文 : Le'Dan @ March 2001 近排我好小釣魚，某日同阿水籠標傾開提到泥涌近排有景，原先打算去泥涌投釣，但係最後唔知點解投釣釣局演變左做艦釣。我已經好耐冇艦釣，而且都有掛住三杯酒既大力連米同火箭沙鑽，所以第一個舉腳讚成。隨後再焜埋De'Edd、米青蛙、威鱸，而阿標就再焜多個朋友一齊去。 終於出發喇！朝早七點鐘落到屋企樓下巴士站，見到個天陰陰地，都有擔心會唔會落雨呢？幾秒之後終於有答案。雨水一滴一滴咁打落我頭殼頂，我個心就不停咁咀咒－－－唔係丫嘛？我近排好耐都冇釣魚，一去偷釣就整單咁野？ 過多陣，巴士終於到左，我就即刻閃左上車。冇耐之後就收到米青蛙既電話，佢話.... 米青蛙： ！＠＃＄＃＄︿＄︿％－ 落雨喎，點攪丫老細？
Le'Dan： 我去緊喇播！唔係好大雨！黎丫，拿拿淋出門口丫！
米青蛙： 我呢度好＃大雨播！倒水咁倒！
Le'Dan： 有冇咁堅丫？依家微微雨咋播！
米青蛙： 你都痴＃ˍ既！依家一出門口簡宜係 "Totally-濕ed"！
Le'Dan： 出黎先啦！咪當食早餐囉！
米青蛙： 食早餐都唔＃駛去到馬鞍山丫嘛！
Le'Dan： 阿標去緊喇播，我去匯合阿標先，你快出門口啦！
米青蛙： 睇下點啦！
Le'Dan： 你喜歡啦！ 於是我繼續向馬鞍山進發，去到集合地點既某某茶餐廳水籠標已經到左。其他人呢？唔係得我同水籠標兩個咁浪漫？坐多陣，De'Edd 同威鱸都相繼到達。大家食完早餐之後，仲未見阿米青蛙出現，所以我地一致裁定米青蛙已經 Certified ~~~~~~~~~~~~~唔到。我地再睇睇個天，見天色都唔錯，仲有丁屎咁朵朵太陽添，最近我地決定如期出發，一行四人行去租船既地方船。 途中 De'Edd 講話如果陣間釣釣下落雨......，我聽到佢咁講即刻制止唔比佢再講落去，陣間好既唔靈醜既靈就真係該燴囉。最衰米青蛙唔我地身邊，唔係一定叫阿 De'Edd 對準米青蛙”唳”口水講過。 行多一陣，終於到左租船既地方，我地即刻安排船。水籠標同阿 De'Edd 一隻艦，而我就同阿威鱸一隻艦。我地由馬鞍山出發，目的地係三杯酒一帶海面。當時既天氣真係唔錯，海面風平浪靜，仲有小小微弱既太陽添！唔通真係暴風雨既前夕特別平淨？ 
我地唔係坐呢D艦，呢隻艦係唔覺意比我地影到咖咋! 隻艦過左白石之後，個天就開始黎料。先黎個個變晒做浪花之友，比浪花兜口兜面咁打；再黎個風師兄，一路行一路吹，吹到我地咀都歪埋。當中仲好似有幾滴雨水添，不過咁惡劣既環境之下我地仲可以趁空檔綁好晒釣組。 經過左半粒鐘既船程，我地兩隻艦終於到左三杯酒，到左之後大家咩都唔講，只係鬥快將釣組放落海。以前艦釣，我見阿 Jorden師傅用筏竿加直絞黎艦上投釣收獲都唔錯，所以呢次我早有準備，帶左個直絞黎試試。投出去第一下既時候，因為我從未用過筏竿黎投釣，所以覺得好鬼過隱。擺好支竿後我就同支筏仔上餌，舊餌都未上好，支投筏竿已經比魚拉到90度，於是我放底晒其他野，狠狠地抽竿，中喇 ～中喇 ～！係一條手板咁上下 Size 既連米。呢條連米可以一次過滿足晒我三個願望添播，包括有投釣中魚、艦釣中魚同筏釣中魚，中一條等於中三條，哈～哈～哈～! 自從唯一一條手板連米比我釣左上黎之後，成個海即刻靜晒，零魚訊又再上演。既然咁蕉，一於轉位。水籠標一聽到轉位之後就話都冇咁快就開船走，唔通托慣水籠既水籠標真係名不虛傳？講番我同威鱸隻船，個尾機撻極都撻著。撻唔著都唔緊要，最大鑊既當時水流好急，係隻艦唔覺唔覺已經飄近餉擺放三杯酒既小島。由於水流急，所以個小島睇上黎越黎越大，過多一分鐘，隻船已經比浪花沖埋岸邊近一米既地方，而個尾機仲係撻唔著，當時水籠標隻艦又開左去老遠求救無門，最後.... (侍續)
P.S. 到底最後威鱸 同 Le'Dan 隻艦有冇觸礁呢？個船尾機獨礁時有冇撞爛呢？佢地係咪兩個都跌晒落水呢？有冇做人形自立雙標呢？有幾多財物損失呢？欲知後事如何，請看下回分解...
由於水流急，所以個小島睇上黎越黎越大，過多一分鐘，隻船已經比浪花沖埋岸邊近一米既地方，而個尾機仲係撻唔著，當時水籠標隻艦又開左去老遠求救無門，最後我同威鱸只好採取一連串災難應變措施。 首先我停止嘗試去撻著部尾機，因為我知道撻著左仲大鑊，果度咁近岸邊，尾機好容易撞倒礁石，如果抄爆尾機真係神仙都難救。我同威鱸即刻一人立起一支槳，好急既水流之下重演釣友叉燒既不生絕學 ----- 頂礁，好彩我以前親眼見過叉燒點樣頂礁所以有經驗，如果唔係恐怕隻艦隨時都會有觸礁既可能。我地首先合力逆住流用雙槳將隻艦隊番出小小，一路隊我一路望望四周既環境，然後立即決定採取以下一連串拯救自己既方法。 (1) 將隻艦先隊離開岸邊
(2) 離開岸邊解決左即時危險之後再用槳向右邊死扒爛扒
(3) 等隻艦兜過左個島之後就由得隻艦自己飄，跟手再打電話叫水籠標黎救
(4) 再唔掂就Call水警
咁就一定係最安全而又唔駛做人形自立雙標既方法。 
方案決定左之後，立即發動艦上所有船員 (即威鱸同我兩個) 依計劃行事。經過左幾分鐘既努力，隻艦終於受到控制，距離岸邊都有成十呎八呎，勉勉強強都算度過左危險期。因為隻艦離岸邊都有一段距離，加上又完全受到控制，我就改變計劃，先叫威鱸繼續扒，我即刻再試撻部船尾機。真係邪，撻左兩三下之後又居然無事，真係比個船尾機激到啤一聲。 經過左一輪擾攘之後，我將隻艦駛去水籠標隻艦附近，就將兩只艦綁埋一齊再一齊落錨，以減低被沖走既速度，又再上演一幕『好蕉連環船』。『好蕉連環船』呢個連結方式我地以前艦釣果陣都試過，果然名不虛傳，真係一條手板魚都上唔倒，只係梳囉仔、雞泡仔同埋沙鑽仔，再釣多一陣連魚訊都冇埋添，真係不愧為『好蕉連環船』。 經商議後，我地決定去近榕樹澳對開海面試一試。呢次我吸收左上一次死尾機既教訓，所以我就叫水籠標千奇唔好走住，等埋我撻著幅計先，呢次都好好彩只係撻左十幾下已經撻著左，於是兩隻艦就一齊向榕樹澳進發。 兩隻艦去到榕樹澳石壆附近，我地就一齊拋錨。雖然拋錨釣既釣鑊會大減，但總好過釣得兩釣就要開船走位。經驗所得，榕樹澳、三杯酒一帶水淺，度玩艦上筏釣呢家野要放流黎釣會有較多既魚獲，直 dump 唔係好掂，而且拋錨既釣獲一定遠遠小於隻艦飄住黎釣。呢個心得係近兩年黎魚神 Jorden、米青、水籠標等一眾電波老Sea Food 齊齊研究出黎最適合度艦上筏釣既釣法，而且經過我地多次驗証成功。當然啦! 唔同既釣場有唔同既釣法，而唔同既釣手有唔同既睇法，樓上既釣法大家不妨參考，齊齊驗証一下啦。 講番正題，當我地拋左錨唔夠一分鐘，個天開始有幾滴雨落，見得幾粒雨仔我地當然當佢冇到繼續釣啦! 又過多一分鐘，雨點開始大粒左，而且開始聽到行雷聲同閃電，我再望望遠處，嘩~嘩~嘩~!! 唔係丫嘛?! 有舊好大既黑雲殺緊埋黎播! 黑雲既下面好似好大雨播!? 點~點~點..... 算好呢? (侍續)
P.S. 到底最後我地點算呢? 有冇濕身呢? 有冇淋病呢? 欲知後事如何，請看下下集自有分曉! | 
