右手邊有個大碼頭，左手邊就有個細碼頭，前面有幾級梯級 (地圖3 )，最左及最右有礁石，全部都係好位。

  ISO 就係磯位，O 就係投位，Y就係手竿位，其他好似手絲、筏仔就基本上成個碼頭都得，個個位都咁正。

  大廟玩磯唔算好正，因為水流唔係大，而且係小內灣，但係屬於好安全ｏ個隻。

  投釣方面，就成條碼頭都咁好，基本上係沙礫底，唔怕棘石，但係要小心有幾舊石頭同埋有兩堆海草 (見地圖3 )，但係話時話，我就比較鍾意投近海草堆，好多時都有唔錯ｏ既魚訊 (即係都幾密口啦，起唔起到就睇技術同運氣o勒)。如果吹大東風 (即係頂頭風)  ｏ既話，出絲就會有少少困難，而且收獲會少DD。

  手絲筏仔不能遠投，但因為碼頭係 "在水中央"，機會亦十分唔錯。手竿我就從來都未試過，唔敢評論，不過時常見到有幾個蛋家呀嬸用手竿，起到唔少沙鑽仔同 "魚立" 仔。

  細碼頭方面我未去過，真係冇乜意見。
 

  天熱會有鮫魚拖，重係好多很多ｏ個隻，舊年水尾九月，我都重見到有人拖到三四條 (舊年我見人拖得好很過 "引"，但係硬係唔識去買塊鐵板仔，蠢！)。

  雞泡亦係時時見，日日見，最大我起過十幾兩，亦見過一次有超過三斤ｏ既超大雞泡上水，日本仔見到都會大叫 "一番" (Ichiban)！

  夜水方面，就有紅?、雞魚仔 (斤頭)、斑等等比較好玩ｏ既魚。日水我都試過上青斑仔，不過就係一指大，錢頭ｏ個隻。要玩中斑大斑，就要用生蝦，投向石邊，要小心棘石。夜水都係生蝦比較得食。

  幽面我都見人起過，不過屬於可遇而不可求。

  老泥唔多，而且唔大，都唔知點解，用籠ｏ黎裝都裝唔到。石狗亦係好細，林哥、梳欏，都係孫仔輩，釣到都冇用。

  呢度又有好多蟹，差唔多次次我都有收穫，但係蟹多就好容易俾佢地偷哂 D 餌。

  在此釣魚要小心，因為老虎仔同老坑係呢度陀地，成日上，不論大細，不論日夜，不論水流，小心小心！

  肥熊我次次去都係ｏ響同一個位落竿，個位唔係特別正，但係可以自成一國，有條欄杆梆ｏ下生籠，又有個船纜蠆坐ｏ下，連凳仔都唔駛帶，個船纜蠆好少船會用，有船埋只要小心 D 唔好俾人掃竿就得 (地圖4 )。