文 : cc @ Mar 2001 又係釣大石狗o既旺季喇！ 身為電波釣友又點可以唔釣番次呢﹖！於是一班釣友o係網上約好時間、地點同埋行程，有人話請假都要去、有人話吞 Pop 都要出o黎、亦有人話出去之後預o左比老細炒魷，於是乎大家搵o左一個星期五，義無反顧咁去釣夢想中o既紅狗狗..... 出發喇！！ 話說大家約時間都有段故，事緣大家只o係網上講o左日子同人數，詳細o既集合時間大家都唔係好清楚，直到當日零晨一點十五分，單位領導人先確定幾多點等（幾個鐘頭之後就出發喇），當其時所有團友都已經同周公個女談緊心，不過大家都係魚神o既兒女，除o左得到魚神報夢知道大約集合事間之外，大家都會嚴格遵守魚神大人“先到先等”o既精神！！ 當我一去到集合地點，見到躉爺已經到o左，見佢兩手空空乜都無帶，我仲以為佢已經將所有物資搬哂上船，求證之後先發覺佢所有家當都已經放哂o係腰包裡面，除o左個人資產之外，只得一個手排、幾粒鉛、同埋幾隻鉤，相比我哩o的艦釣新手，又背囊、又腰包、又乜又物（之前我仲想連竿都帶埋o架），真係相形見絀o勒..... 等o左無耐，終於見到傳說中o既釣人兄，嘩！好得食喎！我有預感今次o的雌性石狗會追到上船食佢口餌啵..... 再等多幾個字，所有團友都已經到齊，於是我o地分頭買生赤米、死魷魚、紅蟲、沙蝦（魚餌）、乾糧（人餌），柴娃娃咁攪o左半粒鐘，會合埋揍完囡囡返學，無無聊聊行o左一段時間o既 Wai Wai，就到香港仔海濱碼頭上船出發.....終於到出發囉.....   因為加加埋埋有成八條友o既關係，所以今次我o地分開o左 A、B 兩船，A 船釣友包括神棍、CKF、Wai Wai 同埋 Edwin，而 B 船就有花尾躉、阿加汗、釣人加埋 cc。就係咁，我o地就浩浩蕩蕩由香洗仔開艇，朝著香港南一帶進發準備作釣。當日天文台報告話有四至五級東北風，不過出到去覺得又未致於咁嚴重，可以算係有少少湧，躉爺話比我o地聽，今次真係執到到咯，幾難得又無乜風、又好太陽、o的水又唔濁，唔通今次真係會唔駛蕉﹖！
賤人釣組  開艇無幾耐，各人趁未到釣點都開始準備自己o既釣組，我見躉爺一路綁鉤一路笑淫淫，於是以新仔名義走過去請教o下佢.....
相傳電波投釣界中有一必殺技，此釣法名為淫賤釣組，由電波老海鮮 Wai Wai 等人所創，此釣法後得電波釣友薪火相傳、發揚光大，現於電波投釣界站穩一哥位置，傳說不論魚毛有幾細，都可以籍此釣組一一釣上..... 原來艦釣都有一項對付電波大會指定魚獲（石狗）o既必殺技，今日得躉爺傾囊相授，小弟都覺得不枉此行矣！！ 究竟賤人釣組係點樣o架呢﹖係咪真係咁得食o架﹖！ 
所謂賤人釣組，原來係一副主絲之上綁上兩個波子壓底釣組，據躉爺講，母線之上可配上擰圈以減少釣組上氣，至於綁法方面，可從母線取兩條呎餘長魚絲作子線，兩子線一起綁個八字結，子線 A 一頭綁落擰圈，另一頭剪短以防纏住釣組，子線 B 就兩頭綁上中通鉛及鉛頭鉤（即波子壓底），咁就可以一口釣兩狗o架o勒！！ 躉爺又補充，釣組最緊要係個八字結（當時我已經唔記得乜o野係八字結，差o的要躉爺捉住隻手先識綁），個結要綁到有咁實得咁實，我又用手又用口，以為綁得好緊，於是比躉爺睇睇，佢o既反應係話“o下！乜你未食飯咩﹖！”於是佢雙手隨便一拉，個結o既體積就即刻細o左一半，唔係o下嘛﹖！ 賤人釣組的確令人大開眼界，從今以後，電波又有新口號，所謂“釣林至尊，淫賤無窮，釣遍天下，莫敢捉蟲，賤人不出，誰與爭公﹖！”（註公者，石狗也） 撈基！撈基！  綁完鉤之反，都差不多去到釣點喇！船停定無耐，就聽到 A 船團友傳來一陣歡呼聲，唔係咁快中魚o下嘛，我o地連餌都未上喎！此時聽到當事人 Wai Wai 大叫三聲“撈基！撈基！撈基！！”，船伕亦前前後後咁頂，好似人o地就住條一百幾十斤大斑咁，此時 Wai Wai 亦靠近船邊，看準時機，一手 Zoom 個撈基落海，一下就中，此時 A、B 兩船紛紛傳出喝倒采聲，原來 Wai Wai Zoom 來係自己頂帽，因為佢無帶失手繩，大風一吹，所以.....
都無壞o既，聽某o的釣友講，撈基濕濕水會老例o的o架，總算係個好o既開始o丫！ 不過小弟奉勸各位，出艇帶帽記得做足安全措施，記得要綁失手繩，如果唔係掉o左頂帽或者做濕頭釣手都唔好啦..... 又黎撈基！撈基！ 我o地正式開始作釣，不出我所料，B 船第一個釣到目標魚o既釣手係釣人兄，果然得食，不過的就無去細究佢釣到果條係屬於雌性定係雄性喇，可能係雌雄同體都唔定呢！大家起狗聲此起彼落，躉爺不時兩條兩條咁上，雖然我都係用賤人釣組，不過因為心法同手法未能配合，所以都係比較削！如果你問我o地起o左幾多條，我諗最清楚o既都係阿加汗喇！事關汗兄就座o係生倉側邊，好多紅狗狗都係首先由我o地順手飛向佢背脊，然後再彈落生倉裡面，加汗件風褸都應該做o左好多個石狗o既魚拓，雖然無帶墨汁，不過原來石狗o的魚鱗都可以有好好效果o既！（汗兄，鎖你！鎖你！我o地下次會練多o的先出去o架喇！）  兩首船一路行一路釣，不經不覺見到頭頂上高多o左幾枝天線，我o地應該到o左鶴咀喇！此時躉爺細說當年，話哩度舊屎好多大赤立，赤立細條o既時候前額未突起，所以o的人只叫佢o地沙立，到變成赤立o既時候，條條都起碼過幾斤o架喇！可昔香港水質普遍下降，漁民又勞捕，再加上種種因數，依家赤立o既釣況已經今非昔比囉.....
此時大家都嚮往於躉爺舊屎當中，釣人亦不斷沉著作戰，結果真係皇天不負苦心人，我o地見到釣人手絲一沉，面色登時變得青唇，好似用盡石狗牛二虎之力收起兩手，大家見到紅光一閃，阿加汗見勢色不對，大叫“撈基！撈基！”，結果攪o左一輪，條魚終於上水，成船人亦忍俊不禁，眼泛淚光，真係赤立..... 真係赤立.....
文 : cc @ Mar 2001 上集我o地講到釣人攪o左一輪，終於同阿加汗夾手夾腳攪o左條魚上黎，此時成船人亦忍俊不禁，眼泛淚光，真係赤立..... 真係赤立.....個孫，話係條孫可能有o的過份，條沙立都有磅頭大o架！釣到條沙立都叫做還o左躉爺舊屎半個心願喇..... 分道揚鑣 A 船釣友見釣黎釣去都係紅狗狗，於是經商議之後決定過大海搏一搏，睇o下有無大花鱸、紅斑、大火點、赤立之輩！A 船亦打電話過黎 B 船，問我o地跟唔跟，我o地見到躉爺灑哂手，於是就向 A 船示意留守本部，收線之後躉爺解釋，一出到去應該會好大風，何況有先頭部隊幫我o地探路，點解唔留o係度避o下風唧﹖！結果證明躉爺o既決定係o岩o既..... 此時 A 船亦開始向螺洲、白排一帶進發，B 船就繼續釣其石狗，大家繼續唱“大狗整多兩條，大狗整多兩條.....”，而阿加汗o既背脊亦繼續受罪。突然我覺得自己條蟲比o野吸o下吸o下，比多一口佢，跟住就手絲一沉，條魚唔係好重、游速亦唔快，但係都好阻水o下，收多幾手就成條沙魚猛飛上水，返屋企度一度，都有成 27cm，總算破o左自己哩種魚o既紀錄！ 至於其他 B 船釣友除o左深水紅石狗之外，都有o的細過手版o既芝麻斑、嘍囉等雜魚，可能釣點水深o既關係，釣倒底物紅狗狗上到水之後，除o左條絲上氣之外連o的石狗都會上氣！因為深水狗上水太快無得減壓，體內o既魚鰾上到水時自然會漲起，入到生倉就會腹部向天o架喇！至於可唔可以過到哩關就要睇條魚o既造化o架喇..... 有o的就會過o左一段時間之後自己減壓，有o的就...... 所以學魚神話齋，“入o左扣o既魚唔好放生，唔係一陣成海都係死魚呀”，原來反o左肚o既石狗都唔好放生呀！！  再釣多一陣，A 船釣點都開始起風喇，可能隻船拋得犀利得滯，大家都有少少便急，連艇家都唔例外，躉爺見風急浪高，艇家又唔嚮度，於是就露番兩手，同場表演掌舵技術，大家唔好以為佢無料到，原來躉爺一早就有乜o野船長同埋乜o野輪機師牌，所以大家見到佢做舵手就唔好有樣學樣，以上表演真係受過專人訓練o架！！
我o地見到風浪咁大，一方面手腳並用，穩定自己先可以作釣，另一方面亦打電話去關心（嘲笑）一o下 A 船o既環境，結果電話聲中不時傳來“少過你！少過你！”o既釣獲報告，其蕉況可想而知啦！所以現在先知躉爺話留守哩度係o岩o既！同 A 船匯合先知原來佢o地去到白排附近落o左兩口餌已經起風，惟有原路折返，不過一來一回都花o左好多時間，仲影響埋 A 船一眾釣友o既軍心潻，真係慘咯！！ 銀洲作戰  風勢有增無減，開始有o的玩海盜船o既 Feel！大家都認為應該到o的比較避風，於是我o地兩隻船就一先一後咁向西走，去到一處叫銀洲背風o既位置繼續釣石狗。雖然哩度係無乜風，不過亦無咁密口，而且水比較淺，釣上黎o既都係啡狗，而唔係我o地心目中o既紅狗狗！
A 船釣友同艇家經過出面風風雨雨之後，去到銀洲都已經有心無力，咁多 A 船釣友之中就只有 Edwin 一人繼續努力，其他人都停哂手，艇家都停埋艇，有某釣人仲訓埋覺，比人偷拍都唔知潻！ B 船釣友同艇家就繼續努力，艇家見釣黎釣去都無乜景，出面又有人落簾，於是就去到一條水流，頂住條流上上落落，釣況好明顯比頭先，雖然都係釣啡狗，但係最重要o既係船家o既努力大家都好欣賞！ 此時環顧四週，都差唔多五點咯，黃昏o既時候睇睇後面o既海洋公園，真係幾咁詩情畫意，釣o左成日，大家都開始有少少體力透支咯，唔單止呀花尾躉，各人個躉都因頂流頂得勁得滯，都有少少酸痛o既感覺.....  又係時候總結一下大家o既釣獲，到底今日有幾多斤魚呢﹖邊個又係狗王之王o既得主呢﹖﹖
文 : cc @ Mar 2001  所謂夕陽無限好，只是近黃昏，太約下午五點鐘，大家都收拾心情，準備回程喇！A、B 兩船拍住拖咁慢慢行返去香港仔，路途上兩艇釣友隔住十幾呎分享今日釣獲，睇睇邊條紅狗最大，可能始終相隔太遠，大家都唔係睇得好清楚，惟有等到上岸先計數啦！一路上我o地都奉公守法，導守電波條例，將果o的又唔夠秤、又無入到扣、又唔反肚、又冇食用價值o既小魚放生，好快又見到家鄉咯..... 全日總結 總結今次艦釣成績，都叫做不過不失啦（o係電波黎講可以稱得上大大咬潻），環顧咁多位釣手，除o左我之外個個都已經o係艦釣技術上浸淫o左一段日子，唔駛問釣組點綁、用幾重鉛、幾大個鉤，個個收放魚絲都識得“快勞”之道（註：“快勞”，番文 FILO，即 First In Last Out），個個都信奉電波自生自滅o既精神，唔會話攪到首絲打哂結叫救命（就算你叫救命都無人理你o架喇），個個都中到目標魚（紅身石狗），其中三位團友所帶去o既三個 12L 冰箱都打爆o左（無花無假，有圖為證，唔係用電腦特技剪接o架），大家不約而同嘆番一口氣，總算無辜負電波一眾父老o既期望囉.....  誰是狗王之王﹖  結果大尾獎o既得主係釣人兄，佢以一尾磅頭沙立勇奪哩個組別o既冠軍，可以話係實至名歸，我上船之前都話過佢得食o架喇，下次估漁膽買佢都有著數喎，另外釣人兄亦係“十個電波，九個師哥”o既典範，各位現任太古得食之男，小心！小心！！
最後“狗王之王”o既美譽亦由 A 船代表 K 哥 Edwin 同埋 B 船代表阿加汗一同瓜分，兩位出線者將會代表香港電波釣魚網出席於東洋國男女群賭所舉行o既第一屆“全球華人狗王之王大賽”，雖然機票同埋食宿都係參賽者自費、每位參賽者要比五萬蚊報名費，但係電波釣魚網將會全力贊助每位代表米青蟲一條加哥啦兩滴（嘩！成幾年電波阿四工資咯！），以示支持！ 當各人將所有釣獲o係某大茶餐廳門口準備瓜分戰利品之際，我o地發覺身後突然走出一班阿叔圍觀，當中亦有香港仔陀地問價道：“賣幾銀一兩呀﹖”此時陸遂有街坊走過黎睇o下有乜著數，大家為o左保住電波之名，都唔敢胡亂開價（費事開價太低，日後斷o左其他釣友米路啦）！各人草草分享釣獲之後，就鬼鬼祟祟離開現場，而今次o既深水石狗團亦o係大家笑到含不攏咀之下結束.....   ~全文完~ | 
《深水石狗團》 
