好多釣友都知道 Le' Dan 最近整左支好騎哩既筏竿仔。果支騎哩筏仔總長度唔夠一米長，係由炸左既手竿改裝而成，用以釣魚仔極之好 Feel 。中左魚之後支竿唔單只 U 晒 ，簡直可以用個掉轉既 J 字黎形容。除左手持絞仔果個位硬小小之外，支竿既竿身好似成條蛇咁，中左魚之後好鬼好feel。 
 

成 Set 竿最貴既部份，可以講係話個橫絞仔，佢既價值係支竿既三、四倍，都值幾十蚊咖 ! 嘿~~嘿~~! 所以要搵條失手繩扣實個橫絞仔以防萬一 (如圖示)，夠晒盞鬼兼騎哩。

騎哩筏面世後因長度所限，很難找到合適的釣場使用，真是苦無用武之地。 直至上星期六 (27/05)，le'Dan 同青蛙兩條友仔上左東廊低，先初嘗中魚滋味。

第一條中既係 3-4" 釘公，食埋黎果下非常好 feel ，成支竿 dup 晒，發揮 "J-調子" 既特點。笑到阿 Le' Dan 都收唔到絲，笑停左之後先慢慢收上黎。 之後青蛙見咁過隱，又立左去釣下，佢都中左幾條泥同石狗，玩到佢愛不釋手。佢仲笑支竿話中手板魚都唔知頂唔頂到添! 青蛙佢太睇晒小騎哩筏既殺氣同威力喇!

冇耐之後，青蛙用支騎哩筏釣下釣下，突然有一下好勁既魚訊。佢一抽，跟本抽唔郁，當時佢以為 Kick 石。之後佢就慢慢收絲，臨到水面果陣青蛙 哇~哇~哇~ 咁大叫左出黎，之後再的條魚上水，原來係一條6兩既黃腳。當時Le' Dan 同青蛙都難以置信，平時釣到 D 咁既Size 既魚仔跟本冇乜驚喜，不過用一支咁騎哩既騎哩筏，居然可以釣到佢上黎，真係天冇眼! 

結果，支騎哩筏再添殺氣，而且成為 Le'Dan 既心愛釣具之一。
 

騎哩筏的前世今生 : 

騎哩筏既前身係一支價值人民幣廿蚊既 9尺手竿，已經中過唔小手板或以下既魚仔，極具殺氣，早已經番晒老本。支手竿Certify 既原因係 Le' Dan 試圖挑戰果支手竿既極限，佢抱著炸左罷就既心態，居然去釣魚排抽獎池入面果D 斤幾兩斤既青鱸。 結果Le' Dan 烏底身死就難就都頂唔到條魚，而果條青鱸一手都都唔比阿 Le' Dan，完全當支手竿冇料到，自己好瀟灑咁水入面慢游。

最後 Le' Dan 阿青蛙極度遊說之後，大力一抽。果支手竿就炸左尾段既三尺，於是Le' Dan 再抽住支斷左既 六尺手竿再頂多兩下，最後都係斷絲收場。 

支手竿已經炸左，而且只係得番六尺咁上下，但係仲可以再用。有一次 Le' Dan 向朋友展示該手竿柔軟度既時間，唔覺意又炸多左兩尺幾。到左果一刻，果支手竿只係得番三呎幾。 最後，更被阿Le' Dan 改成為筏仔，成支筏竿仔都唔夠一米長。

竿身既導環，係用十幾粒投釣用既膠珠，套入隨螢光棒附送既膠管，再滴幾滴 AA 膠固定位置，出絲都幾順咖! 而竿頭最前果個導環，係用一個三號投釣勾既勾柄，用水喉膠布包實再滴幾滴AA 膠固定位置。 至於個絞就只係用繩綁實係竿尾，不過都幾實淨。 成Set騎哩筏連絞加埋都唔使一舊水，認真抵玩。