活 動 概 況 :
文 : T.O. @ Nov 2000

對上一次去東龍釣老泥爆釣咁好玩，所以今次一收到風有朋友約埋去露營+攀石，我緊係唔放過釣魚啦!

我同堅勇就有好重要o既工作去做...就係專責去釣魚啦! 加上眾朋友們都知道我成日都釣到魚，斷估今次老泥就實無走雞，所以就買定晒d薑蔥陳皮，預備晚餐清蒸海上鮮呀!

初初釣果陣都驚驚地，只係有十條3指大老泥，勉勉強強都夠一碟既! 好彩釣多陣就有一條石蚌同埋斤頭大八爪魚，先岩岩夠一大碟上，今鑊總算不失水準。釣獲當中仲有油追仔兩條，呢D咁既魚緊係放生啦，無肉又多骨，費時個個比魚骨拮...。

魚穫即釣即蒸，加上大廚精心炮製，真係正。睇真D....碟面好似多左條有腳魚，再睇真D....原來蜈公都引埋出黎.....係碟邊。好彩發覺到，唔係就加! 今餐個個都話無得頂呀.....嘻嘻!

諗住第二日玩下攀石啦，點知個個話想食咩魚咩魚，咁又要繼續努力啦! 日水都係得D老泥大咬，唔知係咪有運行，堅勇用投竿作釣，又比佢起到條斤頭石蚌。之後又黎多一條，不過今次就無咁順利，條魚好好力，頂多兩頂仲...甩埋口添! 算啦...... 都夠皮啦! 下次努力過啦!!

講開個釣點都幾正! 可以欣賞下攀石活動，不過就間中有D鬼佬跳水，唔知既仲以為係有大魚打水添! 嘻~嘻~!

附送10月3日南丫岸釣青斑仔一條
P.S : 我又有運行啦...今期與斑有緣...^o^