半月彎》
日  期 :
 2002 年 1 月 27 日
時  間 :
 10:30 ~ 15:30
釣  點 :
 廿五擊釣點,西貢半月彎
釣  法 :
 投釣
釣  手 :
 黑咪、Xxx、國寶、肉海肥花(冇落竿)
釣  獲 :
 大大大條釘公、破記錄沙鑽各一條

 

 本黑咪自從應承o左田鴨大人搞呢個團拜,都未試過有個星期日o響香港。上個星期日,終於搵到藉口,返香港度假,咁就一於搵埋幾個處理助理旗手,去試水兼睇位。

但係,當日早上竟然落住毛毛雨,有少少風(將軍澳市區內約三四級左右),氣溫大約係10度左右......重有掛緊個向下箭咀>>>寒冷天氣警告!!!!個肉海肥花話唔到位,就算到,都係去吹水,唔釣魚。好,少一個唔少!買o左一兩紅蟲一盒米青,用o左四十二蚊。Xxx同國寶遲少少到,等齊人就打的上路.....嘩,試水都咁豪?唔係下嘛?係,就係咁豪,豪唔起咩???

去到海灘,正中央係泳灘,左邊右邊都係石灘,可以釣魚o既位都唔少。有十幾個燒烤爐,應該夠用。首先,去左邊石灘,打幾竿,冇料到!有幾個細路,見我地落竿,就走到我地隔離落竿。我見風色唔係好對,又冇乜料到,就轉位,諗住抖o下再去右邊。隻國寶同埋Xxx竟然走出去泳灘度,打佢幾竿.....我望一望,唔見有人郁佢地,就走埋出去,又打幾竿.....咦~~~有少少魚訊啵,好似係沙鑽,但係幾竿都抽唔中,唔通真係咁削?冇理由!再試過,今次中喇!收返o黎,係一條三吋幾長o既釘公,放生喇!之後,就有個工作人員好客氣咁叫我地去石邊度釣.....唯有又再轉位.....

轉去右邊,肉海肥花"奪命追魂呵"又到!佢話同我地幾個補充糧餉,一陣就到咁話。好,o黎咪o黎囉,唔駛我地空肚開工都好。一竿打出去,班細路仔又跟蹤到,離開 Xxx 唔夠三呎o既位,打出去!!!當時我企左邊,Xxx 企中間,班細路在右,佢地應該向右打就冇問題,但係.....佢地竟然向住十點鐘方向打,咁就一o野掃哂兩條線......哎~~~哎~~~哎~~~~~冇幾耐,我又中魚,今次係一條我有記錄以來最最最???o既沙鑽!!!!!全長兩呎,直徑四吋......勁!!!勁之哉!!!!!搞錯,係全長兩吋,直徑四分(半吋)!!!!!

終於,肉海肥花帶住我地o既午餐到位,大家吹風吹水,吹足兩粒鐘,直到真係頂唔順,就打道回府。