文 : cc @ Mar 2001

　　話說山本自從攪完十九擊之後，次次釣魚都斷走口，從此十九兄決定唔再做黑手云云..... 不過當佢遇上一個風和日麗o既星期六，終於都姣婆守唔到寡，決定重出江湖，再做黑手！一聽到十九再做黑手，本來個個無無聊聊o既釣友都雞飛狗走，只求獨善其身，免受黑氣所累，惟獨是 De' Edd 同 cc 兩個唔信邪o既釣友肯同佢一齊突襲飛行服務隊，結果.....

十九哥，你係得o既

　　星期六一早，十九哥身為黑手，Call 齊咁多位團友最後召集，佢見大家都已經作好準備，於是建議提早幾個字到約定地點集合，十個電波，十個爛釣，有得釣多幾個字喎，有乜理由會 Say No o架﹖！所謂“木蝦遇著大尾某”，於是大家就一拍即合，決定早o的入去喇！

　　因為小弟讀得書少，唔係好識計數，於是就問十九哥由筲箕灣搭地龍入東涌要幾耐o勒，十九哥毫不猶疑咁話：“四十分鐘！”，初時我都有o的懷疑，再問多佢一次都係一樣答案，佢又係今次行程o既幕後黑手，我o係毛可選擇底下..... 只好信佢老人家啦！我見仲有時間剩，就 cc 然咁去買蟲、買水同埋買乾糧，仲預o左四十五分鐘上地龍潻！

　　一個站又一個站，終於到o左中環轉車入東涌喇，睇睇個錶，嘩！都用o左成四五個字喎！仲有幾個字點入得到東涌呀！唔通亞邊個老點我﹖！再過多幾分鐘，十九兄就打電話黎o勒，我報告位置之後佢就話：“大哥！幾個字你點入到黎呀！我同 De' Edd o係 XX 茶餐廳度等你啦！XXXX （下刪十九個字所操o既流利語言）”，咁都關我事﹖！唉！未落竿釣魚已經知道釣得比亞十九哥“小”（正確用字好似係個“少”字，我好似又錯別字潻！），十九哥，你對我咁好，我日後會好好報答你o架.....

好多石..... 呀！

　　擾攘完一輪之後，終於都到達茶餐廳喇，我連忙同 De' Edd 哥鎖你鎖你，飲杯奶茶定定神，就一行三人再搭巴士向目的地進發o勒！

　　黎哩度釣魚都係小弟咁大個仔o既第一次，一落車就發覺個場好大，不由自主咁開口話：“嘩！十九哥，乜咁長o既..... 哩條碎石堤！”，跟住就開始向前行，搵個可以置得竿o既釣點，沿途見到個海咁大，一定好多魚釣o者，大家心諗：“個海咁大，釣唔到係你..... ”，最後果個字係電波大忌，大家諗都唔敢諗，繼續搵個好位準備釣魚仲好啦！

　　一路行，一路都見到有好多用天然廢料做o既竿架，細型o既有一枝兩三呎樹枝搭成o既，大型o既有用幾碌木加幾條繩，都高過一個成年男人o架！終於我o地開始有少少腳軟，都係時候停落黎開o下竿釣o下魚喇。

　　整好標準投釣釣組（母線+中通鉛+擰圈+子線+魚鉤）之後，大家就一字排開，將一小截紅蟲上鉤飛出去，收收放放之後大家都有少少不詳o既感覺..... 點解..... 點解...... 個鉤飛得兩飛之後就有去無回o既﹖！原來該處水深本來就係幾淺o下，再加上大家摸清釣點個底之後都發覺該處真係遍地地球（註：釣地球者，鉤石也，電波宇宙大王秘技），放出去o既鉤都變成死仕，有時粒鉛為o左保護下屬，情願同個鉤一同留下，共同進退..... 好一隊電波敢死隊呀！每每遇上如此慘烈戰況，我o地都會垂下頭來，默哀三分鐘，向失去o既戰友作最後致敬（其實係要再綁過釣組至真）！與此同時，我o地亦惟有用僅有o既技術、配合投向無咁多石o既落點，希望可以將陣亡數字減低，不過都係無補於是.....

　　再咁落去唔係辦法，於是三人都各自都開始採取災難性應變措施，我左手邊o既十九哥就放棄投竿，改用手竿，希望用其最拿手o既打狗捧法，實行九咬狗骨；我右手邊o既 De' Edd 就從唔知邊度搵到粒浮波，放佢出去！我就乜都出齊，改用輕鉛、短子線、手持速攻釣法、行上高位，總之出盡法寶啦.....

　　結果完上半場三個人o既總釣獲只係得太古老朋友 100mm 大石狗一條..... 我o地亦三人一致決定要轉位喇！臨走前我o地見哩位老狗友咁俾面上黎探班，梗係放佢返屋企啦，臨放前向佢千叮萬囑，要佢比個口訊佢班狗叔父，大大聲咁話：“叫你亞爺可以放心，我o地以後都唔會黎踩你個場o架喇！”

轉位之後

　　我o地向南環路東行，過o左碎石堤，去到一處離水面有成廿幾呎o既碼頭仔繼續作釣，鉛途見到o既廿幾卅位釣友都蕉味極濃！開竿投出去之後發覺前面百幾二百呎都係沙泥底，終於可以鬆番一口氣喇！反正大蕉都係預o左，最緊要係減慢釣組o既 Burn Rate！

　　釣o左一陣都係無料到，十九哥見我o地右手邊有班釣友o係度打緊誘餌，於是就向右越走越過，仲細細聲同我o地講：“釣佢流尾！釣佢流尾！”，雖然十九哥絕少染指磯釣玩意，但係佢對流頭同流尾o既認識都唔弱o架！不過認識還認識，始終都係釣唔到魚，無得比在場釣友見識佢o既斷走神功！三條友開始無所事事，De' Edd 哥就開始隊啤酒，十九哥就等極佢細佬半日安都未黎料.....

　　o係哩個時候，我記起電波其中一個老海鮮o既心得，哩位就係電波其中一位元老平爺喇！我記得佢係“依 X 尼”鉤o既信徒，佢話因為個鉤型靚，可以將成個鉤藏o係蟲入面，對付o的米青口o既魚好掂o架！所謂“用o左依 X 尼，依世唔憂無魚黎”，好！等我都試試先！唔試尤自可，一試就 Dup Guide，竟然比我起到一條手版黃腳上水喎！今次真係多謝平爺囉！！

　　跟住我見十九哥鬼鬼祟祟咁走o左入草叢，究竟佢又攪乜東東呢﹖過o左兩三分鐘之後有個著住同一套衫、同一頂帽、同一對鞋o既物體走番出黎，十九哥就已經唔見o左人咯！我睇哩條友貌似十九，但係行出黎比較低調，與其話佢似十九，不如話佢似半日安啦！係喇！佢就係“真人不露洋相，露洋相非真人”o既半日安喇！請鼓掌！！

　　話說每當十九哥釣唔到魚，或者斷走幾口之後就會搵佢細佬出黎旺o下場o架喇！事實上十九哥一出世就有好生之德，埋手苦讀十九年之後創下“斷走神功”，表面為釣技比人削，實質乃蓋世神功，先放魚而後快，善哉！善哉！而半日安則為漁場殺手，雖然細佬比大佬本人削，但藉其名震天下之“打樁式釣法”，每次皆無往不利！惟此君每次出現皆甚短時間，作風甚為低調！

　　半日安從草叢走出黎之後，就一直走到我跟前，他首先向各人釣具上下打量，然後二話不說就取去我心愛o既投竿；我同 De' Edd 睇到目瞪口呆之際，見半日安手起竿落，投竿打用，o下！用投竿當做前打﹖！咪係打樁式釣法囉！！三幾秒鐘之間已見一條八十幾 mm o既林哥上水，半日安向各人回眸一笑之後直線走入草叢，再換出等o左一點六七分鐘o既山本十九，可謂功成身退矣！

　　此時亦都日落西山，總結今日三人釣獲為石狗 x 1、油立 x 1、林哥 x 1、手版黃腳 x 2，總算保持電波一貫“噢！蕉 Feel”水準！但係哩度一向o既釣況都無咁差o架喎！而且個海咁大，卅幾個男人出黎釣魚，無理由個個都咁削o架﹖！雖然香港男性普遍工作壓力大，o係經濟仲未明朗之下個個都要連夜苦讀，務求自我增直，咁樣落去對一眾釣友o既心性同生理都有幾大o既影響..... 但真係個個都削到咁o既地步﹖！打死我..... o的石狗都唔信o架喇！

　　十九！一定係十九所累！唔賴佢賴邊個呀﹖！