文 : 肥熊 / 圖 : Cobra 二零零零年最後一日，有條細鱗打電話俾我，話有so咁講．．．．細問之下，原來係小欖樂安排海水化淡廠舊址有個跳蚤市場，裡面有個抽獎池，都幾好玩咁話。
 
專車前往樂安排，收費單程每位五圓正
|
佢同隻小撈璣去玩一日，都有三條鱸仔，又見到池塘主人臨收檔時倒幾桶魚落個池度，計有紅魚，紅鮪，火點，牙點，花細鱗，仔，青鱸等等。收費係廿蚊雞三粒鐘，釣六粒鐘係四條草．．．．．咁so？？？？ 重有專車，五蚊單程！
本來我已經約好安安(熊貓)去南區投釣開年，車費都要兩草，咁就不如去抽獎好過．．．．我約埋老友鵪鶉哥兩公婆，佢又帶埋老襟姨仔．．．．．條蛇(Cobra)又發姣，問我有冇局，咁就拉埋佢，點知某某又話，咁都有八件，好疊馬！  
魚眼鏡下的樂安排全貌 |
二零零一年一月一日，早上上路。中途有乜做就唔駛講，梗係等人買餌搵車之類。大約十點前我地就到位，有一樣唔講唔得，就係電筒哥又帶多兩件，咁我就一共有十一條友，真係好很疊馬！
到位之後，發現重門深鎖，點算先？打個電話，就有條大漢開門，但係佢唔係池塘主人，係掌門人．．．．．開門，佢又唔知點收錢，又話廿蚊一粒鐘，又話五十蚊三粒鐘，又話廿蚊一日，都唔知邊樣真！！！！尋日都重係廿蚊三粒鐘，點解今日又唔同價呢？？？最後佢叫我釣住出便先，等池塘主人返至斟過數，又好，釣住先！  
樂安排碼頭
|
熊貓哥手快，開竿掛餌投出去，唔夠一分鐘，中！！！！！死仔玩，玩幾分鐘至叫人撈璣，，係紅魚一條大約斤三四咁樣，唔算好大，但亦唔係太細。嘩，發達喇，咁都中條斤幾．．．．． 冇耐，池塘主人返，同條蛇蛇密斟密斟，最後五草釣五粒鐘成交。咁我就第一時間轉個正位（其實係向右移動十呎）。我在左，某某在中，安安在右，實行個三司會審！鵪鶉哥四件就最左轉角位落絲。而條蛇去另一面玩前打，電筒哥 (David) 同兩個friend做佢護法．．．．． 
釣友 David
|
冇幾耐，大約係開始十分鐘左右，隻鵪鶉大叫救命，原來佢中魚，係用竿中，佢咁大個女都未試過用竿中魚，條紅魚又唔係細，有成斤咁滯，搞到佢手忙腳亂，電筒哥即刻撈璣幫拖。點知差唔多同一時間，某某又中紅魚，今次有斤幾，電筒哥即刻又撈璣幫拖，條魚都未上，我又中紅魚都有差唔多一斤，我重好好聲氣咁叫一聲"電筒哥唔該"，佢又要幫拖落撈璣上魚．．．．．話口未完，隻鵪鶉個妹又中魚，今次係十左右牙點，唔駛幫拖喇，今次，直拉上就得。點知唔夠三分鐘隻鵪鶉又中磅頭紅魚，唔該喇，電筒哥哥仔．．．．．． 
釣友 David
|
其間安安同隻鵪鶉都中過一口，不過唔知點解，佢兩條友好似學識我招"斷走神功"咁，俾條魚拉斷絲．．．．．之後，D魚好似知道有人"釣"佢地咁，完全唔肯開口，簡直係零魚訊！！！！其實所有魚訊同魚獲，都係差唔多三十分鐘之內發生，其餘四粒半鐘都係"等"，至於玩唔玩得過，就真係見仁見智．．．．． 電筒哥見唔係路，同兩個friend過對面玩浮波．．．．．天有眼咯（定係天冇眼先？？？），電筒哥中一口好勁，估計係超大青鱸，左片右片，之不過又係玩三十秒左右，又斷．．．．． 
零魚訊困擾下，釣友已經.....
|
尋日（31/12/2000）有個懵佬中條懵仔，二號千又釣拉直，今日（01/01/2001）又見到有兩個叻仔，用船竿橫鉸大力馬，鯊魚鉤成隻重皮蟹，擺明博大霧，不過我走時都唔見有動靜．．．．． 終於捱五粒鐘，零魚訊情形之下，我同安安，鵪鶉一家人走先，而條蛇，枝電筒同friends，某某要釣多一陣，而且雲同樑哥仔地又到，佢地都未玩，話玩多陣喎．．．．．咁我地就唔阻佢地，打道回府去也．．．．． | 
釣遊