(六) 魚神細鱗     文 : Le'Dan @ Feb 2001

早水果然係早水，在場既釣友投出去無耐之後，就開始有魚訊，不過只限於小魚，而魚種只係得於紅衫仔、石狗同雞泡仔。雖然釣友已經一字排開，繼續磨爛蓆咁去釣，不過大魚呢，就始終連影都唔見，而最終早水投釣釣友亦未能釣得大魚。

東涼夏暖既帳幕撘建於螺石下

由於個天已經光晒，我釣左一陣就爬早小小睇睇見唔見魚神同青蛙。我離遠望到螺石下面有一個藍色既帳幕，估計魚神同青蛙應該係果度渡過男人最凍既一夜。帳幕入面，隱若可以見到阿青蛙被一張膠質地蓆卷住，相信佢都係為左取暖先咁做。而帳幕對出，已經見到魚神同埋釣友阿禧已經將投竿拋出，繼續搏殺。

天蒙光魚神同阿禧已經開始搵食

事後同佢地傾番，青蛙話個帳幕已經封密晒咖喇，風唔知由邊度吹入黎，上身衫仲勉強可以頂得住，不過隻腳就凍到痴晒線，好彩搵張地蓆卷住隻腳，先頂得順，唔係一定凍死。佢仲話好彩前一日冇買到張老細話透氣既銀色地蓆，而買左張平既膠質地蓆。另外，據聞阿禧前一晚就左個睡袋入面扮木乃伊，因為有睡袋，所以都勉強可以捱到男人最凍之夜。

係播! 佢地三個前一晚冇去食晚飯，到底有咩收獲呢? 電波投釣魚神 Jorden 果然有一手，儘管前一晚又凍又大風，魚神大人都可以以佢既獨門超遠投釣得斤幾重既細鱗一條。據青蛙描述，當時大約夜晚九點幾，周圍都黑嘛嘛，....

魚神大人投釣釣得斤幾細鱗

青蛙 : Kick 石丫? 支竿 dup 得咁＊勁既?
魚神 : 唔係丫! 有野咖!
青蛙 : !? 唔＊係丫?! 大唔大餅?
魚神 : (作戰中，未有回答)
青蛙 : 使唔使撈....
細鱗 : (啪~啪~辟啪~啪~!) 唔對路，點解我上左岸既?
青蛙 : ....箕
青蛙 : 唔＊係丫? 撈箕個箕字都未＊講完的＊上水
細鱗 : (啪~啪~辟啪~啪~!) 試下彈番落水先!
青蛙 : 條魚彈緊落水播! 等我踩＊住佢先!
細鱗 : 哎呀!

條斤幾既細鱗比魚神大人一手都唔比咁拉左佢上水，據知情人事透露，當時魚神只係用緊２號帶腳，但係魚神一都冇悠疑，一手都唔比之餘，仲要一野彈條魚上水，魚神果然有料到。我梗係唔客氣叫魚神條魚出黎比我影下相，相信係條魚入左冰箱，已經縮左水同輕左，魚神估計條魚上水陣都有成斤半重。

晨早溜溜隻狗條尾點解指直晒既?

睇黎投釣釣友既代表作，好大機會係由條細鱗代表出賽，迎戰磯釣釣友既釣獲。磯釣釣友約好船家朝早六點去碼頭接佢地出發去靚靚磯位，估計磯釣釣友 Charles、 Joey同Wilson佢地可能已經釣到飽晒!

八卦完一輪之後，我又走番去天后廟底睇睇。途中我突然向上山望，爾~~~! 邊個晨早溜溜走上山撚狗呢!?攪到隻狗條尾都指直晒! 乜 Charles 唔係同佢地一齊坐艇上磯位咖咩? 點解會山上面撚狗咖呢? 唔通想拍"那隻母狗的故事" 香港版 ? 唔通佢同其他釣友哎交? 到底發生左咩事呢? ....... (侍續)。