文 : Le Dan @ Feb 2002

話說我十二月臨返香港之前走左去拉斯維加斯賭番幾手。係拉斯維加斯果晚已經冇乜點訓。翌日歸家途中再約埋所有洛杉磯既電波釣友 (三個咁大把)去域當奴海灘 (Redonald Beach) 附近既釣點偷釣。我返到屋企 pat pat 都未掂落張?又就要出門口。

係美國釣魚真係比香港舒服，由其係當你唔係咁熟路既時侯。點解? 好似我咁，依家都唔係咁熟路，所以去親釣魚都係由我既釣魚專用司機 Anthony 黎我屋企接我，釣完之後佢又車埋我返屋企，仲乎服何求呢? 而且可以將釣具擺晒上車，到左釣點落車只係行三幾分鐘，真係好舒服，感覺就好似著左乾淨既衫咁，好 Soft，好爽! 而且自己可以控制幾點鐘疏散，唔駛比公共交通工具限死釣魚既時間。

域當奴呢個釣點我地已經釣左好多次，所以已經掌握到果度應該點釣。釣到斑既數量一次比一次多，而且斑既收獲都開始穩定。呢一晚，釣到既斤頭斑共有三條，其中兩條係由我經手，另外一條係由阿 Kelvin 中既。而 Anthony 真係同以前一樣，只係釣到 Markerel。唔通 Anthony 真係擺脫唔到淨係中斤頭魚餌 (Markerel) 既宿命? 咁又未必，其實佢係冇一個夠力既直絞，佢既小直絞又唔係好夠力，而我地又冇人識用直絞投釣。所以佢受釣具所限唔可以投釣，只好用橫絞釣下腳邊既魚。不過話比你地知，佢係再下一次興祝Le'Dan 再回歸美國既第一炮釣旅就做左當晚既當晚既主角，個人又仲龍蝦，又仲左三條斤頭斑，一時間成為左所有洛杉磯電波釣友中人人談論既風雲人物。

講番轉頭，當晚我地釣到第朝四點幾回程，回程之後就返左屋企執包袱去香港。果晚我又冇訓，再過幾粒鐘我就中下中下咁中去機場，再中埋上機之後大昏迷，昏迷完已經返到左香港。

P.S. 係呢面要釣到手板魚係一件好難既事，所以難得有咁細條魚，點都要影番張相先! 嘿~嘿~嘿~!